Rwamagana: Abahinzi batarabona imbuto n’ifumbire barahangayitse

  • Imvaho Nshya
  • Nzeri 24, 2023
  • Hashize amezi 5
Image

Bamwe mu bahinzi bo mu Murenge wa Nzige mu Karere ka Rwamagana, bavuga ko bakigowe no kubona inyongeramusaruro nk’ifumbire n’imbuto z’indobanure nyamara bararangije gutegura imirima yabo, ku buryo batazubahiriza itangira ry’Igihembwe cya 2024A bakaba bafite impungenge zo kuzabona umusaruro.

Abo bahinzi bavuze ko uburyo buri gukoreshwa bahabwa ifumbire hakoreshejwe ibyangombwa by’ubutaka n’amatelefone bwashyirwamo imbaraga kuko sisiteme ikoreshwa igenda gake.

Nyirahabimana Claudine utuye mu Kagari ka Rugarama mu Murenge wa Nzige yagize ati: “Ndimo ndahinga, ubu nta fumbire ndabona ndetse n’imbuto y’ibigori, ndacyategereje. Ni ukuba duca imyobo yo kuzashyiramo ifumbire n’ibigori nubwo mbona imvura igwa ikongera igasibama. Ndi gukererwa ihinga kuko nta kundi nabigenza.”

Ni ikibazo bahuriyeho n’abandi bahinzi bo mu Kagari k’Akanzu na Nyamatete, mu Murenge wa Nzige, bafite umpungenge z’umusaruro uhagije mu gihe batabonera imbuto n’ifumbire ku gihe.

Musabyeyezu Epiphanie yagize ati: “Imvura yaraguye dutegura imirima, imbuto iracyari ikibazo kuko ujya kuyizana ukagarukira aho kubera abantu benshi baba bitabiriye kandi abashyira muri sisiteme ibyangombwa by’ubutaka ari bake.

Nta muntu wemerewe guhabwa ifumbire atanyujije kuri telefone, wagerayo ku mukozi wa Tubura akakubwira ko icyuma kitari gukunda. Ubu se ihinga ntiridupfanye? Turasaba ko amafumbire n’imbuto byajya biza nko muri Kamena cyangwa Nyakanga kuko ubu harimo ibibazo byinshi bituma turi kubura uburyo duhingira igihe.”

Kayitaba Andree yagize ati: “Ubu nta mbuto n’ifumbire dufite, twagiye kuzishaka turazibura. Iyo uhageze uba ugomba kuba ufite ibyangombwa by’ubutaka na telefone. Iyo rero udafite telefone imbuto n’ifumbire urabibura. Nkange nakodeshejwe n’umuntu ampa umurima we ariko ifumbire narayibuze kuko nyir’ubutaka yamaze gufata iyo agenewe.”

Umukozi mu Kigo cy’Igihugu gishinzwe iterambere ry’Ubuhinzi n’Ubworozi RAB, ukurikirana Akarere ka Rwamagana kuri sitasiyo ya Rubirizi Murekeyimana Peruth, yavuze ko nta muturage ukwiye kugira impungenge ku kubona inyongeramusaruro kuko asabwa kuzana icyangombwa cy’ubutaka kugira ngo bamenye ubuso bw’isambu akoresha bamenye ingano y’imbuto n’ifumbire akeneye.

Yagize ati: “Kugira ngo ifumbire itangwe bisaba ko umuhinzi aba yatanze UPI yaho, kuko imbuto n’ifumbire bitangwa bigomba kujyana n’ubuso, ngo umenye ubuso bugomba gukoreshwa cyangwa ngo umenye ifumbire n’imbuto ingano yabyo bigomba kujya ku buso nuko uba ufite bwa buso. Aho dukura ubuso rero ni kuri UPI cya cyangombwa cy’umuturage.”

Murekeyimana Peruth akomeza agira inama abaturage badafite ibyangombwa by’ubutaka kwegera ubuyobozi bw’Umurenge bukabafasha.

Yagize ati: “Hari abatarabaruje ubutaka, ibi turabizi ko hari ubutaka buhari butarabarurwa kubera impamvu zitandukanye. Icyo gihe twarebye icyo bafashwa niba koko abo bantu bahari kugira ngo umurenge ufashe abo bahinzi babandike ku rutonde rusanzwe rw’impapuro noneho bagahabwa ifumbire nk’abandi kuko nta muhinzi ugomba guhinga atabonye ifumbire n’imbuto.”

Biteganyijwe ko mu Karere ka Rwamagana hazahingwa ibigori ku butaka buhuje kuri Hegitari 17,000, ibishyimbo bikazahingwa ku buso bugera kuri Hegitari 15,000, Soya zikazahingwa kuri Hegitari 415, naho imyumbati ikazahingwa kuri Hegitari 830.

NSHIMIYIMANA FAUSTIN

  • Imvaho Nshya
  • Nzeri 24, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE