Rwamagana: Abahinzi bakanguriwe guhinga kare mu gihembwe 2022B

Umuyobozi w’Akarere ka Rwamagana Mbonyumuvunyi Radjab yatangije ku mugaragaro igihembwe cy’ihinga cya 2022B kuri uyu wa Gatanu taliki ya 18 Gashyantare 2022, ashishikariza abanhinzi guhinga ku gihe kandi bagakoresha inyongeramusaruro ari ryo banga ryonyine rizabafasha kubona umusaruro uhagije wo gutunga imiryango yabo, ndetse bakanasagurira isoko bityo bakaniteza imbere.

Iki gikorwa kikaba cyabereye kuri site y’ubuhinzi ya Gahoko mu Mudugudu wa Kiruhura, Akagari ka Kagarama mu Murenge wa Musha; abacyitabiriye bateye imbuto y’ibigori ya RHM1407 yatuburiwe mu Rwanda (Hybrid).

Meya Mbonyumuvunyi yasabye abahinzi kwitabira gukoresha inyongeramusaruro kuko ubutaka bugenda bugunduka.

Ati: “Ndasaba abahinzi kwitabira gufumbira, bagakoresha ifumbire y’imborera ndetse n’imvaruganda kugira ngo babone umusaruro mwiza kandi uhagije. Uko imyaka ihita ubutaka bugenda bugunduka ku buryo tutabuhongereye ifumbire dushobora kutabona umusaruro twifuza, mu gihe iyo dukoresheje inyongeramusaruro tubona umusaruro mwiza kandi uhagije.”

Yababwiye ko iki gihembwe cy’ihinga dutangiye gikunze kuba kigufi ugereranyije n’ikikiba nziriza cya A kandi ko kugitangiza biba bigamije gukangurira abahinzi guhinga hakiri kare.

Ati: “Iki gihembwe cy’ihinga gitangiye gikunze kuba kigufi ugereranyije n’ikiba cyarabanje cya “A”; kandi kugitangiza gutya biba bigamije no gukangurira abahinzi guhinga hakiri kare kuko twagize amahirwe n’imvura iboneka kare.

Site ya Gahoko yatangirijweho igihembwe cy’ihinga cya 2022B ifite ubuso bungana na Hegitari 12. Iki gikorwa kandi cyakorewe icyarimwe no mu yindi Mirenge yose igize Akarere ka Rwamagana.

Gutangiza igihembwe cy’ihinga cya 2022B  ni igikorwa cyanitabiriwe na Visi Meya Nyirabihogo Jeanne d’Arc ushinzwe iterambere ry’ubukungu mu Karere ka Rwamagana, Sendege Norbert Uyobora ishami rya RAB rya Rubirizi; Abahagarariye inzego z’umutekano n’abaturage muri rusange.