Rusizi: Urwibutso rwa Jenoside rwa Kamembe rwari mu kizima rwacaniwe

  • BAHUWIYONGERA SYLVESTRE
  • Gashyantare 29, 2024
  • Hashize amezi 2
Image

Nyuma y’igihe kirekire abarinda Urwibutso rwa Jenoside rwa Kamembe bavuga ko bagorwa no kurucungira umutekano ruri mu kizima, kuri ubu barashimira ko Imvaho Nshya yabakoreye ubuvugizi ikibazo kigakemuka, hakongerwa amatara manini abonesha hose.

Iki kibazo bakigaragarije Imvaho Nshya mu kwezi k’Ukuboza 2023, basaba ubuvugizi ngo ubuyobozi bubone ko ari ikibazo cyihutirwa, bavuga ko bibagora gucunga umutekano.

Urwibutso hafi ya rwose rwari mu kizima, bakaba baragaragazaga impungenge ko hari uwabaca mu rihumye akarwangiza cyangwa akiba ibendera ry’Igihugu rihari.

Kuri ubu abarurinda baravuga ko mu minsi yakurikiye uku gutabaza, ubuyobozi bw’Akarere bwahashyize amatara icyenda manini yaka neza, impungenge bari bafite  zirashira.

Ubu ngo banashobora kwicara bagapanga akazi babona ibice byarwo byose, bagenda ntacyo bikanga, cyaba icyo bakandagira cyangwa uwabatera mu gicuku batamubonye.

Habiyaremye Emmanuel, umwe muri abo barinzi, yagize ati: “Turi abazamu babiri b’ijoro. Twarabashimiye ku buvugizi mwadukoreye n’uburyo ubuyobozi bwihutiye gukemura iki kibazo cyari gihangayikishije cyane, ari kuri twe barurinda, ari no ku bafite ababo barushyinguyemo, barunyuragaho ari ikizima gisa, babona ababo  barushyinguyemo badahawe agaciro bagombye guhabwa, kandi aha ari ahantu ho kubahwa cyane, hakwiye kuba habona.”

Agaruka ku ngorane bahagiriraga, yagize ati: “Habaga udutara 2 ku nyubako tutabona neza. Ahandi hose ari ikizima gisa, Dukoresha imbaraga nyinshi cyane zo kurara tuzenguruka ahatabona, haba ari nko mu mvura cyangwa mu mwijima bikaba ibindi bindi.”

Yunzemo ati: “Washoboraga no kuba wakandagira inzoka mu busitani utayibonye ikaba yakurya, cyangwa ugatsitara, cyangwa umugizi wa nabi akaba yagira aho yihisha tutamubonye akarwangiza, cyane cyane ko nta n’amatoroshi twagiraga n’udutelefoni hakaba igihe umuriro ushizemo ntitugire icyo tudufasha.”

Nambajimana Moise na we ati: “Rwose bimeze neza n’urushinge warubona. Hasigaye gushyiraho urugi rwo ku muryango, ntihagire uhinjira nk’uwinjira mu isoko, no kurusiga amarangi kuko bigaragara ko aruriho yanduye.  Turahagarara mu gice kimwe tukaruzengurutsa amaso hose tukabona nta kibazo, mu gihe no kureba ukuri imbere gato bitashobokaga.”

Umuyobozi w’Akarere ka Rusizi Dr Kibiriga Anicet, avuga ko urwo rwibutso ari u rw’Akarere, bityo bibareba kurwitaho mu buryo bwose, aho ikibazo kimenyekaniye bihutiye kugikemura.

Ati: “Ruracaniye neza cyane. Uyu munsi hose harabona, si ngombwa kongeramo andi matara ku yahashyizwe, arahagije. Turasaba abarurinda cyangwa abafite ababo barushyinguyemo, ko igihe hari ikibazo babona gihari cyadusaba gukemura bajya bahita batubwira kugira ngo tugikemure kare.”

Urwibutso rwa Jenoside rwa Kamembe rushyinguyemo imibiri 1010 y’inzirakarengane zishwe muri Jenoside yakorewe Abatutsi muri Mata 1994.

Abarinda uru Rwibutso barasaba Akarere kubashyiriraho urugi ku marembo
  • BAHUWIYONGERA SYLVESTRE
  • Gashyantare 29, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE