Rusizi: Ruhurura yabashyize mu manegeka bayibona nk’ikirunga kigiye kuruka

  • Imvaho Nshya
  • Ugushyingo 8, 2023
  • Hashize amezi 4
Image

Abaturage b’Umudugudu wa Cyapa, Akagari ka Burunga, Umurenge wa Gihundwe, Akarere ka Rusizi, baravuga ko ruhurura baturiye ntaho itaniye no gutura hejuru y’ikirunga gishobora kuruka umwanya uwo ari wo wose, kuko iyo imvura iguye baba bikanga ko ishobora kubatwarana n’ibyabo byose.

Iyo ruhurura yavutse isanga abaturiye nyuma y’aho hubakiwe Gare ya Rusizi, isanwa ry’Umuhanda Rusizi-Kigali ndetse n’iyubakwa ry’umuhanda wa kaburimbo Murangi- Cyapa.

Iyo ruhurura ifite uburebure bwa metero 200 uvuye aho ihereye ukagera aho isoreza, yahise ivuka mu buryo butunguranye ku buryo imaze kuhacukura mu buryo bugaragara.

Abayituriye bavuga ko yahabasanze, itangira ari utuzi duke tuva mu  muhanda munini Rusizi-Kigali tunyura iruhande rw’inzu zabo twerekeza mu gishaga cya Gacamahembe.

Bavuga ko batagishyitsa imitima mu gitereko kuko aho bigeze inzu zabo zishobora kuzisanga mu gishanga umwanya uwo ari wo wose.

Nsabirema Cyprien uvuga ko ahamaze imyaka 6, avuga ko adashobora gushyira umutima hamwe mu gihe aharerera abana bane bato bakunda kuyikinira hejuru kandi amazi ahanyura aba ahurura cyane ku buryo gutwara umuntu byoroshye cyane.

Ati: “Ni ruhurura twibaza niba mu by’ukuri ubuyobozi buyizi cyangwa bwaravuganye n’abayoboreye aya mazi yose hano ngo bayubake, kuko imeze nabi cyane. Abana bacu bayikinira hejuru kuko nta handi bakinira kandi baba bari mu rugo. Haruguru hari sitasiyo ya lisansi na yo ishobora kugwa umwanya uwo ari wo wose kuko  iregetse kandi yahubatswe bareba. Twaheze mu gihirahiro.”

Iyi ruhurura yatangiye ari amazi make atemba none ikomeje gucukuka ku buryo iteye inkeke abaturage bayituriye

Nyirahabimana Berthe w’imyaka 71, uhabana n’umukazana we n’abuzukuru be 3, avuga ko amaze igihe adatora agatotsi bitewe n’amazi ahanyura ahorera cyane iyo imvura imaze kugwa, akavuga ko ubwiherero bwe umwanya uwo ari wo wose bwagenda n’inzu ye ikagerwaho.

Ati: “Reba urwobo meze nk’uwicaye hejuru n’iyi myaka mfite kandi mbere nta kibazo twari dufite rwose. Ubuyobozi bwagiye buza, butwizeza ko igiye kubakwa none reba uko imaze kungana. Ubwiherero bwo urabona ko buri nko ku manga. Bari batwijeje ko nibarangiza gukora uriya muhanda wa kaburimbo bazayidukorera. Ubu koko amafaranga bahantanga ahwanye n’ubuzima bw’abahatuye bungana butya? Kuki tudatabarwa?”

Kamana Elias, Umukuru w’Umudugudu wa Cyapa basangiye   impungenge, avuga ko iki kibazo Akarere kakizi neza kuko hari inama yagiyemo bakakivugaho, agataha azi ko kigiye gukemuka.

Ati: “None se nyine ubutabazi buzaboneka hari abo yishe? Ni ruhurura itera ubwoba uyigezeho wese. Umuyobozi ukunda abaturage rero ntiyagombye kuryama ngo asinzire baraye nka hariya, mu mvura imeze nabi gutya, iteza ibiza henshi. Akarere nigatabare cyangwa gatabarize abaturage kuko simpamya ko no muri bariya bayobozi hari uwayirara hejuru ngo asinzire.”

Ndagijimana Louis Munyemanzi, Umuyobozi wungirije w’Akarere ka Rusizi ushinzwe iterambere ry’ubukungu, avuga ko iyo ruhurura ayizi n’amanegeka yashyize mu bayituriye ayazi.

Yemeje ko barimo gutekereza kuyubaka ariko ko ingengo y’imari ibabereye inzitizi, cyane cyane ko atari yo yonyine hari izigera kuri eshanu ziteye inkeke mu Karere ka Rusizi.

Ati: “Byose turabizi natwe turahangayitse kuko abantu ntibatura ku manga nk’iriya uri umuyobozi, mu bihe nk’ibi by’ibiza ngo uvuge ko utabizi. Si iyo yonyine, mu Karere dufite 5 zihangayikishije. Dufite ikibazo cy’aho twakura amafaranga yo kuzubaka kuko zose hamwe zatwara atari munsi ya miliyoni 200. Turacyavugana n’inzego ziduha ubushobozi ngo turebe ko zatwunganira, ariko iyo yo izakorwa umwaka utaha w’ingengo y’imari.”

Avuga ko n’izo zindi zitazarenza imyaka 2 zidakozwe, agasaba abazituriye kurinda abana babo kuzikinira iruhande n’abazinyuraho kwitonda, kuko hari izimeze nabi cyane.

Nsabirema Cyprien avuga ko inzu ye iri hafi guhirima, abana bakinira hejuru ya ruhurura kandi bari mu rugo
Abahaturiye bavuga ko iyo sitasiyo ya lisansi iramutse ihurimye, batazi ibyababaho uko bimeze

BAHUWIYONGERA SYLVESTRE

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE