U Buyapani bugiye kuzana ikoranabuhanga rinoza taransiporo muri Kigali  

  • Imvaho Nshya
  • Ukwakira 6, 2023
  • Hashize amezi 8
Image

U Rwanda n’ u Buyapani byasinye amasezerano yo gushyiraho uburyo bushya bwo kugenzura ubwikorezi hagamijwe kugabanya umuvundo w’imodoka no kunoza ingendo mu Mujyi wa Kigali.

Ku ya 5 Ukwakira, ni bwo Minisitiri w’Imari n’Igenamigambi Uzziel Ndagijimana, Ambasaderi w’u Buyapani mu Rwanda Isao Fukushima, na Minako Shiotsuka uhagarariye Ikigo cy’Abayapani gishinzwe Iterambere Mpuzamahanga (JICA), basinye amasezerano y’inkunga ifite  agaciro ka miliyoni 14.6 z’amadolari y’Amerika.

Uyu mushinga wiswe “Intelligent Transport System”, witezweho guteza imbere urujya n’uruza rw’abantu, ufashe mu buryo bwo kugenzura ibinyabiziga, kureba no kunoza ibimenyetso bikoreshwa mu masangano y’imihanda mu Mujyi wa Kigali ku bufatanye na Polisi y’u Rwanda ishami rishinzwe umutekano wo mu muhanda.

Uyu mushinga uje mu gihe Kigali iri mu ngamba zo gukemura ibibazo bikigaragara mu rwego rw’ubwikorezi harimo ubwinshi bw’imodoka ziteza akajagari (ambouteillage) cyane mu masaha y’akazi aho bigira ingaruka ku bakora ubwikorezi rusange  n’abikorera.

Iri koranabuhanga rizajya rikoresha utwumvirizo (sensors) dutanga amakuru ari mu muhanda, icyerekezo cy’umuhanda imodoka zinyuramo, umuvuduko imodoka ziri kugenderaho n’ibindi, kuri mudasobwa zizashyirwa mu cyumba cy’ikoranabuhanga kizaba kiri ahakorera Umujyi wa Kigali.

Ni amakuru azajya agenzurirwa muri icyo cyumba cyihariye mu Mujyi wa Kigali yoherezwe mu Ishami rya Polisi rishinzwe Umutekano wo mu muhanda, iyakoreshe mu gufata ibyemezo bituma umuvundo ugabanyuka.

Nk’uko abayobozi babitangaza, uyu mushinga uzakoresha Moderato, ikoranabuhanga ry’u Buyapani ririmo gushyira amatara yerekana ibimenyetso ku masangano y’imihanda 20 yatoranyijwe mu Mujyi wa Kigali, hamwe n’ibyuma by’umuhanda bihuza umuyoboro wa fibre.

Aya masangano kandi azashyirwamo amatara ayobora ibinyabiziga afite ubushobozi bwo gukorana n’andi ari hirya no hino, aho imodoka zihabwa uburenganzira bwo kugenda hagendewe ku hari akajagari k’imodoka.

Minisitiri w’Imari n’Igenamigambi Ndagijimana Uzziel, yavuze ko iri koranabuhanga rizongera umutekano wo mu muhanda.

Yagize ati: “Ikoranabuhanga rigenzura taransiporo (Intelligent transport System) rizahindura byinshi mu rwego rwo kugabanya umuvuduko ukabije hongerwa umutekano, koroshya ingendo, no gukora neza ubwikorezi  muri Kigali. Sisitemu yo gutwara abantu neza kandi irambye ni ingenzi mu kwihutisha ubucuruzi no kuzamura ubukungu.”

Umuyobozi w’Umujyi wa Kigali Pudence Rubingisa, yavuze ko izi ari imbaraga zigamije kugera ku ntego zo guhindura Umujyi hakoreshejwe ibisubizo by’ikoranabuhanga ngo byoroshye imibereho n’ubwikorezi muri Kigali.

Yongeyeho ati: “Mu mujyi wa Kigali hari itsinda ryabugenewe rishinzwe umushinga kandi rimaze gukora ubushakashatsi bw’ibanze ku bufatanye na JICA kugira ngo uyu mushinga ushyirwe mu bikorwa ku gihe.”

Uhagarariyre Ikigo cy’u Buyapani Gishinzwe Ubutwererane Mpuzamahanga (JICA) Minako Shiotsuka, yavuze kandi ko uyu mushinga uzatanga ibisubizo birambye,  uteze imbere  ubufatanye  no kongerera abantu imbaraga.

Ati: “Ibibazo by’umujyi ntibishobora gukemurwa n’umushinga umwe. Twiyemeje gushyiraho ubufatanye hagati y’abafatanyabikorwa mu gutwara abantu mu mijyi”.

Biteganyijwe ko imirimo izatangira muri Kamena 2024, uwo mushinga ukazarangira mu Kuboza 2026.

U Buyapani bukomeje kongera inkunga butera Guverinoma y’u Rwanda binyuze muri JICA, cyane cyane binyuze mu biteza imbere ibikorwa remezo.

KAMALIZA AGNES

  • Imvaho Nshya
  • Ukwakira 6, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE