Rwanda FDA yungutse abafatanyabikorwa mu rugendo rwo kwemerwa na OMS

Ikigo cy’Igihugu gishinzwe kugenzura ibiribwa n’imiti (Rwanda FDA), cyasinyanye amasezerano y’ubufatanye n’Ikigo QUAMED ndetse n’Ikigo cy’Iterambere cy’Ababiligi (Enabel) yo kugishyigikira mu rugendo rwo kugera ku rwego rw’ubukure (Maturity Level 3) bwemewe n’Ishami ry’Umuryango w’Abibumbye ryita ku Buzima (WHO/OMS).

Byitezwe ko ayo masezerano yasinywe taliki ya 18 Mata 2022 azafasha abo bafatanyabikorwa gutanga inkunga n’ubundi bufasha bugamije kuzahura inzego z’ubugenzuzi zitangwa binyuze muri Laboratwari y’iki kigo yifashishwa mu kugenzura ubuziranenge.

Muri ayo masezerano kandi Rwanda FDA izohererezwa impuguke ziza guhugura no gukurikirana abakozi b’iki kigo cyitezweho kuzagira uruhare mu mikorere izira amakemwa y’uruganda rw’inkingo n’imiti rwitezwe mu Rwanda guhera mu mpera z’uyu mwaka. 

Izo mpuguke zizajya zoherezwa n’Ikigo QUAMED na cyo gifite inkomoko mu Bubiligi, zikazagira uruhare mu ishyirwaho ry’amabwiriza y’ubuziranenge no gutegura gahunda yo kongera ubushobozi bw’abakozi.

Umuyobozi uhagarariye Enabel mu Rwanda Dirk Deprez, yavuze ko ubu bufatanye bugiye kujyana n’indi mishinga iterwa inkunga n’Umuryango w’Ibihugu by’u Burayi (EU) na yo izaba igamije kubaka ubushobozi bwa Rwanda FDA.

Ibikorwa bizaba bikubiye muri iyo mishinga birimo kugenzura ubuziranenge bw’imiti no kuyemeza ku isoko, gukurikirana uko iryo soko rikoresha iyo miti ndetse n’uko icuruzwa mu guharanira ko ibicuruzwa by’imiti bikwirakwizwa mu gihugu binyuze mu nzira zemewe kandi zizewe.

Umuyobozi wa Rwanda FDA Bienvenu Emile, yakiriye neza aya masezerano ashimangira ko ajyanye n’icyerekezo cy’iki kigo cyo kugera ku kigero cy’ubukure bwemewe na OMS ari na bwo busabwa kugira ngo ube ufite ubushobozi bwo gukora inkingo.

Yagize ati: ”Nizera ko kugera ku ntsinzi y’aya masezerano bizakora kuri benshi kandi bigafasha Leta y’u Rwanda muri rusange. Muri aya masezerano hazabaho guhabwa impuguke zimara igihe kirekire, ukaba ari umwe mu misaruro ikomeye y’ubu bufatanye.”

Akomeza ahamya ko ubu bufatanye bwahurijwe hamwe mu gihe gito bukaba ari n’igisubizo kirambye mu rugendo u Rwanda rwatangiye rwo kwigobotora guhora rutumiza imiti n’ibindi bikoresho by’ubuvuzi biva mu mahanga.

Ni ubufatanye kandi bushimangira ubutwererane bw’u Rwanda n’u Bubiligi mu nzego zirimo ubuzima, ubuhinzi, iterambere ry’imijyi n’imicungire y’umutungo wa Leta.