Rwamagana: Imihanda ya kaburimbo yatangiye guhindura isura y’Umujyi

  • Imvaho Nshya
  • Ugushyingo 18, 2023
  • Hashize amezi 3
Image

Mu bice bitandukanye by’Umujyi wa Rwamagana hamaze kubakwa imihanda ya kaburimbo ireshya na kilometero 13.5 hagamijwe gukesha umujyi, kuwongerera ubwiza, kwagura ubuhahirane no kuwuteza imbere.

Bamwe mu baturiye umujyi wa Rwamagana bavuga ko kuba bakomeje kugezwaho ibikorwa remezo birimo nk’imihanda yo muri karitsiye byoroheje ingendo ndetse byongera n’ubwiza bw’uyu mujyi.

Mutesi Clementine yagize ati: “Kugenda muri karitsiye imvura yaguye byari ikibazo kubera icyondo noneho watega moto ikaguca amafaranga 800 ariko ubu ni ibiceri 300. Ingendo zaroroshye kandi nta mumotari wanga kukugeza aho ushaka kujya nkuko byari bimeze imihanda itarakorwa”.

Nshimiyimana Lucie utwara abagenzi kuri moto yagize ati: “Iyi mihanda turayishimiye cyane nk’abantu dutwara ibinyabiziga, idufasha kugera muri karitsiye zose z’umujyi tugenda neza nta bunyerere cyangwa ivumbi. Ikindi kandi ni uko iri kongera ubwiza bw’umujyi kuko imihanda yajyanye no kurimbisha umujyi urabona ibiti bitewemo n’ubusitani bisa neza”.

Ibi kandi bishimangirwa na Habarurema Herman wigisha ibinyabiziga yagize ati: “Kwigisha abanyeshuri ibinyabiziga dukoresheje iyi mihanda biradufasha cyane kuko ikiri ibitaka kuhagera byaratuvunaga kubera icyondo ugasanga turi kubyinubira dufite impungenge, zuko abanyeshuri bangiza ibinyabiziga kubera imikuku,  ariko ubu tuhaza nta kibazo dufite kuko n’abanyeshuri bakoreramo ibizami”.

Abahagenda n’abahakorera na bo bavuze ko kuri ubu n’ubucuruzi buhagaze neza kuko ibinyabiziga bisigaye bibasha gutambuka nta nkomyi kandi bikabona aho biparika.

Uwingabire Chantal adodera ahitwa Buswayilini nawe yagize ati: “Uyu muhanda wari umeze nabi, ntiwagaragazaga isura y’umujyi kuko wari warangiritse utabona aho ibinyabiziga bihagarara ariko ubu umujyi urasa neza kandi uragaragara neza. Ibinyabiziga biparika hano bituma tubona abakiliya n’agafaranga kariyongereye. Urabona ko umujyi uryoshye utangiye gusa nk’i Kigali’’.

Umuyobozi w’Akarere ka Rwamagana wungirije ushinzwe imibereho myiza y’Abaturage, Umutoni Jeanne yavuze ko imihanda yubatswe yazanye impinduka ndetse ihindura isura y’umujyi bikaba bikomeje guteza imbere uyu mujyi n’akarere.

Yagize ati: “Abaturage batubwiraga ko abamotari batabageza aho batuye kuko bagarukiraga kuri kaburimbo gusa, ntibizeraga umutekano wabo kuko imihanda yari ihari itari ifite amatara amurika ariko kuva imihanda yakubakwa izo mbogamizi zivuyeho ndetse n’abaturage batangiye kuvugurura inyubako zabo, bakora inzira z’amapave, gusiga amarange inzu n’ibipangu byabo ku buryo abaturage bava iwabo bakagenda nta cyondo. Ibi byatumye n’abimukira mu mujyi biyongera.”

Umutoni Jeanne yavuze ko gahunda yo gukora imihanda yo muri karitsiye ikomeje ariko bagasaba abaturage n’abikorera kugira uruhare.

Yagize ati: “Bigenda biterwa n’ingengo y’imari uko igenda iboneka kandi tuzagenda tubikora kuko hose imihanda ntirahagera bitewe nuko imihanda yo mu mujyi ikwiye kuba kaburimbo bityo turatekereza no kwigisha abaturage n’abikorera bacu kuko twumva i Kigali hari uruhare abaturage bagiramo bakagira ibyo batangira n’ibyo Leta ibafasha ariko byose ni ukwigiranaho, nabyo tuzamenya uko bikorwa turebe bityo abahatuye bishimira kuhatura kandi na bo bikaborohera kunoza isuku.’’

Imihanda yo muri karitsiye yakozwe irimo kaburimbo y’ahitwa Plage, Buswayirini, no mu bice byaho isoko riri ndetse n’umuhanda ujya ku ishuri rya Police i Gishali. Imihanda yose yubatswe muri uyu mujyi wa Rwamagana ifite ibilometero 13.5 ikaba yarubatswe mu myaka 3 ishize.

FAUSTIN NSHIMIYIMANA

  • Imvaho Nshya
  • Ugushyingo 18, 2023
  • Hashize amezi 3
TANGA IGITEKEREZO
Iterambere ryogere says:
Ugushyingo 18, 2023 at 5:19 pm

Imihanda myishi iracyakenewe, iyakozwe irayari mike, imihigo irakomeje kandi irakomeye

manzi says:
Ugushyingo 19, 2023 at 11:42 am

u Rwanda ni rwiza

Andika igitekerezo

AMATEGEKO AGENGA IYANDIKA RY'IGITEKEREZO CYAWE