Rwamagana: Umuhinzi w’urusenda yinjiza arenga miliyoni 3 mu gihembwe

  • NSHIMIYIMANA FAUSTIN
  • Mutarama 24, 2024
  • Hashize amezi 4
Image

Dushimirimana Fidele w’imyaka 37 ni umuhinzi w’urusenda mu gishanga cya Nzige mu Karere ka Rwamagana, yavuze ko urusenda rumaze kumuteza imbere kuko mu gihembwe yinjiza amafaranga ari hagati ya miliyoni 2.5 na 3 z’amafaranga y’u Rwanda kuri Hegitari imwe.

Dushimirimana afite umugore n’abana batatu batuye mu Mudugudu wa Gisenyi, Akagari ka Kigarama mu Murenge wa Nzige, yasobanuye ko yatangiye ubuhinzi afite imyaka 28, nyuma yuko arangije amashuri yisumbuye mu ishami ry’Ubugenge, Ubukungu n’Ubumenyi bwIsi (HEG) muri 2013 yitabiriye amahugurwa ku buhinzi ahagarariye umuryango we bituma akunda umwuga w’ubuhinzi.

Dushimirimana yavuze ko ubuhinzi bw’umwuga yabutangiye mu 2018 ahinga imboga n’imbuto ariko ubu akaba amaze imyaka igera kuri ine atangiye guhinga urusenda rw’imiteja [rukiri rubisi] rwitwa Teja na Badae ariko ba rwiyemezamirimo bakarwohereza mu Bushinwa rwumye.  

Akomeza asobanura ko mu kwitegura ihinga ashobora gukoresha igishoro kiri hagati ya miliyoni 1.5 n’ebyiri kuri hegitari imwe akabona umusaruro uri hagati ya toni 10 na 15 mu gihembwe dore ko ubuhinzi bw’urusenda rugira ibihembwe bibiri mu mwaka.

Dushimirimana yavuze ko atangira ubuhinzi bw’urusenda atiyumvishaga ko rwamuteza imbere nkuko bimeze ubungubu kuko amaze kwigira no gukura umuryango we mu bukene.

Yagize ati: “Ntangira ubuhinzi nabaga mu nzu y’ikode njye n’umugore ariko ubu mfite inzu mbamo n’umuryango ndetse n’izikodeshwa zikanyinjiriza amafaranga. Ubu mfite moto iri mu muhanda nayo ikora ikampa amafaranga.”

Yakomeje agira ati: “Ibishobora gutuma umuryango ubaho neza mbikura mu buhinzi kuko nta kindi kintu nkora; amafaranga y’ishuri, ubwisungane mu kwivuza, Ejoheza n’ibindi bikenerwa mu rugo.”

Mu Nama y’Igihugu y’Umushyikirano ku nshuro ya 19, ubwo yatangiraga tariki ya 23 Mutarama 2024; Minisitiri w’Ubuhinzi n’Ubworozi Dr. Musafiri Ildephonse yavuze ko bari gushyira imbaraga mu musaruro woherezwa hanze ariko by’umwihariko hari ibihingwa bine birimo n’urusenda, ndetse urubyiruko rukaba ruhamagarirwa kugana ubuhinzi kuko burimo amahirwe.

Yagize ati: “Ndavuga amahirwe y’ibintu turi gushyiramo imbaraga ngo byoherezwe hanze ni avoka, urusenda, imiteja na marakuja. Twabonye ko dufite amahirwe muri ibyo bihingwa ndetse uko imyaka igenda iza amahirwe yikuba kenshi turashaka kongera kugira ngo amahirwe ahari tuyabyaze umusaruro.”

Dushimirimana Fidele

Yakomeje agira ati: “Urubyiruko, ibyo rwaba rwarize byose turabashaka mu buhinzi kuko hari ibyo dukora bigahita bikunda. Turabashishikariza kuza mu buhinzi kuko amahirwe arahari kandi amarembo arafunguye.”

Kimwe n’abandi bahinzi b’urusenda n’imbuto bibumbiye muri koperative Gwiza Rwamagana bishimira ko begerejwe ibikorwa remezo birimo ingomero z’amazi zibafasha kuhira umusaruro ukomoka ku buhinzi binyuze mu kuhira imyaka mu buryo bugezweho, bagasaba Leta kubafasha kubona amasoko n’ibindi.

Dushimirimana Fidele ubu yitegura kujya mu imurikagurisha mu gihugu cy’u Budage mu kwezi kwa Gashyantare 2024 ajyanye urusenda.

  • NSHIMIYIMANA FAUSTIN
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE