Sitade Amahoro igiye kwegurirwa abikorera

  • ZIGAMA THEONESTE
  • Gashyantare 6, 2024
  • Hashize amezi 4
Image

Minisiteri ya Siporo (MINISPORTS) yatangaje ko hari gahunda yo kwegurira abikorera imicungire ya Sitade Amahoro.

Iyo sitade ifite agaciro k’abarirwa mu mamiliyari yatangiye kuvugururwa muri Kanama 2022, mu rwego rwo kuyihindura isura ndetse no kuyigira sitade yo ku rwego rwo hejuru, ikagira ubushobozi bwo kwakira imikino mpuzamahanga ikomeye.

Muri uku kuvugurura Sitade Amahoro, harimo kwagurwa ahagenewe imyanya yo kwicaramo ikava ku bushobozi yari isanzwe ifite bwo kwakira abantu ibihumbi 25 ikagera ku bihumbi 45 000, no kongerera ubushobozi Sitade Nto (Petit Stade) ahakinirwa imikino y’intoki ya Basketball n’indi mikino yo mu nzu, gymnasium Paralympique, aho guparika imodoka, imihanda igera kuri sitade ndetse n’uruzitiro rwayo.

Iyo Sitade Amahoro izuzura, Guverinoma iyitanzeho arenga miliyari 160 z’amafaranga y’u Rwanda, ikazuzura mbere y’ukwezi kwa Kanama uyu mwaka.

Mu gihe Sitade Amahoro izaba yuzuye, izaba iri ku rwego rugezweho kandi usibye kuba izaba yujuje ibisabwa n’ishyirahamwe ry’umupira w’amaguru ku Isi (FIFA), izaba iri no ku rwego rwemerewe kwakira imikino ngororamubiri ku rwego rw’Isi (World Athletics Federation).

Niyonkuru Zéphanie, Umunyamabanga Uhoraho muri MINISPORTS, yatangarije Ikinyamakuru The New Times ko hari gahunda yo gushaka ikigo kibishoboye cyo gucunga iyi Sitade.

Ati: “Nkuko BK Arena ifite ubuyobozi, turateganya kandi gutanga uburenganzira abashoboye gucunga Sitade Amahoro bakayicunga”.

Isosiyete yo muri Afurika y’Epfo QA Venue Solutions ni yo icunga inyubako igezweho  ya BK Arena, kuva muri  2020.

Niyonkuru yavuze ko iyo sosiyete na yo ishobora kongerwa ku rutonde rw’abakwemererwa gucunga Sitade Amahoro, mu gihe yaba yujuje ibisabwa.

Ati: “Turimo gusuzuma niba bafite ubushobozi bwo kuyicunga, ubundi bakaba babyemererwa, ariko bizaba ari isoko rifunguye kuri  kompanyi zose zizaba zishishikajwe no gucunga iyo Sitade”. Uburenganzira bwo kwita izina.

Sitade izakomeza izina ryayo, Stade Amahoro, kugeza igihe amasezerano yo kwita izina azemezwa.

Niyonkuru yavuze ko Minisiteri izavugana n’amasosiyete ashaka gushora imari mu bijyanye no kwita izina Sitade Amahoro, noneho sitade izahindurwe mu gihe amasezerano yamaze kumvikanwaho.

Ati: “Sitade irakomeza izina ryayo ariko rishobora guhinduka igihe cyose tubonye isosiyete yiteguye kugura uburenganzira bwo kwita izina.”

Muri Gicurasi 2022, Banki ya Kigali yishyuye miliyari 7 z’amafaranga y’u Rwanda kugira ngo ihindurire izina Kigali Arena yitwe BK Arena mu masezerano azamara  imyaka itandatu.

  • ZIGAMA THEONESTE
  • Gashyantare 6, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE