RwandAir igiye gukuba hafi kabiri ibyerekezo yari isanzwe ifite

  • Imvaho Nshya
  • Ugushyingo 8, 2023
  • Hashize amezi 7
Image

Kompanyi y’ubwikorezi bwo mu kirere RwandAir yatangaje ko mu myaka 5, iteganya gukuba hafi kabiri ibyerekezo 25 isanzwe ifite mu rwego rwo gukorera henshi muri Afurika no ku Isi.

Umuyobozi Mukuru wa RwandAir Yvonne Makolo yavuze ko kongera indege ari mu rwego rwo kubona amasoko y’Afurika ndetse no mu Burasirazuba bwo hagati.

Makolo yavuze ko muri uyu mwaka hazagurwa indege 13 zirimo ishatu za Boeing 737.

Yagize ati: ”Ndatekereza ko dukeneye gukorera ingendo zirenze izo ku mugabane wa Afurika, dufite Miliyari 1.4, turareba tugasanga ari 3% z’ayo tuzakenera mu gukora ingendo zo hirya no hino ku Isi.”

Makolo uherutse no gutorwa nk’Umuyobozi w’umugore wa mbere  uyoboye Ihuriro ry’Ibigo Mpuzamahanga byo gutwara abantu mu kirere (International Air Transport Association (IATA), yavuze ko RwandAir ikorera ingendo mu byerekezo 25 birimo ibyo muri Afurika 20,by’ibihugu  nka  Ghana, Kenya, Nigeria  na Afurika y’Epfo.

RwandAir kandi iguruka yerekeza ku mugabane w’u Burayi no mu Burasirazuba bwo hagati mu mijyi ya Paris, London, Brussels, Dubai na Doha.

Muri iyi gahunda Makolo avuga ko ibyerekezo bya RwandAir bigiye kwiyongera ku buryo mu myaka itanu iri imbere bizaba ari 39, byibanda cyane ku mugabane wa Afurika.

Ati: ”Aho twibanda cyane ni kuri uyu mugabane, RwandAir ni ho yibanda cyane, turimo gushaka uko twafungura andi marembo no mu bihugu bindi bya Afurika, aho hateganywa gutanga uburenganzira bw’ahantu 50, uburyo bwo guhuza Afurika n’ibindi bihugu bya Afurika bityo tugakomeza no mu bindi byerekezo by’ahandi ku Isi.

RwandAir kuri ubu ifite indege ikoresha za Airbus A330, Boeing 737s, Bombardier CRJ-900s n’ebyeri za De Havilland Canada Dash 8-Q400s.

Makolo yavuze ko kandi kuba ingendo z’indege zihendutse ari ikibazo gikomeye by’umwihariko ku mugabane wa Afurika kuko hari abafata gukora ingendo zo mu kirere nk’uburyo bwo kwishimisha gusa.

Ati:” Hariho imisoro ihanitse kandi itari ngombwa, ni ikintu gikwiye kwigwaho, ubu turimo gukorana n’izindi sosiyete zitwara abantu mu kirere ku mugabane wa Afurika kugira  ngo byoroshywe”.

RwandAir ivuga ishaka ko Kigali iba  igicumbi cy’ingendo zo mu kirere muri aka karere, ndetse bikanaguka ikanaba n’igicumbi cyazo muri Afurika.

Abajijwe icyo barimo gukora ku kwagura ingendo zo mu burasirazuba bwo hagati Makolo yavuze ko barimo kuganira ku buryo bwo kwagura ibyerekezo bikarenga ibyo RwadAir yari isanzwe ifite mu mijyi ya Doha na Dubai bikarenga bikagera no mu bindi bice byo muri aka karere.

RwandAir kandi ivuga ko irimo kunoza ingendo zo muri Dubai na Doha ku buryo nibura imyaka iri ku kigero cya 70% mu ndege ishobora kuboneka. 

Ati: ”Turimo kwibanda ku kongera imyanya, ku buryo mu mijyi ya Doha na Dubai tuzajya tujyayo inshuro ebyiri ku munsi”.

Dubai ni icyerekezo cy’ingenzi ku ndege zitwara imizigo nk’uko RwandAir ibyemeza aho yibanda mu gutwara ibiribwa by’umwihariko  avoka.

RwandAir mu kwagura ibyerekezo yashyizeho imikoranire na   kompanyi ya Qatar Airways aho hari ibyerekezo by’indege 65 binyura mu mujyi wa Doha.

Kwagura ibyerekezo ku mugabane wa Afurika RwandAir ihamya ko bizongera ibyerekezo ndetse binazamura ubukungu bw’umugabane wa Afurika ndetse no kugabanya ibibazo byo gutinda mu ngendo no kuba zimwe na zimwe zihenze.

Makolo kandi ashyigikiye ugukuza uruganda rw’ubwikorezi bwo mu kirere butangiza ikirere (sustainable aviation fuel (SAF)  aho Guverinoma zisabwa kubuyoboka.

SAF ni uburyo bwashyizweho bwitezweho kuzagabanya imyuka ihumanya ikirere ho 62 %.

ZIGAMA THEONESTE

  • Imvaho Nshya
  • Ugushyingo 8, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE