Rusizi: Urwibutso rwa Jenoside rwa Kamembe ruri mu kizima

  • BAHUWIYONGERA SYLVESTRE
  • Ukuboza 5, 2023
  • Hashize amezi 6
Image

Abarinda Urwibutso rwa Jenoside yakorewe Abatutsi rwa Kamembe mu Mujyi wa Rusizi, bavuga ko bibagora gucunga umutekano warwo nijoro kuko igice cyarwo kinini kiri mu kizima uretse uretse inyubako yonyine.

Mu masaha y’ijoro, ubusitani bwose buba buri mu kizima, ndetse hakiyongeraho ko no munsi y’urwibutso na ho hakaba haba umwijima mwinshi cyane kandi hakaba ari ahantu hatanazitiye.

Mu kiganiro n’Imvaho Nshya, bavuze ko ubundi urwibutso rwa Jenoside ruri mu mujyi nk’urwa Kamembe Atari rwo rukwiye kuba ruri mu kizima ndetse rukaba rutanazitiye mu rwego rwo kurubungabungira umutekano.

Umwe mu barurinda nijoro utarashatse ko amazina ye atangazwa, yagize ati: “Ikizima kimeze gutya nta n’uruzitiro ruhari igice cyo hepfo, nta n’amatara yo ku muhanda muri kiriya gice, namwe murumva ko ari ikibazo gikomeye cyane. Sinzi niba abayobozi ku Karere batagira umunsi banyura hano ngo babirebe kuko buri wese uhageze, cyane cyane abafite ababo barushyinguyemo  batubwira ko bibababaza cyane.”

Avuga ko nijoro hakora abazamu babiri, ku manywa hagakora umwe. Icyo kizima bakoreramo habona amatara yo ku nyubako gusa, n’inyuma yarwo agace gato, bavuga ko bararana impungenge ko hari nk’umugizi wanabi wabinjirana muri ubwo busitani burimo ibiti byinshi bikabagora kumubona no kumukumira.

Mugenzi we ati: “Urwibutso rwa Jenoside yakorewe Abatutsi ntirukwiye kugira ubusitani bwijimye gutya kandi ni harehare, amatara ari ku nyubako gusa, ahandi hose ni uku turara kandi ntibikwiye, ku rwibutso nk’uru rwegereye Ibiro by’Akarere, abayobozi barahanyura. Bikubitiraho n’ikizima kiri kuri Sitade kandi hegeranye, bikarushaho gutera ubwoba.”

Banasaba ko n’agahanda ko munsi yarwo kagira amatara kuko nk’uwahategera undi atabura kumukomeretsa ntibamubone, bakabifata nk’amakosa akomeye y’ababishinzwe yagombye gukosorwa byihuse.

Uhagarariye Ibuka mu murenge wa Kamembe Kayigire Vincent, avuga ko bwaba ari uburangare bukomeye kuko hari igihe Ibuka yigeze kujyanayo n’ikipe y’Umurenge bareba aho iyi nyubako y’urwibutso yisataguye ahagana inyuma, icyo gihe ngo basanze amatara yaka.

Itara riri ku nyubako y’urwibutso ntirishobora kubonesha mu busitani bwose

Ati: “Birasaba ko tujya kureba ahari ibibazo kuko habagamo amatara menshi mu busitani, agacanwa gusa igihe cyo kwibuka kubera ko muri ibyo bihe ari bwo abantu baba bahagendagenda cyane, nyuma insitalasiyo zimera nk’izigira ibibazo. Niba ari ikibazo hakorwa ubuvugizi amatara akongera gushyirwamo neza hakabona.”

Avuga ko ibivugwa n’aba bazamu byumvikana kuko na we asanga urwibutso rudakwiye kuba mu kizima gutyo, ko bigiye gukurikiranirwa hafi.

Avuga ko nka 80% y’ibyakozweho mbere byose ari imbaraga z’abaturage b’Umurenge wa Kamembe, rukoreshwa n’Imirenge ya Kamembe, Gihundwe na Mururu, yose igize Umujyi wa Rusizi.

Yavuze ko ubuyobozi bw’Akarere ka Rusizi bwari bwabemereye gukora ibindi bisigaye batashoboye kwikorera, bityo ikibazo cy’ayo mataraari gikwiye kuba ikibazo.

Ati: “Uretse n’amatara nta n’ubwo runazitiye ngo rurangire, nta rugi rwo ku irembo rugira, nta n’uwamenya ko ari urwibutso rwa Jenoside yakorewe Abatutsi atarwegereye kuko bitanditseho, nta n’amazina y’abarushyinguyemo yanditseho uretse ikimenyetso cy’urumuri gusa gihari. Wagira ngo ni inzu isanzwe y’umuturage urebeye inyuma bikaba baikwiye gukosorwa.”

Yarakomeje ati: “Ngira ngo rero ubwo Akarere kari katwemereye kubikora, twakongera tukakibutsa, bitakunda tukabona gushaka uburyo twakongera kwisuganya nk’abaturage b’Umurenge wa Kamembe dukore ibyo dushoboye, ariko bibaye byiza ibyo akarere karwemeyeho kabikora,rukaba urwibutso koko rubumbatiye amateka ya Jenoside yakorewe Abatutsi yabereye muri uyu mujyi.”

Avuga ko hari  byinshi birukeneweho,kuko  nta n’ibyo kuruhukiraho ,nka matora n’ibindi ku wagira ikibazo yaje kwibuka abe,byose agasanga bihashyizwe byarushaho kuba byiza.

Umuyobozi w’Akarere ka Rusizi Dr Kibiriga Anicet, avuga ko batari bazi ko rufite ibyo bibazo kuko iyo barunyuzeho babona rubona, ko bagiye kubireba bakabikemura. Ati: “Nari nzi ko amatara twahashyize abonesha mu busitani kuko afite imbaraga, ariko twareba ikibazo gihari tukagikemura.”

Urwibutso rwa Jenoside rwa Kamembe rushyinguyemo imibiri 1010 y’abishwe muri Jenoside yakorewe Abatutsi muri Mata 1994. Ubuyobozi bw’Akarere buvuga ko ibibazo byose Umuryango Ibuka ugaragaza bigeye gusuzumwa bigakemurwa.

  • BAHUWIYONGERA SYLVESTRE
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE