Rusizi: Nkunganire ya Leta ku ifumbire yakuye ahaga abahinzi b’umuceri

  • BAHUWIYONGERA SYLVESTRE
  • Mata 3, 2024
  • Hashize ibyumweru 2
Image

Abahinzi b’umuceri mu kibaya cya Bugarama bibumbiye muri Koperative Ejo heza Muhinzi w’umuceri (KEHMU) barashimira Perezida Kagame kuri nkunganire bahabwa na Leta ku ifumbire bavuga ko yabakuye ahaga, bakemeza ko umusaruro babona ubu utari gushoboka iyo itahaba.

Nkunganire bamaze igihe bahabwa biciye muri MINAGRI,aho,ku giciro gisanzwe  cy’ifumbire, hari ayo Leta ibunganiraho kugira ngo bayikoreshe uko yateganyijwe, bongere umusaruro,bakavuga ko mbere yo kuyibona wari muke, kuko hari abatarayikoreshaga cyangwa bagakoresha nke cyane bavuga ko batayibona.

Muri iki gihembwe cy’ihinga 2024B, ku mabwiriza yatanzwe na MINAGRI, nk’uko umwe mu bagoronome bakorana n’abahinzi b’umuceri mu kibaya cya Bugarama yabitangarije Imvaho Nshya, ibiciro kuri Nkunganire byorohereza abahinzi.

Yagize ati: “Nk’ifumbire ya NPK 17-17-17, aho ikilo kigeze ku mafaranga 1266, umuhinzi atanga 684, Leta ikamwunganiraho 582 ahwanye na 46%, mu giye iya Ire (UREA) igura amafaranga 1000, umuhinzi atanga 660 Leta ikamwunganiraho amafaranga 340, ahwanye na 34%.

Iyi nkunganire ya Leta iri mu makoperative yose uko ari 4 ahinga umuceri mu kibaya cya Bugarama, abahinzi bo muri KEHMU baganiriye n’Imvaho Nshya, bavuze ko yabakuye ahaga, kuko kuva igishanga kimaze gusaranganywa mu 2011, yabafashije cyane mu byo bagezeho, bakesha umusaruro babona.

Nyirahirwa Anifa ufite abana 5 arihira amashuri abikesha ubuhinzi bw’umuceri, avuga ko iyo iyo nkunganire itabaho, atari kubona umusaruro warihira aba bana bose ngo n’abasigaye mu muryango babone ikibatunga.

Ati: “Mpinga kuri Are zirenga 20. Koperative impa ibilo 42 bya NPK 17-17-17 n’ibilo 23 bya Ire, bihwanye n’ubuso bwanjye. Amafaranga tuyitangaho ni make ugereranyije n’ayo twagombye gutanga kubera iyo Nkunganire. Umusaruro nabonaga ubu wikubye gatatu. Ndashimira cyane Umukuru w’igihugu cyacu Paul Kagame wadutekerejeho, akayiduha.’’

Avuga ko ivuyeho adashobora kubona amafaranga agura ifumbire yose akenera ku giciro cyaba kiriho, akaba yahinga atayishyizemo, umusaruro yabona ntugire icyo umumarira, ariko ubu iyo atanze ayo asabwa, asigaye ayishyurira abana mituweli, ntabunze imitima.

Ndagijimana Théophile uhabwa ibilo 54 bya NPK 17-17-17 n’ibilo 31 bya Ire ku buso bwa Are 29, avuga ko iyo hatabaho Nkunganire atari bwigondere ifumbire.

Ati: “Rwose ntayibonye byangora kuko kuvuga ngo nabona agura ifumbire yose nkenera, sinabihamya. Iyo tutagira Umukuru w’I gihugu ureba kure ngo agikemure, ndahamya ko nta musaruro tuba tubona. Ni yo mpamvu kumva ko ibyo yadukoreye tubishima natwe bidushimisha cyane.’’

Umuyobozi wa KEHMU, Twagiramungu Jean, avuga ko ku bahinzi 2 161 bahinga umuceri ku buso bwa hegitari 470, bakoresha ifumbire nyinshi, mbere bakaba barahingaga mu kajagari, bamwe bagakoresha agafumbire gake katagize icyo kamaze, abandi bagahingira aho.

Ati: “Iyi nkunganire ni iyo gushimira cyane Perezida wa Repubulika, kuko rwose uruhare rwa Leta rutagiyeho muri ubu buhinzi hazamo ikibazo gikomeye cyane. Bamwe bagurishaga umuceri bakayamara, ihinga rikazagera nta fumbire bafite. Bagahinga bakarinda basarura nta gafumbire na gake bakoresheje, umusaruro ntuboneke.’’

Umuyobozi Mukuru wa RAB Dr Ndabamenye Tésphore, yatangarije Imvaho Nshya ko gahunda ya Nkunganire Leta iyishyiraho mu rwego rwo kunganira abahinzi kuko ifumbire ihenze ku rwego mpuzamahanga.

Ati: “Irahenze kandi abaturage bacu ntibaragira ubushobozi buhambaye bwo kuyigurira ni yo mpamvu nkunganire ya Leta ikomeje. Ifasha mu kwiyongera k’umusaruro kuko bayikoresha cyane. Utabunganiye ntibabasha kuyigura kandi batayiguze umusaruro ntiwaboneka kandi turawukeneye cyane’’

Yabasabye kubyaza umusaruro aya mahirwe Leta ibaha, bongera umusaruro mu bwinshi no mu bwiza, bakanawufata neza, uwo bagurishije amafaranga bakuyemo ntabapfire ubusa.

Ifumbire ya ire (UREA)
  • BAHUWIYONGERA SYLVESTRE
  • Mata 3, 2024
  • Hashize ibyumweru 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE