Tugomba guhindura ibivugwa ko Afurika yuzuye ingorane- Perezida Kagame

  • NTAWITONDA JEAN CLAUDE
  • Mutarama 17, 2024
  • Hashize amezi 2
Image

Mu gihe hari inkuru zimaze imyaka myinshi zivugwa mu Burengerazuba bw’Isi ko Afurika ari umugabane w’ibibazo, ushobora guteza akaga abawusura cyangwa abaza kuwukoreramo, Isoko Rusange ry’Afurika (AfCFTA) ribonwa nk’urufunguzo rwo guhindura amateka.

Perezida wa Repubulika Paul Kagame yavuze ko igihe kigeze ngo Abanyafurika bahindure ayo mateka n’izo nkuru mbi zituma abenshi babona Afurika muri iyo shusho kandi ari wo mugabane ufite imitungo n’amahirwe menshi kurusha ahandi ku Isi.

Umukuru w’Igihugu yabikomojeho mu butumwa yagejeje ku bitabiriye ibiganiro byahuje “Inshuti z’Isoko Rusange ry’Afurika” byabereye mu Nama ngarukamwaka y’Ihuriro Mpuzamahanga ry’Ubukungu (WEF) irimo kubera i Davos mu Busuwisi.

Ibyo biganiro byari bifite insanganyamatsiko igira iti: “Kuyobora Ibikorwa binyuze mu Isoko Rusange ry’Afurika”, byagarutse ku bufatanye bw’abikorera n’inzego za Leta mu kwihutisha ishyirwa mu bikorwa ry’iri soko rihuriyemo abaturage barenga miliyari 1.3.

Byayobowe na Perezida wa WEF Børge Brende, bikaba byitabiriwe n’Abakuru b’Ibihugu na Guverinoma barimo Perezida wa Ghana Nana Akufo-Addo, Minisitiri w’Intebe wa Tunisia Ahmed Hachani, Ministiri w’Intebe wungirije wa Ethiopia Demeke Mekonnen, Umunyamabanga Mukuru wa AfCFTA Wamkele Mene, n’abikorera batandukanye.

Perezida Kagame yatangiye avuga ku kamaro k’ubufatanye hagati y’Ubunyamabanga bwa AfCFTA n’ubuyobozi bwa WEF hagamijwe kwihutisha ishyirwa mu bikorwa ry’iri soko.

Ashimangira ko nta bundi buryo bwo kwihutisha gahunda z’ingenzi za AfCFTA bwaruta guhuza ubufatanye bw’abikorera n’inzego za Leta. 

Aho ni ho yahereye agira ati: “Twiteze kubona abikorera benshi, n’ibikorwa by’urwego rw’abikorera. Icyo navuze ni uko ari iby’agaciro kuko bifasha guhindura amateka, kandi dukwiye guhindura inkuru zivuga ko Afurika ari umugabane wuzuye ingorane. Ntekereza ko ishusho yuzuye n’igisobanuro kizima bizava muri ibi biganiro.”

Perezida Kagame yakomeje agaruka ku ntambwe imaze guterwa binyuze mu bufatanye bw’ibihugu n’abikorera, harimo no gutegura igenamigambi ry’ishyirwa mu bikorwa rya AfCFTA.

Muri iyo gahunda y’ibikorwa hagarukwa ku ikoranabuhanga, ubuhinzi n’ubworozi no kongerera agaciro umusaruro, gukorera imiti n’inkingo ku mugabane, ubwikorezi bw’abantu n’ibintu, ishoramari, ubukerarugendo na serivisi z’imari.

Perezida Kagame yasabye uruhare rwa buri wese kugira ngo izo nzego z’ingenzi z’ibikorwa zigerweho, batirengagije n’izindi nzego zoroshya ishyirwa mu bikorwa uhereye ku kugenderana.

Yagize ati: “Urugero nko mu nzego zo guharanira ko Abanyafurika bagenderana nta kirogoya, bambuka imipaka bagakora ibyo bakwiriye kuba bakora. Birababaje kuba Politiki zikibangamira ibikorwa by’ingenzi cyane nk’ibi. Dukwiye gutanga umusanzu wacu mu guharanira ko atari ko bigenda.”

Yashimangiye ko inyungu kuri buri wese ari intsinzi mu gihe Isoko Rusange ry’Afurika rizaba rishyizwe mu bikorwa uko bikwiye kandi rikihutishwa. 

U Rwanda rugeze kure rutanga umusanzu warwo

Perezida Kagame yashimangiye ko u Rwanda rukomeje gukora ibishoboka byose mu gutanga umusanzu warwo, mu guharanira ko Abanyafurika baza mu Rwanda nta nkomyi, mu kunoza serivisi z’ikoranabuhanga, mu guteza imbere ubukerarugendo n’izindi nzego z’ingenzi zihanzwe amaso muri AfCFTA.

Yavuze ko umunyamahanga wese uje mu Rwanda abona Viza akihagera, kandi Abanyafurika bose bo nta viza babanza gusaba, uretse abantu bamwe na bamwe baba bafite ibibazo byihariye na byo bikemurwa by’umwihariko.

Ati: “Turimo gukora ku nzego zose z’ingenzi mu bucuruzi, ariko reka mvuge ku rwego rwo gukora imiti. Vuba aha twatangije ubufatanye na BionTech butangira gutanga umusaruro mu minsi mike iri imbere.  Natwe turishimye, kandi ndashaka gushimira Banki Nyafurika Itsura Amayambere (AfDB) yatangije Umuryango wimakaza ikoranabuhanga mu gukora imiti (APTF), ufite icyicaro i Kigali.”

Yavuze ko uretse urwego rwo gukora imiti, u Rwanda rukora no mu birebana no gutwara abantu n’ibintu ku bufatanye n’abafatanyabikorwa banyuranye.

Yavuze ko gukuraho viza ku Banyafurika bishingiye ku kuba u Rwanda rwifuza kubona Abanyarwanda barushaho gusabana na bagenzi babo, bagasangira ubunararibonye n’ubumenyi butandukanye kandi buri wese akaba afite ubwisanzure bwo gukorera aho ashaka ku mugabane.

Ishyirwa mu bikorwa ryuzuye ry’Isoko Rusange ry’Afurika ryitezweho kongera ubukungu bw’umugabane ku kigero cya 7%, ni ukuvuga ko buziyongeraho miliyari zisaga 450 z’amadolari y’Amerika.

Ubucuruzi bukorwa hanze y’Afurika usanga bwiganjemo ibicuruzwa nka Peteroli, amabuye y’agaciro ndetse no guhererekanya ibyuma, ndetse hakaza n’ibiribwa bimwe na bimwe bitumizwa cyangwa bikoherezwa hanze.

Ariko ubucuruzi bukozwe hagati y’ibihugu by’Afurika usanga bufite amahirwe yagutse n’ibicuruzwa byinshi bishobora gusangirwa n’Abanyafurika bose ugereranyije n’umusaruro woherezwa hanze y’umugabane.

Ubunyamabanga bwa AfCFTA n’ubwa WEF bukomeje kwagura imikoranire hagamijwe gushishikariza ibigo mpuzamahanga by’ubucuruzi gushyigikira iri soko rifungura amahirwe menshi ku mugabane no ku Isi yose.

Iryo soko riramutse rigeze ku ntego yo kongera ubucuruzi bukorwa hagati y’ibihugu by’Afurika, nta gushidikanya ko ryagira uruhare rukomeye mu kubaka impinduramatwara y’ubukungu irambye ku mugabane w’Afurika. 

Ni ryo soko rya mbere rinini ku Isi ibihugu byose by’Afurika, aho ibihugu 54 kuri 55 byamaze gushyira umukono ku masezerano arishyiraho nubwo ibimaze kuyemeza ari 44.  

  • NTAWITONDA JEAN CLAUDE
  • Mutarama 17, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE