Turikiya yahagaritse amarushanwa ya ruhago kubera umusifuzi wakubiswe

  • SHEMA IVAN
  • Ukuboza 12, 2023
  • Hashize amezi 5
Image

Ubuyobozi bw’umupira w’amaguru muri Turikiya bwafashe icyemezo cyo guhagarika shampiyona zose nyuma y’uko umusifuzi yatewe igipfunsi na perezida w’ikipe, akagwa hasi mu mukino w’icyiciro cya mbere wabaye ku wa Mbere tariki ya 11 Ukuboza 2023.

Umusifuzi Halil Umut Meler yakubiswe na Perezida wa MKE Ankaragucu, Faruk Koca, wirukankiye mu kibuga ubwo ikipe ye yari imaze gutsindwa igitego cyo kwishyura ku munota wa 97, bikaba 1-1 mu mukino wa Shampiyona, Super Lig, bahuragamo na Caykur Rizespor.

Nyuma y’ibi, Perezida w’Ishyirahamwe rya ruhago muri Turikiya (TFF), Mehmet Buyukeksi, yabwiye abanyamakuru ko “amarushanwa yose ahagaritswe mu gihe kitazwi.”

Yakomeje agira ati: “Ibyabaye ni ijoro ry’igisebo ku mupira w’amaguru muri Turikiya.”

Ibi byakurikiwe n’imvururu zagaragayemo abakinnyi n’abayobozi b’ikipe.

Minisitiri w’Umutekano muri Turikiya, Ali Yerlikaya, yavuze ko “Faruk Koca yahawe ubuvuzi ku bitaro, ibijyanye no gufungwa birakurikiraho nyuma yo kwitabwaho.”

Yerlikaya yongeyeho ko abandi bantu batawe muri yombi kubera uruhare bagize mu byabaye, yashimangiye ko “bidakwiye.”

Halil Umut Meler w’imyaka 37, ni umwe mu basifuzi bakomeye muri Turikiya ndetse asifura imikino mpuzamahanga yemewe na FIFA. Ari kandi mu basifuzi bakuru ba UEFA.

Umuganga wamwitayeho, Dr Mehmet Yorubulut, yavuze ko “nta gikomeye cyamubayeho. Yavaga amaraso hafi y’ijisho, yagize gucika kw’igufwa kudakabije. Twamusezerera nyuma y’ibizamini tuzakora mu gitondo”.

Perezida wa Turikiya, Recep Tayyip Erdoğan, na we yavuze ku byabaye, anenga “ibyakorewe umusifuzi Halil Umut Meler mu mukino wa MKE Ankaraguc na Çaykur Rizespor”, amwifuriza gukira vuba.

Yakomeje agira ati: “Siporo isobanuye amahoro n’ubuvandimwe. Siporo ihabanye n’ubugizi bwa nabi. Ntituzemera ko ihohoterwa rigira umwanya muri siporo ya Turikiya.”

Ikipe ya MKE Ankaragucu yatangaje ko yababajwe n’ibyakozwe na perezida wayo, iti: “Tubabajwe cyane n’ibyabaye uyu mugoroba. Turisegura ku bakunzi ba ruhago ya Turikiya n’umuryango wa siporo muri rusange ku byabaye nyuma y’umukino wa Caykur Rizespor kuri Eryaman Stadium.”

Meler yakubiswe kandi n’abandi bantu ubwo yari aryamye hasi mu kibuga, byamuviriyemo kuvunika bidakabije.

  • SHEMA IVAN
  • Ukuboza 12, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE