Tshisekedi yemeye kurekura abasirikare b’u Rwanda bashimuswe na FARDC

Perezida wa Repubulika Iharanira Demokarasi ya Congo (RDC) Felix Antoine Tshisekedi Tshilombo, abisabwe na Perezida wa Angola João Manuel Gonçalves Lourenço, yemeye kurekura abasirikare ba biri bo mu Ngabo z’u Rwanda (RDF) bashimutiwe ku mupaka bari mu bikorwa byo gucunga umutekano.

Abo basirikare bashimuswe uCpl Nkundabagenzi Elysée na Pte Ntwari Gad, bivugwa ko bashimuswe n’Ingabo za RDC (FARDC) zifatanyije na bamwe mu barwanyi b’umutwe w’iterabwoba wa FDLR washinzwe n’abasize bakoze Jenoside yakorewe Abatutsi mu Rwanda.

Ishimutwa ry’abo basirikare ryaje rikurikira ibisasu byatewe ku butaka bw’u Rwanda na FARDC ifatanyije na FDLR taliki ya 23 Gicurasi 2022, banagaba igitero ku birindiro by’Ingabo z’u Rwanda biherereye ku mupaka.

Ku wa Kabiri ni bwo Perezida Tshisekedi yerekeye muri Angola mu biganiro byihariye na Perezida Lourenço, byaje bikurikira ibindi byari bimaze iminsi ibiri hagati ye na Perezida Kagame bahujwe na Perezida wa Senegal akaba n’Umuyobozi w’Umuryango w’Afurika Yunze Ubumwe (AU) Macky Sall.

Perezida Tshisekedi abisabwe na Lourenço yemeye kurekura abo basirikare b’u Rwanda bari bashimuswe mu rwego rwo guhosha amakimbirane yari yatangiye kuzamuka hagati ya Kigali na Kinshasa nk’uko byaaangajwe na Perezidansi ya Angola yavuze ko “Bigamije kugabanya umwuka mubi hagati y’ibihugu byombi.”

Perezida Lourenço yakomeje ashimangira umusaruro mwiza wavuye mu biganiro byabanje byahuje Perezida Kagame na Tshisekedi kuri telefoni, kuko abo bayobozi bumvikanye ko bagomba guhura imbonankubone i Kinshasa mu Murwa Mukuru wa RDC, amatariki akaba azatangazwa mu bihe biri imbere.

Umwiryane hagati ya RDC n’u Rwanda si uw’uyu munsi kuko mu myaka isaga 28 ishize, ibihugu byombi bifitanye amateka maremare byagiye bihura n’ibibazo bya Politiki mbi yabiranze mu myaka myinshi yabanje, uhereye ku bukoloni ukageza ku bufatanye bw’abayobozi ba nyuma y’Ubwigenge.

Mu gihe kuva Tsisekedi yajya ku butegetsi ibihugu byombi byari byafashe urugendo rwo kurenga urwango rushingiye ku mateka bigakorana mu guharanira iterambere rigirira inyungu abaturage b’ibihugu byombi, muri uku kwezi byarahindutse.

Ingabo za FARDC zikorera mu Ntara ya Kivu y’Amajyaruguru zashinje u Rwanda gushyigikira umutwe wa M23 wari wigaruriye igice kinini cy’iyo Ntara mu gihe gito, bityo na zo zihita zifatanya na FDLR mu guhangana n’izo nyeshyamba.

Ku Rwanda, ibyo byafashwe nk’ubushotoranyi no kongera ikibatsi mu nkongi ya Peteroli, kuko udashobora kurwanya iterabwoba wifashishije irindi terabwoba.

Icyabaye umusaruro w’ubwo bufatanye ni ukumisha ibisasu ku butaka bw’u Rwanda no gushimuta abasirikare barwo nubwo u Rwanda rwirinze guhita rwirwanaho mu gusubiza ubwo bushotoranyi nk’uko rubifitiye uburenganzira busesuye.

Undi musaruro w’ubwo bufatanye ni uko RDC yafatiye ibihano u Rwanda birimo no guhagarika ingendo za RwandAir.  

Guverinoma y’u Rwanda yatangaje ko yiteguye gukemura amakimbirane mu buryo butari ubw’intambara, ariko bitabujije ko ubusugire bw’Igihugu bwongeye kuvogerwa habaho kwitabara nta kabuza.