U Buyapani: Abarokotse umutingito barahabwa ubufasha bwihuse

  • KAMALIZA AGNES
  • Mutarama 2, 2024
  • Hashize amezi 5
Image

Nyuma y’uko umutingito ukomeye wibasiye u Buyapani kuri uyu 01 Mutarama 2024 ugahitana ubuzima bw’abantu 48, abawurokotse barimo guhabwa ubutabazi bw’ibanze.

Kuri uyu wa Kabiri amatsinda atandukanye y’ubutabazi yihutiye kugera mu Turere twibasiwe n’umutingito ndetse n’utwo byegeranye, aho inyubako zasenyutse, imihanda ikangirika ndetse n’ibikorwa by’amashanyarazi bikangirika.

Uwo mutingito wari ufite ubukana bwa 7.6 wabaye ku gicamunsi cyo ku wa Mbere, igihe mu bice bitandukanye by’Isi barimo kwizihiza Umunsi Mukuru w’Ubunani.

Ni umutingito wibasiye Perefegitura ya Ishikawa mu Buyapani rwagati.

Kuri uyu  wa Kabiri kandi, Minisitiri w’Intebe Fumio Kishida yavuze ko bakomeje gushakisha no gutabara abagizweho ingaruka n’umutingito.

Abayobozi bemeje ko hapfuye abantu 48, bose bo muri Perefegitura ya Ishikawa, ukaba ari wo mutingito uhitanye abantu benshi mu Buyapani kuva mu mwaka wa 2016.

Muri iyo myaka igera ku munani ishize bwo umutingito wari ufite ubukana bwa  7.3 wibasiye i Kumamoto ku kirwa cyo mu majyepfo y’u Buyapani, uhitana abarenga 220.

Guverinoma y’u Buyapani yategetse ko abagera ku 100 000 bimuka bakava mu ngo zabo mu ijoro ryo ku wa Mbere, ibohereza mu nzu y’imikino n’imyitozo ngororamubiri y’ishuri, ikunze gukoreshwa nk’ikigo cy’impunzi mu bihe by’ibiza.

  • KAMALIZA AGNES
  • Mutarama 2, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE