Turifuza u Rwanda rutarimo amacakubiri – Andy Bumuntu

  • Imvaho Nshya
  • Ugushyingo 2, 2023
  • Hashize amezi 4
Image

Kayigi Andy Dick Fred uzwi nka Andy Bumuntu uri mu bahanzi bakunzwe mu Rwanda kubera ijwi rihebuje afite, yagaragaje u Rwanda urubyiruko rwifuza ndetse n’icyo ababyeyi bakora kugira ngo rukomere ku ndangagaciro z’u Rwanda.

Aherutse kubigarukaho mu gitaramo cyahuriyemo Abanyamuryango ba Unity Club Intwararumuri ndetse n’abandi bitabiriye Ihuriro rya 16 ry’uyu Muryango.

Yagize ati “Turifuza u Rwanda rutarimo amacakubiri. Amacakubiri yatugejeje ku mahano, turifuza u Rwanda rutarimo amacakubiri yaba mu kazi, mu muryango no mu byo ukora byose nk’umunyarwanda udakeneye gusobanura ngo njyewe ndi uwo kwa kanaka cyangwa ukaba ufite ipfunwe ry’aho uturuka, ukaba uri Umunyarwanda iyo ndi Umunyarwanda akaba ari yo ndangamuntu duhorana kandi twese dusangiye”.

Yavuze ko hari ibihugu bizwi aho ugira icyo ubona ntukirengane metero ukaba ushobora kwibwa cyangwa ukagirirwa nabi. Aha ni ho ahera avuga ko umutekano na wo uri mu byo bifuza.

Ati: “Umutekano ni ikintu cy’ingirakamaro cyane, navuga ko kiri mu byo twifuza kuko kirakorwa ariko kigumeho. U Rwanda twifuza mu myaka iri imbere ni urutekanye nkuko rutekanye cyangwa se no kurushaho.

U Rwanda rwacu rukomeje kugirana umubano mwiza n’amahanga aho uyu munsi iyo uri Umunyarwanda mu bihugu bimwe na bimwe, pasiporo nyarwanda iguhitisha ahantu abandi batari guca”.

Akomeza avuga ko uwo mubano mwiza n’ibindi bihugu, ufasha abantu bose yaba urubyiruko ndetse n’Abanyarwanda muri rusange.

Iyo u Rwanda rufunguye amarembo ubucuruzi bw’abanyamahanga butanga akazi ku rubyiruko.

Ati “Ni ikintu cyiza, u Rwanda rugaba amarembo nta kibiruta”.

Andy Bumuntu yagaragaje ko Jenoside yakorewe Abatutsi yatatanyije Abanyarwanda bituma buri wese agenda azana imico y’aho yabaye.

Ati “Za ndangagaciro za Kinyarwanda ni ngombwa ko twongera kuziyibutsa tukongera kuzikoresha, urwo ni rwo Rwanda twifuza”.

Yasabye urubyiruko kutiyima amahirwe kuko mu Rwanda abantu bose bayanganya, anarusaba kutirara no kutarangarira imbuga nkoranyambaga. Urubyiruko ngo rukwiye kumenya ingaruka imbuga nkoranyambaga zirusigira.

Asaba ababyeyi kuba inshuti n’abana babo no kubaha umwanya. Ku rundi ruhande, Andy asaba Leta gushakira urubyiruko ibituma ruhuga kuko ngo ijisho ridahuze rireba ibidafite umumaro.

Andy Bumuntu yize ibijyanye n’amashanyarazi, yatangiye umuziki mu 2009. Yanabaye kandi umwe mu babyinnyi bakomeye mu Itorero Mashirika ndetse yariherekeje mu bitaramo ryatumiwemo mu bihugu bitandukanye.

Yakunzwe mu ndirimbo zirimo ‘Ndashaje’ iri mu zo yahereyeho yanatumye amenyekana.

‘On fire’, ‘Valentine’, ‘KK 509 St’, ‘Umugisha’, ‘Appreciate’ n’izindi zitandukanye na zo zatumye uyu muhanzi yubaka izina mu Rwanda no hanze yarwo.

KAYITARE JEAN PAUL

  • Imvaho Nshya
  • Ugushyingo 2, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE