Rwamagana: Rotary Club Kigali Mont Jali yishyuriye Mituweli abatishoboye 1,000

  • Imvaho Nshya
  • Ukwakira 29, 2023
  • Hashize amezi 7
Image

Nka kimwe mu bikorwa byayo bigamije gufasha Umuryango nyarwanda kugira ubuzima bwiza, Umuryango w’abagiraneza, Rotary Club Kigali Mont Jali, wishyuriye ubwisungane mu kwivuza abatishoboye bagera ku 1,000 bo mu Murenge wa Musha mu Karere ka Rwamagana.

Ni igikorwa cyakozwe ubwo abanyamuryango ba Rotary Club Mont Jali bifatanyaga n’abaturage bo mu Kagari ka Budahanda mu Murenge wa Musha, mu muganda rusange usoza ukwezi k’Ukwakira wahujwe no gutangiza igihembwe cyo gutera ibiti 2023/2024, hakaba hatewe ingemwe 1000 z’ ibiti.

Umuyobozi wa Rotary Club Kigali Mont Jali Murekatete Clementine, yavuze ko bahisemo gutanga ubwisungane mu kwivuza kugira ngo Abanyarwanda bagire ubuzima bwiza kandi butekanye, ntawubura uburyo bwo kwivuza.

Yagize ati: “Dukunda u Rwanda n’Abanyarwanda, ni yo mpamvu twiyemeje gutanga ubwisungane mu kwivuza ku miryango ifite ubushobozi buke kandi bataratanga Mituweli. Ntibyadushimisha kubona hari urwara akabura uko ajya kwa muganga. Twahisemo gukora igikorwa nk’icyo kugira ngo tubihuze n’igihe cyo gutera ibiti. Intego n’inshingano zacu ni ugufasha abaturage kugira ubuzima bwiza no kubungabunga ibidukikije.”

Umunyamabanga Nshingwabikorwa w’Umurenge wa Musha Rwagasana Jean Claude, yashimiye ubufatanye bafitanye n’iyi Club kuko bwatangiye gutanga umusaruro.

Yagize ati: “Turashimira Rotary Club Kigali Mont Jali yatanze ubwisungane mu kwivuza ku baturage 1,000. Dusanzwe dufitanye umubano mwiza na bamwe mu banyamuryango kuko hari abafite ibikorwa hano bakaba batekereza no gufasha abaturage baturanye. Badufashije gutera ibiti kugira ngo dukomeze gufata ubutaka neza no kubungabunga ikiyaga cya Muhazi.”

Uretse kwishyurira ubwisungane mu kwivuza abaturage batishoboye, abo banyamuryango kandi bafatanyije n’abaturage gukora Umuganda mu Kagari ka Budahanda wo gukora umuhanda ujya ku Ivuriro ry’Ingoboka rya Budahanda wahawe agaciro ka 7,000,000 z’amafaranga y’u Rwanda.

Bamwe mu baturage bishimiye gukora Umuganda mu muhanda ujya ku Ivuriro ry’Ingoboka rya Budahanda kuko ukunze kwangirika cyane bigateza ikibazo cyuko imbangukiragutabara bigorana kuhanyura iyo wangiritse.

Kubwimana Zachary atuye mu Mudugudu wa Rwabiyange yagize ati: “Twishimiye kuba twafatanyije n’aba bavandimwe bavuye i Kigali bakaza gufatanya natwe gusibura uyu muhanda ujya ku ivuriro. Ubusanzwe uyu muhanda warangiritse ku buryo imbangukiragutabara bigorana kuhanyura ije gutwara umurwayi warembye. Ubu urabona ko umuganda ukozwe hari icyo ugiye gufasha rwose.”

Rotary Club Kigali Mont Jali ni Umuryango ukora ibikorwa bigamije gufasha mu kuzamura imibereho y’abaturage, kuzamura ireme ry’uburezi, kurwanya ubujiji, kurengera ibidukikije, kurwanya ibyorezo, gufasha ababaye no guharanira amahoro.

Rotary Club Kigali Mont Jali ni imwe muri ‘Club’ 12 za Rotary ziri mu Rwanda zifite abanyamuryango barenga ibihumbi 200. Kugeza ubu mu Mujyi wa Kigali habarizwa Club esheshatu.

Uyu muryango uvuga ko utaba mu Rwanda gusa kuko ufite abanyamuryango barenga miliyoni 1.4 ku Isi yose.

NSHIMIYIMANA FAUSTIN

  • Imvaho Nshya
  • Ukwakira 29, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE