U Bushinwa bwemeye buruse z’abanyeshuri 100 b’abahanga mu Rwanda

  • Imvaho Nshya
  • Ugushyingo 3, 2023
  • Hashize amezi 7
Image

Ambasade ya Repubulika y’Abaturage y’u Bushinwa mu Rwanda n’Umuryango Imbuto Foundation byasinyanye amasezerano yo gutanga buruse ku banyeshuri 100 batsinze kurusha abandi mu mashuri yisumbuye baturuka mu miryango itishoboye.

Ayo masezerano yashyiriweho umukono i Kigali, ku wa Kane tariki ya 2 Ugushyingo 2023, bikaba biteganyijwe ko iyo nkunga y’Ambasade y’u Bushinwa ifite agaciro kugeza mu mpera z’umwaka w’amashuri wa 2023-2024.

Ni mu gihe Ambasade y’u Bushiinwa imaze imyaka 10 nanone itanga izo buruse ku bana 100 buri mwaka, binyuze muri gahunda ya Edified Generation.

Muri uyu mwaka, biteganyijwe ko buri munyeshuri watoranyijwe azahabwa buruse y’amadolari y’Amerika 400 buri mwaka amwishyurira ibimutunga n’ibijyanye n’indi mibereho mu mashuri y’icyitegererezo, ibikoresho by’ishuri akeneye, igiciro cy’ibyo akenera mu ngando zo mu biruhuko n’ibindi by’ibanze akenera.

Madamu Lin Hang, Umuyobozi ushinzwe Ubutwererane (Chargé d’affaires) muri Ambasade y’u Bushinwa mu Rwanda, n’Umuyobozi w’Agateganyo wa Imbuto Foundation Jackson Vugayabagabo, bashimye ubutwererane bw’inzego zombi ndetse baniyemeza gukomeza guhanga amahirwe menshi ahabwa abagenerwabikorwa b’iyo gahunda.

Ubuterankunga ni igice cy’ingenzi muri gahunda ya Edified Generation ishyirwa mu bikorwa na Imbuto Foundation guhera mu mwaka wa 2002, aho abana b’abahanga mu ishuri baturuka mu miryango itishoboye bahabwa buruse n’inkunga yo gukomeza amasomo nta mbogamizi z’ubushobozi bagifite.

Kuri ubu iyo gahunda iratera inkunga abanyeshuri 787 biga mu bigo by’amashuri yisumbuye bitandukanye mu Gihugu hose, nk’icyizere cyo kurushaho guteza imbere abanyeshuri no kubatera umwete.

Abo banyeshuri bafashwa muri gahunda ya Edified Generation bajya bahurira mu mahuriro ya buri mwaka aho barahurira ubumenyi bushya mu gihe cy’ibiruhuko.

Ibyo byose bikorwa mu rwego rwo kurushaho kubongerera ubumenyi n’ubushobozi hagamijwe kubategurira kugira uruhare mu iterambere ry’Igihugu.

  • Imvaho Nshya
  • Ugushyingo 3, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE