Rusizi: Ryankana bafite amashanyarazi ya baringa

  • BAHUWIYONGERA SYLVESTRE
  • Mutarama 23, 2024
  • Hashize amezi 4
Image

Abaturage b’Akagari ka Ryankana n’igice kimwe cya Pera mu Murenge wa Bugarama, Akarere ka Rusizi, ubuyobozi bw’ishuri ribanza rya Ryankana na santere z’ubucuruzi bakuruye umuriro ari abantu 50 nyuma abaturage bandi bafatira kuri izo nsinga none umuriro wabaye muke bari mu icuraburindi.

Abahatuye bakomeza basobanura ko bigshyize hamwe ubwabo bakurura umuriro wari ugenewe konteri 50 batanga miliyoni 39 z’amafaranga y’u Rwanda.

Nyuma n’abandi baturage baje gufatiraho usaranganywa konteri 5 800, umuriro uba muke ku buryo byatumye uba nk’uzimye, wanaza ukajya ucikagurika ukanabangiriza ibikoresho bituma bawureka burundu, ubu bari mu kizima no kwiteza imbere bari bagambiriye birangirira aho.

Ngirimana Emmanuel ucururiza muri santere y’ubucuruzi ya Ryankana yagize ati: “Turi mu bihe bibi cyane rwose kandi aha ni ahantu hashobora kuboneka amafaranga menshi natwe dukunda umurimo no kwiteza imbere, ariko amashanyarazi atubereye ihwa mu kirenge. Nta na kimwe dushobora gukora kandi kano gace gafite santere z’ubucuruzi nyinshi, zose ziri mu icuraburindi.’’

Yongeyeho ko babisabye ubuyobozi kubongerera ingano y’umuriro w’amashanyarazi bagategereza bagaheba ku buryo bwabemereye ko mu mezi atatu igisubizo kiboneka none hashize imyaka irenga 5 barategereje baraheba.

Banavuze ko bibangamira iterambere ryabo by’umwihariko bituma urubyiruko rutabasha kwihangira imirimo irimo nko gusudira, kogosha, kuzana imashini zisya ibinyampeke,n’ibindi bikenera amashanyarazi. Ikindi kandi n’Ibiro by’Akagari kabo ntibitanga serivisi zikenera  amashanyarazi kuko  adahari.

Mukundiyukuri Samuel utuye mu Mudugudu wa Muyange, Akagari ka Ryankana avuga ko bibabaje cyane kubona abaturage birwanaho, bagatanga ziriya miliyoni zose [….] , none amapoto yarashaje, yatangiye kugwana n’insinga.

Ibiti bimwe byarashaje bitangira kugwa ntibyasimbuzwa

Ati: “Nk’ubu abana bacu ntibashobora gusubiramo amasomo nimugoroba kuko ari ku ishuri nta mashanyarazi ahari, banagera mu ngo bakayabura, bikaba imvano y’amanota make babona. Urangije imyuga nta kintu na kimwe yakorera hano kandi aba yatanzweho menshi yiga.

Twagombye kugurira abana bacu imashini zifotora, cyangwa kubafasha bizinesi yo kuvanga imiziki ariko ntibishoboka. Ntidushobora kwambara umwenda uteye ipasi cyangwa ngo tuniyogosheshereze hano, byose ni ibibazo.’’

Umuyobozi w’ishuri ribanza rya Ryankana Rév. Past Habaguhirwa   Anastase na we avuga ko imyigire y’abanyeshuri ibangamiwe bikomeye n’iri bura ry’amashanyarazi.

Ati’’ Turagerwaho n’ingaruka zikomeye cyane z’iki kibazo.  Abarimu baracyatanga imyitozo ku kibaho kubera kutabona uburyo bayandika muri mudasobawa ngo bayishyire ku mpapuro, bayikwirakwize mu banyeshuri. Abanyeshuri ntibashobora gusubiramo amasomo nimugoroba na mugitondo cya kare kuko haba hatabona. Nijoro haba ari mu icuraburindi ku buryo n’abazamu bacu imikorere ibagora.”

Yunzemo ati: “Dufite imprimante n’imashini ifotora ariko buri munsi dutanga amafaranga arimo 2000 bya moto byo kujya muri Cité no kugaruka tugiye gufotoza amaraporo, ibizamini n’andi mabanga y’akazi tutazi niba yisigarira aho twafotoreje kuko bidashobora kubura nubwo tugerageza kubicungira hafi.”

Yavuze kandi ko abanyeshuri biga mudasobwa mu magambao ,kuvuga ko umwana yaharangiza  hari icyo azi kuri mudasobwa kwaba ari ukubeshya rwose. Ikindi yagarutseho ni uko habonetse amashanyarazi muri iri shuri,impinduka mu mitsindire  n’ikoranabuhanga zakwigaragaza.

Umuyobozi wa REG ishami rya Rusizi Kiiza Francis, abizeza ko uyu mwaka urangira gikemutse.

Ati: “Natwe rwose nka REG bariya baturage baraduhangayikishije kandi ikibazo cyabo kirazwi. Inyigo yarakozwe, byafashe miliyoni 903, uyu mwaka bizakorwa, rwose ndabibijeje. Ari ririya shuri, santere z’ubucuruzi zihari n’abaturage bafite icyo kibazo uyu mwaka urarangira basubijwe.”

Umuyobozi w’Akarere ka Rusizi, Dr Kibiriga Anicet na we yijeje ikurikirana ry’iki kibazo, kimwe n’ibindi bice bitagira amashanyarazi, cyane cyane ku nyubako z’Ibiro by’Utugari n’amashuri, ku buryo uyu mwaka uzarangira ahenshi hari ibibazo nk’ibi byakemutse.

Abanyeshuri biga ku kigo cy’amashuri cya Ryankana ntibiga neza kubera kutagira umuriro w’amashanyarazi
  • BAHUWIYONGERA SYLVESTRE
  • Mutarama 23, 2024
  • Hashize amezi 4
TANGA IGITEKEREZO
Hafashimana Claude says:
Mutarama 23, 2024 at 4:48 pm

Igitekerezo cyange
Nuko abashinzwe amashanyarazi mu karere ka rusizi batugirira impuhwe natwe bakaduha amashanyarazi kuko tumaze igihe haza abayobozi bakomeje ( abadepite,abaminisitri,abagaba bingabo,……………….)bakahava batwijene mugihe gito baduha amashanyarazi ariko tugaheba ubu tubayeho nabi cyane ubu serivis nyinshi ntabwo tuzibona byihuse(nk,izirembo,gufotoza,gusudira,…..nibindi bituruka kumashanyarazi
Ubu ntitukimenya aho igihugu kigeze mwiterambere kuko television,radio twarazibitse ntitucyumva amakuru cg ngo tuyarebe nibyishi twavuga icyo dusaba mudukure mubwigunge mwadukoreye byinshi turabishima ariko mukomeze mutubere bayobozi bacu
Marakoze

Andika igitekerezo

AMATEGEKO AGENGA IYANDIKA RY'IGITEKEREZO CYAWE