Rwanyindo wahoze ari Minisitiri yatangiye imirimo mishya muri ILO

  • Imvaho Nshya
  • Ukwakira 3, 2023
  • Hashize amezi 8
Image

Rwanyindo Kayirangwa Fanfan wahoze ari Minisitiri w’Abakozi ba Leta n’Umurimo mu Rwanda, yatangiye imirimo mishya nyuma yo kugirwa  Umuyobozi Mukuru Wungirije w’Umuryango Mpuzamahanga wita ku murimo (International Labor Organisation) n’Umuyobozi ushinzwe akarere ka Afurika.

Mu itangazo ryashyizwe ku rubuga rwa X n’uyu muryango wagaragaje ko wishimiye kwakira Kayirangwa muri uyu muryango ko yitezweho umusaruro uteza imbere Umugabane wa Afurika.

Kayirangwa yavuze ko yishimiye gutangira iyi mirimo mishya muri uyu muryango ILO.

Yagize ati: “Nishimiye gukorana na ILO uyu munsi.Niteguye gukorana imbaraga mu guteza imbere akarere ka Afurika nkorana n’abafatanyabikorwa mu gukora twimakaza ubutabera mu rwego rwo guteza imbere umurimo mu nzego zose.”

Kayirangwa Fanfan washyizwe muri uyu mwanya ku mugaragaro taliki ya 1 Ukwakira 2023.Mu nshingano afite harimo guteza ubutebera mu kazi no kubahiriza uburenganzira bw’abakozi.

Kayirangwa Fanfan Rwanyindo ni Umunyarwandakazi wabaye Minisitiri w’Abakozi ba Leta n’Umurimo kuva mu 2017 kugeza muri Kanama 2023.

Afite impamyabumenyi y’icyiciro cya kabiri cya kaminuza mu by’amategeko yakuye mu yahoze ari Kaminuza NKuru y’u Rwanda, mu 1997.

Afite kandi impamyabumenyi ya ‘Masters’ mu by’amategeko yakuye muri Kaminuza ya Witwatersrand, i Johanesbourg muri Afurika y’Epfo, mu 2010.

Kayirangwa Rwanyindo Fanfan yabaye umujyanama mu by’amategeko mu yahoze ari Banki y’Ubucuruzi y’u Rwanda yahindutse I&M Bank Rwanda kuva mu 1998 kugeza mu 2004.

Yakoze kandi mu nzego z’ubutabera bw’u Rwanda. Yabaye Minisitiri w’Abakozi ba Leta n’Umurimo mu 2017 asimbuye Judith Uwizeye wari ugizwe Minisitiri muri Perezidansi.

  • Imvaho Nshya
  • Ukwakira 3, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE