Rusizi: Umukozi w’ikigo gicukura nyiramugengeri yapfiriye mu kiraro yasiburaga

  • BAHUWIYONGERA SYLVESTRE
  • Mutarama 11, 2024
  • Hashize amezi 2
Image

Nkomayombi Oscar w’imyaka 57 wakoreraga ikompanyi REC Ltd (Rwanda Energy Company) icukura nyiramugengeri mu gishanga cya Gishoma, yapfiriye mu kiraro yarimo agomororera amazi ngo ahite ari muri ako kazi.

Uyu mugabo wari utuye mu Mudugudu wa Murindi, Akagari ka Nyenji, Umurenge wa Nzahaha, Akarere ka Rusizi, ni umwe mu bakozi b’iyo sosiyete icukura nyiramugengeri ikoreshwa mu Ruganda rwa Nyiramugengeri rwa Gishoma.

Nyiramatama Francine, Umugore wa Nkomayombi, yabwiye Imvaho Nshya ko ibyo byago byabaye ahagana saa tatu z’igitondo cyo ku wa Gatatu tariki ya 10 Mutarama, ubwo bari bagiye gusibura ikiraro cyari cyarengewe n’amazi mu gice cy’iki gishanga kiri mu Mudugudu wa  Kibombwe, Akagari ka Rusayo, Umurenge wa Gashonga.

Icyo kiraro cyagombaga gusiburwa kugira ngo abagenzi bahanyura baremye isoko rya Gishoma babone uko batambuka n’imodoka nini zihanyura zijya kuzana nyiramugengeri zibone inzira.

Ati: “Ubwo barimo bagerageza gusibura umuferege ugabanya amazi kuri icyo kiraro cyari cyarengewe kubera imvura nyinshi yari yaraye igwa ijoro ryose, yanyereye ku giti kimwe cyacyo, agwamo imbere ahagaze, amaguru afatwa n’ibyuma by’imireko iyobora amazi birimo hasi kuko yari yarazibye bashaka kuyizibura ngo amazi atambuke, bagerageza kumukuramo birananirana.”

Yavuze ko abo bari kumwe bashatse uburyo bashakira ayo mazi indi nzira ariko kubera umuvumba mwinshi yari afite aramurengera barangiza kuyashakira indi nzira we yamaze gushiramo umwuka.

Nyiramatama yashimiye iyi kampani umugabo we yari akoreye imyaka 3 yose, ko ari yo yishingiye ibigenda mu ishyingura ry’umugabo we, ikanamwizeza impozamarira izamutunga n’umuryango we usigaye urimo  abana biga.

Ati: “Twabifashe nk’impanuka isanzwe ari yo mpamvu umurambo we wahise uzanwa hano mu rugo gushyingurwa, utiriwe ujyanwa mu Bitaro bya Mibilizi gukorerwa isuzuma kandi icyamwishe cyagaragaraga.

Turashima gusa iyi kampani yakoreraga uburyo yadutabaye bigaragara muri uru rupfu kandi turayisaba kwihutisha n’iyo mpozamarira, cyane cyane ko umwe mu bayobozi bayo wari uhari yambwiye ko bitazatinda ntibinansabe kuyisiragiraho.”

Nyakwigendera asize umugore, abana 7 n’abuzukuru 4.

  • BAHUWIYONGERA SYLVESTRE
  • Mutarama 11, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE