Serivisi za Leta 400 zizaba ziri ku Irembo mu 2024

  • Imvaho Nshya
  • Ugushyingo 6, 2023
  • Hashize amezi 4
Image

Minisiteri y’Ikoranabuhanga no guhanga Ibishya (MINICT) yatangaje ko bitarenze mu mpera z’umwaka wa 2024, serivisi za Leta zirenga 400 ari zo zizaba ziri ku rubuga Irembo rumenyerewe nk’amarembo yoroshya imitangire inoze ya serivisi.

Byagarutsweho mu gihe hari gahunda yo kongera serivisi 200 kuri urwo rubuga bitarenze muri Kamena 2024, mu gihe nanone MINICT yemeza ko abaturage barenga miliyoni 5 ari bo bakeneye guhugurwa mu birebana no kubyaza umusaruro ikoranabuhanga.

Umunyamabanga Uhoraho muri MINICT Iradukunda Yves, yabwiye itangazamakuru ko kugeza ubu serivisi za Leta zitangirwa ku rubuga Irembo zibarirwa hejuru ya 100.

Akomeza avuga ko ubumenyi mu ikoranabuhanga ari ingenzi cyane kuko ari bwo buzatuma izo serivisi zishyirwa ku ikoranabuhanga zirushaho gukoreshwa na benshi mu rugendo rwo kwihutisha iterambere.

Yagize ati: “Kongera ubumenyi mu ikoranabuhanga ni cyo gishyizwe imbere. Kugira ibikorwa remezo n’ibikoresho by’ikoranabuhanga ni kimwe, ariko dukeneye n’ubushobozi bwo kubikoresha ngo tugere kuri serivisi. Guverinoma y’u Rwanda imaze igihe ishyira ku ikoranabuhanga serivisi zinyuranye mu korohereza abaturage kuzigeraho.

Yakomeje ashimangira ko intego y’amahugurwa atangwa ni ukugira ngo u Rwanda rukomeze kubaka ubukungu bushingiye ku ikoranabuhanga, ati: “Icyo tugamije ni uko serivisi zose za Leta zaba zashyizwe ku ikoranabuhanga bitarenze mu mpera z’umwaka  utaha.”

Kuri ubu serivisi ziteganyirizwa kongerwa ku rubuga Irembo zirimo gutoranywa mu nzego zitandukanye harimo serivisi z’amashyamba, ukwimura amatungo, ibyangombwa byo gufungura ivuriro, ibyangombwa byo gutumiza ibintu mu mahanga, impushya zo gukora ubushakashatsi n’izindi zitangwa n’Urwego rw’Igihugu Ngenzuramikorere (RURA).

Mu zindi serivisi zitegurirwa kutangirwa ku Irembo harimo ibyangombwa bimwe na bimwe bitangirwa ku Mudugudu, ku Kagari mo ku rwego rw’Umurenge, harimo ibyangombwa by’ubugenzuzi, kwishyura serivisi zimwe na zimwe nk’iz’irimbi, iz’isuku, imisanzu y’isoko ndetse na serivisi zitangwa n’Ikigo NAEB.

Iradukunda yavuze ko Leta yahaye ikiranga Ikigo mpuzamahanga IDCL gikora ibijyanye no kunoza ubumenyi mu bakozi, uburezi ndetse no mu baturage.

Icyo kigo gitanga impamyabumenyi mu bijyanye no gukoresha mudasobwa mu guharanira ko abakozi ba Leta barushaho kubona ubumenyi buhagije mu bijyanye no gukoresha ikoranabuhanga. Ibyo bibafasha kurushaho kunoza imirimo batanga serivisi zishingiye ku ikoranabuhanga.

Ubufatanye bugamije kandi ngo bugamije gukemura ikibazo cy’ubumenyi buke mu baturage muri rusange, amahugurwa n’impamyabushobozi zitangwa bikaba bishingiye ku byo isoko ry’umurimo rikeneye kuri ubu ndetse n’amahirwe ahari y’iterambere rishya rigenda rivuka.

Ni mu gihe kandi u Rwanda rwihaye intego yo kuba rwageze ku baturage barenga 60% bafite ubumenyi mu bijyanye no gukoresha ikoranabuhanga mu guharanira iterambere ryabo rya buri munsi bitarenze mu 2024.

Hakomeje gahunda zigamije guhugura abaturage bakabona ubumenyi buhagije mu ikoranabuhanga, by’umwihariko mu gukoresha telefoni zigezweho bagera kuri serivisi zitangirwa kuri murandasi, aho urubyiruko rwashyiriweho mu gjtanga ubwo bumenyi ku buntu.

Mu bundi bumenyi bwongererwa abaturage habazamo ubujyanye no gukoresha ikoranabuhanga mu buhinzi n’ubworozi, mu bucuruzi, mu ishoramari mu buzima n’izindi nzego.

NTAWITONDA JEAN CLAUDE

  • Imvaho Nshya
  • Ugushyingo 6, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE