Somaliya: Umwuzure umaze guhitana 29 abasaga 850.000 bavuye mu byabo

  • Imvaho Nshya
  • Ugushyingo 8, 2023
  • Hashize amezi 4
Image

Abayobozi bashinzwe ibiza muri Somaliya batangaje ko nibura abantu 29 bamaze gupfa mu gihe abarenga 850.000 bavuye mu byabo kubera umwuzure watewe n’imvura nyinshi yibasiye Somalia.

The East African yanditse ko imvura idasanzwe yaguye mu karere ka Luuq gaherereye mu majyepfo ya Somaliya ku wa 06 Ugushyingo, isiga yangije byinshi birimo n’ubuzima bw’abantu.

Mohamed Moalim, Komiseri w’Ikigo gishinzwe Imicungire y’Ibiza muri Somaliya (SoDMA), yavuze ko mu gihugu hose abantu barenga 305.000 bimuwe mu gihe umwuzuro wa Juba na Shabelle ukomeje guteza akajagari.

Moalim yabwiye abanyamakuru i Mogadishiu, ko imvura yahitanye abantu 29, irakomeretsa, yangiza imitungo kandi igira ingaruka ku bantu 850.000″.

Yibukije abaturage gukomeza kuba maso kubera ko hari ibyago byinshi by’umwuzure  ku nkombe zose z’umugezi wa Juba, cyane cyane mu Turere twa Gedo, Bakool na Bay mu majyepfo ya Somaliya.

Ishami ry’Umuryango w’Abibumbye ryita ku Buhinzi (FAO) ribinyujije mu kigo cya Somalia gishinzwe imicungire y’amazi n’ubutaka (SWLIM) ryavuze ko hazakomeza kubaho umwuzure muri Somaliya, bivugwa ko uzagira ingaruka ku bantu miliyoni 1.2 batuye mu turere tw’inzuzi.

Ibiro by’Umuryango w’Abibumbye bishinzwe guhuza Ibikorwa by’Ubutabazi (Ocha) ku wa Mbere byatangaje ko ubutabazi bwihutirwa bwahawe abantu 2,400 bari bagifunzwe n’umwuzure mu karere ka Luuq mu majyepfo ya Somaliya.

Muri Somaliya, abantu barenga miliyoni 3.7 bafite inzara ikabije, binateganyijwe ko umubare uziyongera ukagera kuri miliyoni 4.3 mu Kuboza, bitewe ahanini n’ingaruka z’umwuzure watewe n’imvura ikomeje kuhibasira.

Imvura nyinshi ije nyuma yuko Somaliya yahuye n’amapfa kurusha ahandi mu myaka mirongo ine, nyuma y’ibihe bitanu by’imvura bidasanzwe byangije amatungo n’ibihingwa, bituma igihugu cyicwa n’inzara.

KAMALIZA AGNES

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE