U Rwanda mu bihugu 7 bigiye guhahirana mu Isoko Rusange ry’Afurika

  • Imvaho Nshya
  • Nyakanga 26, 2022
  • Hashize imyaka 2
Image

U Rwanda rwatoranyijwe mu bihugu birindwi bigiye gutangirizwamo umushinga w’intangarugero w’ubucuruzi bukorerwa imbere ku mugabane binyuze muri gahunda y’Isoko Rusange ry’Afurika (AfCFTA) yatangijwe ku mugaragaro mu ntangiriro z’umwaka wa 2021.

Ibindi bihugu byemejwe gukorana n’u Rwanda ni Ghana, Kenya, Cameroon, Tanzania, Mauritius na Misiri (Egypt), nk’uko byatangarijwe mu Nama y’Abaminisitiri bagize itsinda ryo guteza imbere AfCFTA yabereye i Accra muri Ghana ku wa Mbere taliki ya 25 Nyakanga 2022.

Ubunyamabanga bwa AfCFTA bwatangaje ko hagiyegutangizwa icyiciro cya mbere cy’ubucuruzi bushingiye kuri Isoko Rusange ry’Afurika hagamijwe kurushaho kunoza ikirere, amategeko n’ubucuruzi bukorwa hagati y’ibihugu byo ku mugabane.

Ibihugu birindwi byahereweho byatoranyijwe muri 36 byari byatanze ubusabe bwo gutangirizwamo iyo gahunda y’intangarugero, aho buri gihugu cyari cyatangaje ibiciro bya za gasutamo muri gahunda nshya.

Gahunda nshya yatangijwe yitezweho gutanga ubutumwa ku bihugu bitaratangaza gahunda y’ibiciro by’agateganyo bya za gasutamo bijyanye n’amabwiriza yashyiriweho koroshya ubuhahirane mu Isoko Rusange ry’Afurika.

Muri iyo gahunda hazarebwa ibigo by’ubucuruzi, ibicuruzwa, gahunda za gasutamo, n’ibyangombwa byose bisabwa kugira ngo Isoko Rusange rirusheho gutanga umusaruro ku Mugabane wose.

Umuyobozi Mukuru ushinzwe Ubucuruzi n’Ishoramari muri Minisiteri y’Ubucuruzi n’Inganda (MINICOM) Antoine Kajangwe, yavuze ko ubu abacuruzi bo mu Rwanda bagiye kugera ku masoko yo muri Afurika yo hagati n’iy’Iburengerazuba badahenzwe.

Yagize ati: “Uko iminsi ihita ni ko ibyo u Rwanda rwohereza mu bihugu by’Afurika bizarushaho kwiyongera, bishyigikire iterambere ry’inganda, byongere imirimo itanga umusaruro, kandi biyobore impinduka z’ubukungu bw’u Rwanda. “

Ibihugu byo mu Burengerazuba bw’Afurika birimo Ghana, Senegal, Nigeria, Chad na Benin byamaze kugaragara nk’ibitanga amahirwe ku bucuruzi bw’abikorera mu Rwanda, by’umwihariko abongerera agaciro umusaruo w’ubuhinzi, abafite inganda n’abatuganya ibikoresho by’ubwubatsi.

Kajangwe yemeje ko bimwe mu bicuruzwa by’ingenzi bifite isoko rinini mu bihugu byo mu Burengerazuba bw’Afurika ari imiti yica udukoko twangiza imyaka, telefoni, amabati, ibyo kurya byongerewe agaciro nk’ifu, amata, foromaje, imbuto, imboga n’ibindi.

Yakomeje agira ati: “Tuzakorana n’Urwego rw’Abikorera mu gushishikariza abakora mu rwego rw’ubukungu batandukanye kubyaza umusaruro iyo gahunda y’ubucuruzi bukorwa n’Abanyafurika mu nyungu z’Afurika.”

Isoko Rusange ry’Afurika ryitezweho kuba isoko rya mbere rigari ku Isi kuko rizaba rihuje abakabakaba miliyari 1.3.  Biteganyijwe ko hejuru ya 90% by’ibiciro bya gasutamo bizakurwaho by’umwihariko ku bicuruzwa byasonewe mu 2021, kandi hari gahunda iteganya kuzakomeza kugabanya ibiciro mu gihe cy’imyaka 10 iri imbere.

Bivugwa kandi ko karindwi ku ijana ry’ibicuruzwa ryasonewe imisoro mu gihe cy’imyaka 15 mu gihe 3% ari byo bitigeze bikurirwaho imisoro.  Kajangwe yabwiye The New Times ko u Rwanda rwamaze kuzuza ibisabwa ari na yo mpamvu rwemejwe n’ubunyamabanga bwa AfCFTA.

Komisiyo y’Ubukungu muri Afurika (ECA) iheruka gutangiza gahunda (AfCFTA Country Business Index/ACBI) yo kugenzura uburyo ibihugu by’Afurika byoroshya ubucuruzi n’ishoramari hagati yabyo.

Iyo gahunda ni na yo izagenzura umusaruro wa AfCFTA ku rwego rw’abikorera bo ku mugabane n’ubushobozi bafite mu guhahirana no gushora imari mu bice bitandukanye by’Afurika igihe hazaba hatangiye gahunda yo gufungura imipaka hagati y’ibihugu.

Kugeza ubu ibihugu 43 muri 54 ni byo bimaze kwemeza amasezerano ashyiraho Isoko Rusange ry’Afurika.

  • Imvaho Nshya
  • Nyakanga 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE