RwandAir yemerewe gutangira ingendo zihuza Mauritania n’amahanga

  • NTAWITONDA JEAN CLAUDE
  • Gashyantare 24, 2022
  • Hashize imyaka 2
Image

Leta y’u Rwanda n’iya Repubulika ya Kiyisilamu ya Mauritania byasinyanye amasezerano y’ubwikorezi bwo mu kirere yemerera Sosiyete Nyarwanda itanga izo serivisi RwandAir gutangira ingendo zerekeza n’iziva muri Mauritania, zikazahuza icyo Gihugu n’andi mahanga.

Ayo masezerano yasinywe nyuma y’ibiganiro Perezida wa Repubulika y’u Rwanda Paul Kagame yagiranye na Perezida wa Mauritania Mohamed Ould Cheikh Mohamed Ahmed Ould Ghazouani, mu ruzinduko rw’iminsi ibiri rwasoje kuri uyu wa Kane taliki ya 24 Gashyantare 2022.

Uretse kuba ingendo zizajya zikorwa hagati y’ibihugu byombi, amasezerano yasinywe yemerera Sisosiyete ya RwandAir uburenganzira bwo kujyana no gukura abagenzi mu bindi bihugu bajya cyangwa bava muri Mauritania (Fifth Freedom Rights).

Perezida Kagame na mugenzi we banaganiriye ku ngingo zitandukanye zirimo izirebana n’umutekano ku Mugabane w’Afurika, ndetse banagaruka ku buryo hakenewe uburyo bushya buhamye bwo kwerekeza ubushobozi mu gushyigikira ibikorwa bihuza ibihugu by’Afurika bikajyana no kubaka ubushobozi bwa buri gihugu kigize uyu mugabane.

Umuvugizi wa Perezidansi y’u Rwanda Stephanie Nyombayire, yavuze ko Abakuru b’Ibihugu byombi banaganiriye ku ngamba zikwiye gufatwa mu gushyigikira ibihugu byagizweho ingaruka n’ibibazo byabaye akarande ku mugabane w’Afurika hamwe no gushyira mu bikorwa ibisubizo bigamije gutanga umusaruro w’ingenzi mu iterambere rirambye.

Perezida Kagame yasuye Mauritania nyuma yo kuva muri Senegal, aho yari yitabiriye umuhango wo gutaha Sitade yitiriwe Abdoulaye Wade, aho yari kumwe na Perezida wa Senegal  Macky Sall na Recip Erdogan wa Turukiya, Adama Barrow wa Gambia na George Weah wa Liberia.

U Rwanda na Mauritania ni ibihugu bisanzwe bifitanye umubano wihariye by’umwihariko ukaba ujyanye n’ubuhahirane, ariko byombi bikaba bitarashinga z’Ambasade ku mpande zombi.

Iki gihugu cy’Abayisilamu giherereye mu Majyaruguru y’Uburengerazuba bw’Afurika aho gikora ku Nyanja y’Atalantika ndetse kiri ku mwanya wa 11 mu bihugu bigari muri Afurika, aho 90% by’ubutaka bwacyo buherereye mu Butayu bwa Sahara.

Umubare munini w’abaturage bacyo bangana na miliyoni 4.3 baba mu gace k’amajyepfo y’Igihugu aho usanga kimwe cya gatatu cyabo bibera mu Murwa Mukuru Nouakchott ari na wo mujyi munini, ukaba uherereye ku nkengero y’Inyanja ya Atalantika.

Izina ry’icyo gihugu rikomoka ku Bwami bwa Mauretania bw’abaturage bitwaga Berbers, bwari buherereye mu bihugu by’iki gihe bya Morocco n’Algeria. Abo baturage binjiye ku butaka bwa Mauritania mu kinyejana cya gatatu nyuma ya Yesu.

Abarabu baje kwigarurira icyo gihugu mu kinyejana cya munani, bahazana idini ya Islam, umuco wabo ndetse n’ururimi rw’Icyarabu. Mu kinyejana cya 8, Mauritania yakolonijwe n’u Bufaransa nka kimwe mu bice by’Afurika y’Iburengerazuba, iza kubona ubwigenge mu 1960 nyuma y’aho yibasirwa na kudeta z’urudaca ndetse n’ibihe by’imiyoborere ikakaye ya gisirikare.

Kudeta iheruka kuba mu myaka ya vuba ni iyabaye mu mwaka wa 2008 yari iyobowe na Gen. Mohamed Ould Abdel Aziz waje no gutsinda amatora mu 2009 no mu 2014. Nyuma yaje gusimburwa na Mohamed Ould Ghazouani watsinze amatora yo mu 2019, ari na yo yabaye aya mbere yakozwe mu mucyo no mu mutuzo kuva igihugu cyabona ubwigenge.

Mauritania ni kimwe mu bihugu bigize igice cy’Isi cy’Abarabu mu buryo bw’umuco na Politiki, kikaba kiri mu ihuriro ry’Ibihugu by’Abarabu ndetse kikanakoresha Icyarabu nk’ururimi rumwe rukumbi rwemewe n’Itegeko Nshinga.

Bitewe n’igihe iki gihugu cyamaze gikolonijwe n’u Bufaransa usanga urwo rurimi rwa gikoloni ruvugwa cyane kandi rukanakora nk’ururimi ruhuza icyo Gihugu n’amahanga. Idini ya mbere yemewe ni Islam cyane ko umubare munini w’abaturage baho ari Abayisilamu.

Nubwo iki gihugu gifite umutungo kamere mwinshi, harimo ibyuma ndetse na Peteroli, iki gihugu kiri mu bihugu bikiri mu nzira y’amajyambere. Ubukungu bwacyo bukaba bushingiye ahanini ku buhinzi, ubworozi ndetse n’uburobyi.

Perezida Kagame yasoje uruzinduko rw’iminsi ibiri muri Mauritania
  • NTAWITONDA JEAN CLAUDE
  • Gashyantare 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE