U Bwongereza: Bafunzwe bazira kwica umwana w’amezi 18

Umugore witwa Sian Hedges ndetse n’umukunzi we bakatiwe igifungo cya burundu bazira kwica umwana w’amezi 18.

Kuri uyu wa Gatanu ubushinjacyaha bwashinje Sian Hedges w’imyaka 27 n’umusore bakundanaga Jack Benham w’imyaka 35, kwica urw’agashinyaguro umwana muto bakamutera ibikomere bitabarika ku mubiri we, kumuvuna imbavu, amaboko ndetse n’amaguru.

The Independent yatangaje ko Hedges na Benham, bose bahakanye ibyo kugirira nabi uyu mwana witwa Alfie Sam Phillips.

Mu magambo ya se wa Alfie yavuze ko ataramenya ukuri nyako ku byabaye ku muhungu we. Mu magambo ye yavuze ko yambuwe amahirwe yo kubana n’umwana we ndetse atigeze aganira nawe cyangwa nibura ngo amubone akura.

Se wa Alfie, yasobanuye ko umwana we yari ‘mwiza nka zahabu’ ko ari ‘muzima’, ko yahoraga akina kandi aseka.

Alfie yishwe mu ijoro ryo ku wa 28 Ugushyingo 2020, aho bivugwa ko aba bagize uruhare mu rupfu rwe bari banyoye ibiyobyabwenge birimo kokayine na wisiki.