Rusizi: Umusore w’imyaka 29 yapfiriye mu kabari k’urwagwa

  • Imvaho Nshya
  • Ugushyingo 10, 2023
  • Hashize amezi 7
Image

Iradukunda Eric w’imyaka 29 wakoraga akazi ko gucunga isoko rinini rya Kamembe mu Mujyi wa Rusizi, yasanzwe mu kabari yapfuye  nyuma y’uko yari amaranyemo amasaha ane n’umugore w’undi mugabo basangira urwagwa.

Bivugwa ko yasohotse mu kabare umwanya muto inzoga zamurenze ariko kugaruka bikamunanira, bamufasha kugaruka mu cyumba aho bamuryamishije agahita ashiramo umwuka.

Umunyamabanga nshingwabikorwa w’Umurenge wa Kamembe, Iyakaremye Jean Pierre yabwiye Imvaho Nshya ko uyu musore ukomoka mu Kagari ka Kamanu, Umurenge wa Nyakabuye, yapfuye akiri kumwe nuwo mugore basangiraga byanavugwaga ko yari inshuti ye.

Akabari yaguyemo kaba mu Mudugudu wa Badura. Gitifu   Iyakaremye yavuze ko amakuru bayahawe na nyiri akabari wavugaga ko banyweye igihe kinini akaba yarasohotse agiye kwihagarika no guhagarara bikanga.  

Ati: “Guhagarara byaranze atangira kugenda ashinga intoki ku nkuta, na byo biramunanira agerageje guhaguruka yikubita hasi. Wa mugore basohokanye n’uwo mugore wundi  nyiri akabari baramuteruye bamujyana mu cyumba kitarimo abantu, uwo mugore ategereza ko inzoga zimugabanyukamo bagataha.”

Yakomeje ati: “Bigeze mu ma saa mbiri n’igice z’ijoro, abona yatinze gukanguka, wa mugore basohokanye yagiye kumukangura ngo batahe amukozeho yumva ntanyeganyega, ahuruza abari aho, baje basanga yapfuye. Ni ko guhamagara Umukuru w’Umudugudu, agezeyo  natwe aratubwira tujyanayo n’Inzego z’umutekano dusaga koko yapfuye.”

Avuga ko RIB yahise itangira iperereza, bamwe mu baturage bakavuga ko uyu mugore ashobora kuba hari ibihumanya yamushyiriye mu nzoga bikaba ari byo bimwishe kuko we  babonaga agifite imbaraga.

Gitifu Iyakaremye avuga ko bibabaje cyane kubona umuntu ukora akazi ko gucunga umutekano w’ibicuruzwa birara mu isoko anywa inzoga z’umurengera, aboneraho no kugira inama urubyiruko rwaba rucyishora mu kunywa inzoga n’ibindi biyobyabwenge ko ruba rwiyangiriza ubuzima.

Bibaye kandi nyuma y’iminsi 4 gusa nanone mu kabari ko muri uyu murenge umugabo wari watangiye kunywa urwagwa mugitondo agera mu ma saa yine amaze gusinda yishyura amafaranga 3000 y’amiganano, bamutahuye andi arayatamira arayamira, ahita atabwa muri yombi.

Gitifu Iyakaremye asanga izo nzoga banywa na zo ziba zitujuje ubuziranenge kuko urwo rupfu rubaye mu gihe hafashwe inzoga z’inkorano bigaragara ko zishobora kugira ingaruka zikomeye ku buzima bwa muntu.  

Ati: “Urebye n’uburyo izo nzoga ziba zisa ntizabura kwica uzinyoye. Nk’ubwo uwo musore yapfuye tumaze akanya dufashe litiro 240 z’inzoga utamenya ibyazo, zigera muri uyu mujyi ziturutse mu Mirenge ya Gashonga, Rwimbogo na Nzahaha.”

Bivugwa ko izo nzoga z’inkorano hari ubwo zivangwa n’urwagwa rusanzwe, abaturage babinywa bikabagiraho ingaruka zirimo n’izo kuba bahaburira ubuzima.

Yagize ati: “Tukabasaba kunywa nke nziza zitari izo zibica kuko kunywera gupfa atari bwo bugabo.”

Uwo mugore wasangiraga n’uwo musore n’uwacuruzaga urwo rwagwa, umukozi we n’undi mugabo,  bahise batabwa muri yombi bakaba bafungiye kuri Sitasiyo ya RIB ya Kamembe.

BAHUWIYONGERA SYLVESTRE

  • Imvaho Nshya
  • Ugushyingo 10, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE