U Rwanda na Brazil byakuriyeho Visa abatunze Pasiporo z’akazi n’iza Dipolomasi

  • Imvaho Nshya
  • Ukwakira 6, 2023
  • Hashize amezi 8
Image

Leta y’u Rwanda n’iya Brazil byasinyanye amasezerano agamije gukuriraho Visa abagendera kuri Pasiporo z’akazi n’iza Dipolomasi, nk’amahirwe yo kurushaho gushimangira ubutwererane bw’ibihugu byombi.

Ayo masezerano yiyongeraho ayandi ajyanye no guhererekanya abanyabyaha bakatiwe n’inkiko yashyiriweho umukono mu ruzinduko rw’iminsi ibiri Minisitiri w’Ububanyi n’Amahanga n’Ubutwererane Dr. Biruta Vincent yagiriye muri Brazil guhera ku wa Kane tariki ya 5 Ukwakira 2023.

Leta y’u Rwanda ivuga ko ari rwo ruzinduko rwa mbere rw’abayobozi bo ku rwego rwo hejuru rubaye hagati y’ibihugu byombi, aho Dr. Biruta yakiranywe urugwiro i Brasilia mu Murwa Mukuru w’icyo Gihugu.

Intego nyamukuru y’urwo ruzinduko yari iyo kurushaho kwimakaza ubutwererane no kongera ubucuruzi bukorwa hagati y’u Rwanda na Brazil.

Minisitiri Dr. Biruta yatangaje ko yagiranye ibiganiro byiza bitanga umusaruro, n’abayobozi bakuru muri Guverinoma ya Brazil barimo Minisitiri w’Ububanyi n’Amahanga wa Brazil, Ambasaderi Mauro Viera.

Abo bayobozi bombi ni na bo bashyize umukono kuri ayo masezerano yaraye asinywe.

Mu biganiro yagiranye na mugenzi we, Minisitiri Dr. Biruta Vincent yashimangiye ko hari amahirwe akomeye y’ubutwererane mu nzego ibihugu bihurijeho inyungu nk’ubuhinzi, ishoramari na serivisi z’indege.

Dr. Biruta yagize ati: “Twanemeranyije ko intumwa z’abacuruzi bo mu Rwanda bazasura Brazil mu bihe biri imbere. Uru ruzinduko ruje nk’intambwe y’ingenzi mu kurushaho kwimakaza umubano dufitanye mu bukungu no kurushaho kwagura ubwumvikane burangwa hagati y’ibihugu byacu byombi.

Ku birebana n’ubutwererane mpuzamahanga, Minisitiri Dr. Biruta yifatanyije mu munezero na Brazil yahawe kuyobora Akanama k’Umuryango w’Abibumbye gashinzwe Umutekano ku Isi mu kwezi k’Ukwakira.

Abayobozi bombi banaboneyeho kungurana ibitekerezo ku bibazo by’amahoro n’umutekano muke by’umwihariko mu Karere k’Ibiyaga Bigari.

Abo bayobozi bombi kandi bagaragaje ko hakwiye guhuzwa imbaraga mu gukemura imbogamizi ku mutekano, no kuba hakenewe ubufatanye mu kwimakaza amahoro n’uburumbuke muri ako Karere.

Banagarutse ku kibazo gikomeye cy’imihindagurikire y’ibihe n’uburyo ikomeje kugira ingaruka ziremereye ku batuye Isi. Ibihugu byombi byagaragaje ko bihangayikishijwe n’ingaruka z’imihindagurikire y’ibihe mu bice biherereyemo, byiyemeza ko bitazatezuka mu guhangana n’izo ngorane binyuze mu bufatanye buhamye.

Umubano w’u Rwanda na Brazil si uw’uyu munsi kuko byatangije ubutwererane mu bya dipolomasi mu mwaka wa 1981.

Mu myaka mike ishize, ni bwo ibihugu byombi byagaragaje ubushake bwo gusuzumira hamwe uburyo bwo kurushaho kubyaza umusaruro uwo mubano umaze imyaka 42 no kongerera imbaraga ubutwererane mu nzego zitandukanye.

  • Imvaho Nshya
  • Ukwakira 6, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE