Suwede yashimye Politiki y’u Rwanda yo kurengera ibidukikije

  • NTAWITONDA JEAN CLAUDE
  • Gashyantare 20, 2022
  • Hashize imyaka 2
Image

Mu nama y’Igihugu y’Umushyikirano yo mu mwaka wa 2015, Perezida wa Repubulika y’u Rwanda Paul Kagame, ageza ku Banyarwanda inshamake y’uko Igihugu gihagaze, yagize ati: “Nti turi Igihugu gishimishwa n’ibintu uko biri, nta n’ubwo turi abantu bashimishwa gusa n’aho bageze…”

Kuba u Rwanda iteka ruharanira kugera ku rwego ruhanitse mu kubaka iterambere ridaheza kandi risigasira umubumbe, bikomeje gutera benshi kuvuga imyato imiyoborere y’Igihugu itanga icyerekezo ntagereranywa. 

Minisitiri ushinzwe Iterambere n’Ubutwererane Mpuzamahanga muri Suwede Matilda Ernkrans, yashimiye Leta y’u Rwanda yihaye icyerekezo cyo kuba mu bihugu byateye imbere bizaba bifite ubukungu buzira ibyuka bihumanya ikirere bitarenze mu mwaka wa 2050. 

Madamu Ernkrans yabigarutseho kuri iki Cyumweru nyuma y’ibiganiro yagiranye na Minisitiri w’Ibidukikije Dr. Mujawamariya Jeanne d’Arc. 

Ibyo biganiro byibanze ku butwererane bw’ibihugu byombi mu bijyanye no kubungabunga ibidukikije cyane cyane mu gukumira ingaruka z’imihindagurikire y’ikirere gutera inkunga imishinga yo guhangana n’iyo mihindagurikire, urusobe rw’ibinyabuzima no kubungabunga ibidukikije. 

Baganiriye kandi ku nama mpuzamahanga yiga ku bidukikije (Stockholm+50) yateguwe n’Umuryango w’Abibumbye yitezwe kuzabera i Stockholm muri Suwede taliki ya 2 n’iya 3 Kamena 2022.

Nyuma yo kuganira na Minisitiri Dr. Mujawamariya, Minisitiri Ernkrans yagize ati: “Ndashimira ubuyobozi bw’u Rwanda  gahunda yo kubungabunga ibidukikije. Nishimiye kumva imishinga Minisiteri y’Ibidukikije ishyize imbere no kuganira uburyo twarushaho kongera imbaraga ubufatanye bwacu, urugero nko mu gushora imari mu guhangana n’imihindagurikire y’ikirere, kubungabunga urusobe rw’ibinyabuzima no kwitegura ibizamurikwa muri #StockholmPlus50.” 

Minisitiri Ernkrans yakomeje ashimira Minisitiri Dr. Mujawamariya n’abandi bayobozi bo mu nzego zishinzwe kurengera ibidukikije mu Rwanda bamwakiranye urugwiro. 

Iyi ntumwa ya Suwede iri mu Rwanda mu ruzinduko rw’iminsi ine rugamije kwimakaza ubutwererane bw’ibihugu byombi mu nzego zitandukanye, no gukurikirana ibijyanye n’inkunga y’inkingo n’uko zitangwa. 

Mu gitondo cyo kuri iki Cyumweru, Minisitiri Ernkrans yunamiye inzirakarengane zazize Jenoside yakorewe Abatutsi ashyira indabo ku mva ziruhukiyemo abasaga 250,000 ku Rwibutso Rukuru rwa Kigali mu kubunamira no kubaha icyubahiro.

Ni nyuma yo gusobanurirwa amateka ya Jenoside yakorewe Abatutsi n’izindi Jenoside zabayeho mu mateka y’Isi. 

Yavuze ko yakozwe ku mutima n’ibyo yabonye ndetse yanasobanuriwe ku mateka ya Jenoside yakorewe Abatutsi mu 1994, ahamya ko byasabye ubutwari ngo Abanyarwanda bimakaze kubabarira, kubana mu mahoro no kubaho ubuzira kwibagirwa.

Yagize ati: “Ndabubashye…”

  • NTAWITONDA JEAN CLAUDE
  • Gashyantare 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE