U Rwanda na Luxembourg mu bufatanye buziba icyuho mu ikoreshwa ry’ikoranabuhanga

  • NTAWITONDA JEAN CLAUDE
  • Kamena 8, 2022
  • Hashize imyaka 2
Image

Ku mugoroba wo ku wa Kabiri, Perezida wa Repubulika y’u Rwanda Paul Kagame, yakiriye Minisitiri w’Intebe wa Luxembourg Xavier Bettel n’itsinda ayoboye, baje mu Rwanda kurushaho kunoza umubano w’ibihugu byombi by’umwihariko mu bijyanye no guteza imbere ikoreshwa ry’ikoranabuhanga rigezweho.

Perezida Kagame na Xavier Bettel, baganiriye ku ngingo zirimo guteza imbere umubano usanzwe urangwa hagati y’u Rwanda na Luxembourg mu nzego z’ingenzi zirimo ikoranabuhanga rigezweho mu nzego zinyuranye by’umwihariko iryifashishwa mu kunoza serivisi z’urwego rw’imari n’iterambere ry’amabanki (FinTech).

Xavier Bettel yakiriwe na Perezida Kagame aherekejwe na Minisitiri w’Ububanyi n’amahanga n’ubutwererane w’u Rwanda, Dr Vincent Biruta, na Minisitiri w’Ikoranabuhanga no Guhanga Udushya, Ingabire M. Paula.

Iryo tsinda ryaje mu ruzinduko muri Afurika guhera ku Cyumweru taliki ya 5 kugeza ku ya 7 Kamena mu ruzinduko mu Rwanda no muri Niger nk’ibihugu bisanzwe bifitanye umubano wihariye na Luxembourg. Mu Rwanda ho baje mu gihe hari kubera Inama Mpuzamahanga yiga ku Iterambere ry’Ikoranabuhanga mu Itumanaho (World Telecommunication Development Conference/ITUWTDC) yatangiye taliki 6 ikazageza ku ya 16 Kamena.

Abo bayobozi ku wa Kabiri banitabiriye ibiganiro “Partner2Connest” (P2C) bihuje abafatanyabikorwa batandukanye muri iyo nama ikomeje kubera i Kigali, bagaragaza ubushake bwo gukomeza gushyigikira iterambere ry’ikoranabuhanga mu nzego zose z’imibereho ya muntu.

Minisitiri w’Intebe Xavier Bettel, yagize ati: “Kuba uhujwe n’abandi n’ikoranabuhanga uyu munsi, ntibigarukira ku guhamagara no kwitaba gusa, ahubwo binavuze kugera ku burenganzira bw’ubuzima, ubwo kwiga, kubungabunga umutekano, gutangaza amakuru no kuyabona n’ibindi. Bityo ntidukwiye kugabanya ako gaciro kagasigarira ku kubona umuyoboro w’itumanaho gusa.”

Luxembourg ni umufatanyabikorwa w’akadasohoka w’u Rwanda kuva mu myaka igera kuri 25. Mu mwaka ushize, ibihugu byombi byasinyanye amasezerano y’ubufatanye mu gukemura ikibazo cyo gusoresha kabiri ibicuruzwa bihererekanywa mu bihugu byombi (DTAA), n’andi agamije gushyigikira u Rwanda mu ntego rwihaye yo kuba icyicaro mpuzamahanga cy’ishoramari muri Afurika.

Ayo masezerano yasinywe mu kwezi k’Ukwakira 2021 ubwo habaga Icyumweru cyahariwe Ibigo by’Imari Nto n’Iciritse muri Afurika, ari na ho haganiriwe ku nzego z’ubutwererane zirimo kuzamura impano z’abakora mu rwego rw’imari, kubaka urwego rw’imari rurambye, gushyiraho uruhererekane rw’ikoranabuhanga ryifashishwa mu rwego rw’imari ndetse no kongera umusaruro w’ishoramari.

Muri Werurwe uyu mwaka, Isoko ry’Imari n’Imigabane ry’u Rwanda (RSE) n’irya Luxembourg(LxSE) byasinyanye amasezerano y’ubufatanye agamije guhuza imikoranire. Ni mu gihe mu 2020 Ikigo Mpuzamahanga cy’Imari cya Kigali (KIFC) cyashyiriweho guhuza ibikorwa bigamije kugeza u Rwanda ku cyerekezo cyo kuba icyicaro cy’ishoramari n’ubukungu ku Mugabane.

Kugeza ubu ibigo byinshi by’ishoramari bikomoka muri Luxembourg byubatse ishoramari rikomeye hano mu Rwanda, ndetse hari n’ibindi bikomeje kuzuza ibisabwa ngo bize gutangira ibikorwa by’ishoramari mu nzego zitandukanye.  

Abahagarariye ibigo byo muri Luxembourg byashoye imari mu nzego zirimo ikoranabuhanga, serivisi z’ibyogajuru, serivisi z’ikoranabuhanga mu rwego rw’imari (FinTech) ndetse n’ubuzima bari mu baje bagaragiye Minisitiri w’Intebe wa Luxembourg mu Rwanda.

  • NTAWITONDA JEAN CLAUDE
  • Kamena 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE