Umusozi watengutse ufunga umugezi wa Rusizi hatikirira imyaka ya miliyoni 15 Frw

  • BAHUWIYONGERA SYLVESTRE
  • Gashyantare 24, 2024
  • Hashize amezi 2
Image

Imiryango 30 yo mu Midugudu ya Mugerero na Nyamagana, Umurenge wa Nyakarenzo mu Karere ka Rusizi, yahingaga hafi y’umugezi wa Rusizi, ku musozi wa Rwamikaba, yatengukiweho n’umusozi bikangiza imyaka yabo.

Irarira ayo kwarika nyuma y’uko ahagana saa cyenda n’igice z’igicamunsi cyo ku wa Gatanu tariki ya 23 Gashyantare, ubutaka bw’ahareshya na metero 600 bumanukiye mu mugezi wa Rusizi bukawufunga, bugahura n’ubwa RDC maze imyaka ifite agaciro ka 15.000.000 ikahatikirira.

Aganira n’Imvaho Nshya ubwo yari ari aho ibyo biza byabereye, Umunyamabanga Nshingwabikorwa w’Umurenge wa Nyakarenzo, Ntawizera Jean Pierre yavuze ko uyu musozi wa Rwamikaba watengutse bikomeye cyane ukagenda nta n’imvura yaguye, ukiroha mu mugezi wa Rusizi. Imyaka y’abaturage yarengewe n’akazi irimo ibishyimbo, imyumbati, ibisheke, urutoki, urusenda, kawa, imboga n’ishyamba rya Leta ryari rimaze igihe gito rihatewe byagiye uko byakabaye, bikomeza guhagarara nk’ibiri imusozi biri mu mugezi wa Rusizi.

Umusozi watsukanye n’ibyari biwuriho

Ati: “Ubutaka bwahise bufunga umugezi wa Rusizi, imyaka bwamanukanye yose irarengerwa, amazi asandara mu mirima y’abaturage, yangiza imyaka yose yari ihateye, hagenda ubutaka bwa Hegitari 2,5. Kuko ubutaka bwagiye butsuka gahoro gahoro abaturage babureba nta kindi bakora, imyaka yabo yose yarengewe n’ayo mazi, ubu basigaye iheruheru.”

Yongeyeho ati: “Twabaze imiryango 30 yatikirijwe iyo myaka yose, ifite agaciro k’arenga 15.000.000. Ikibabaje kurushaho kikaba ko iyo myaka yose nta bwishingizi yagiraga.’’

Yavuze ko ubu butaka bwatikiriye mu mazi bwari ubw’Imidugudu 2 yabaga mu manegeka, abaturage bari bahatuye barahimurwa basigara bahahinga ari imirima gusa, hari ibilometero 6 ngo ugere ku nzu z’abaturage akaba ari yo mpamvu nta wahasize ubuzima cyangwa inzu yahangirikiye.

Avuga ko impungenge zikomeye zihari ari uko n’ubundi n’ubutaka busigaye bukomeje kugenda kandi nta cyakorwa ngo babugarure, nta n’uruzitiro bahashyira kubera ingufu nyinshi bumanukana, n’indi myaka y’abaturage itagiye ikaba yagenda ibibazo bigakomeza kwiyongera.

Akomeza avuga ko icyakora ku gice cya RDC, amazi yaje kwishakira inzira arakomeza, ariko ku gice cy’u Rwanda ibitaka n’ibiti byabaye byinshi bikora nk’ikiyaga kumanuka biranga, imyaka irarengerwa.

Ati: “Ntidushobora kubwira abaturage kujya mu mugezi gukuraho buriya butaka cyangwa gushakisha imyaka irimo kuko ni harehare cyane, amazi yabatwara.”

  • BAHUWIYONGERA SYLVESTRE
  • Gashyantare 24, 2024
  • Hashize amezi 2
TANGA IGITEKEREZO
Theobard says:
Gashyantare 25, 2024 at 10:41 am

Abaturage babuze ibyabo bihangane ark ubuyobozi bwa karere bubafashe kuko bafite uruhombo rukomeye cyane

Andika igitekerezo

AMATEGEKO AGENGA IYANDIKA RY'IGITEKEREZO CYAWE