Twahisemo kuba umwe, twubaka u Rwanda rudaheza- Jeannette Kagame

  • Imvaho Nshya
  • Ukwakira 29, 2023
  • Hashize amezi 7
Image

“Twese intero ibe imwe: kureba kure twiyubakira ubumwe bwacu. Si ubwa none, bwahozeho kuva kera. Dusenyere umugozi umwe, abato n’abakuru twifurizanye ibyiza, tubumbatire isano muzi yacu ituranga, twirinde uwatuyobya, twegere abatabyumva turindane muri urwo rugendo, twimakaze ibyiza bitubereye. Ngiryo ibanga rya Ndi Umunyarwanda.”

Ubwo ni ubutumwa bukubiye mu ijambo Madamu Jeannette Kagame yagejeje ku bagera kuri 400 bitabiriye Ihuriro ngarukamwaka rya 16 rya Unity Club Intwararumuri, riteraniye i Kigali kuri iki Cyumweru tariki ya 29 Ukwakira 2023.

Abitabiriye iryo Huriro barimo abanyamuryango ba Unity Club Intwararumuri, Abarinzi b’Igihango, urubyiruko, abayobozi mu Nzego nkuru z’Igihugu, abo mu Nzego z’ibanze, abayobozi b’amadini n’amatorero n’abahagarariye Sosiyete Sivile.

Madamu Jeannette Kagame, nk’Umuyobozi Mukuru wa Unity Club Intwararumuri, yatangiye aha ikaze abitabiriye iryo Huriro rigaruka ku nsanganyamatsiko igira iti: “Ndi Umunyarwanda Igitekerezo Ngenga cy’ukubaho kwacu.”

Yavuze ko kumva agaciro k’iyo nsanganyamatsiko bisaba gusubiza amaso inyuma no kureba ibyubatswe mu myaka hafi 30 u Rwanda rumaze rwibohoye.

Aho ni ho yahereye avuga ko muri iyo myaka ishize Abanyarwanda bahisemo kuba umwe no kunezezwa n’ibimaze kugerwaho mu rugendo rw’ubumwe n’ubudaheranwa bw’Abanyarwanda.

Yagize ati: “Twahisemo kuba umwe, icyo twiyemeje ni u Rwanda rudaheza, ni u Rwanda rw’abunze ubumwe barukunda, barukorera, bakarukundira kandi bakanarurinda.”

Yavuze ko kugira ngo Abanyarwanda badahera mu icuraburindi byaharaniwe bigatwara n’ikiguzi kitabonerwa agaciro, bityo bikaba bikwiye kubera buri wese isomo ry’ubuzima n’umusingi uhoraho w’ubumwe bw’Abanyarwanda.

Yavuze ko “Ndi Umunyarwanda” ari inshingano n’uburenganzira, ari na yo mpamvu ikwiye kuba intero n’inyikirizo muri byose, ikava mu mvugo gusa ahubwo ikaranga Abanyarwanda kugeza no mu tunyangingo ndangasano (DNA) kugira ngo n’ababakomokaho bazakure bafite indangagaciro na kirazira nk’isano muzi ibaranga.

Yakomeje agira ati: “Unity Club yiyemeje gukomeza gutanga umusanzu wo kurebera hamwe n’izindi nzego uko gahunda ya Ndi Umunyarwanda yagezwa ku Banyarwanda bose aho bari hose.”

Yishimira amahirwe yo kuba mu bihe bikomeye byose u Rwanda rwanyuzemo rwarabonye abarubera mu njishi ya Ndi Umunyarwanda bakarurinda kuzima kandi rwarabyaye Intwari.

Ni muri urwo rwego guhera mu mwaka wa 2015, Unity Club Intwararumuri yatangiye gahunda yo gushimira abo bafite ibikorwa by’indashyikirwa byabaranze cyangwa bibaranga mu kwimakaza ubumwe bw’Abanyarwanda.

Ati: “Nagira ngo dufate umwanya dushimira Abarinzi b’Igihango ducyeza muri iri Huriro, abariho n’abatariho.”

Umurage ku rubyiruko

Madamu Jeannette Kagame yibukije ababyeyi, abanyamuryango ba Unity Club Intwararumuri n’abayobozi mu nzego zitandukanye, umukoro ukomeye ariko ushoboka bafite wo kuraga abana ibyiza bibumbatiye ubumwe.

Yababwiye ko batabaye maso Igihugu gishobora kongera gusubira mu icuraburindi cyigeze kunyuramo, aboneraho no guhanura urubyiruko arwibutsa ko ari rwo mizero y’u Rwanda rw’ejo hazaza.

Yagize ati: “Ntidukwiye gutsindwa n’ingeso mbi. Izo twavugamo ikimenyane, gushaka indonke, munyangire, gutonesha, n’ibindi byatuma duteshuka ku gitekerezo ngenga cyacu, Ndi Umunyarwanda. Tutabaye maso bishobora kudusubiza mu icuraburindi u Rwanda rwigeze kubamo”.

Yakomeje agira ati: “Rubyiruko bana bacu, ni mwe Igihugu gitezeho imbaraga n’ubushobozi buzasigasira uwo musingi twubatse. Mwiteguye mute kwakira iyo nkoni y’abarinzi ba Ndi Umunyarwanda? Turabasaba gukunda Igihugu mukarangwa n’Ikinyabupfura, mukaba intangarugero ndetse mukagira imyitwarire ikwiye, ari byo bizatuma mugira icyerekezo gihamye kandi gifite intego iganisha ku iterambere rirambye ry’Igihugu cyacu.”

Madamu Jeannette Kagame yasabye n’abakuru kudatezuka mu guharanira kumenya gushishoza, kugenzura icyashaka guhungabanya ubumwe bw’Abanyarwanda bakagikumira hakiri kare. Ati: “Ubunyarwanda ni u Rwanda, ni bikuru kuri twe twese.”

Yavuze ko nubwo kuba Intwararumuri ari umuhamagaro bihitiyemo nk’abanyamuryango ba Unity Club, buri Munyarwanda wese aho ari hose akwiye kwitaba uwo muhamagaro maze urumuri rukarushaho kugera kuri bose.

Minisitiri w’Ubumwe bw’Abanyarwanda n’Inshingano Mboneragihugu Dr. Bizimana Jean Damascene, yavuze ko amahitamo y’Abanyarwanda ari yo yabaye ihame shingiro Abanyarwanda biyemeje kugenderaho mu kongera kubaka Igihugu.

Ibyo bikubiye mu ngingo ya 9 y’Itegeko Nshinga rya Repubulika y’u Rwanda, umurongo wa kabiri, ivuga ko Leta y’u Rwanda yiyemeje kuramdurana n’imizi amacakubiri ashingiye ku bwoko, Akarere n’ibindi no gushyira imbere ubumwe bw’Abanyarwanda.

NTAWITONDA JEAN CLAUDE

  • Imvaho Nshya
  • Ukwakira 29, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE