Rusizi: Igice cy’igishanga cya Gacamahembe cyahindutse nk’ikiyaga

  • BAHUWIYONGERA SYLVESTRE
  • Mutarama 21, 2024
  • Hashize amezi 4
Image

Abahinga mu gishanga cya Gacamahembe bo mu Mirenge ya Kamembe na Gihundwe mu Karere ka Rusizi, bararira ayo kwarika nyuma y’uko igishanga bahingagamo imyaka inyuranye cyahindutse nk’ikiyaga ku buryo ntacyo bazasaruramo. Barasaba Akarere ko kareba uburyo cyatunganywa.

Abagihingamo bavuga ko nyuma y’aho ikorwa ry’imihanda ya kaburimbo amazi yerekejwe muri za ruhurura ziyamanurira muri icyo gishanga, n’umuhanda Badive- Shagasha  urimo ‘ Bize’ yatumaga ayo mazi akomereza mu kindi gishanga ikaziba kubera ibyondo byinshi, amazi yose agera kuri iyo Bize akagaruka mu gishanga   byatumye igishanga cyuzurirana, imyaka yose irarengerwa kuri Hegitari 3.

Abahinzi bavuga ko ku gice cy’Umurenge wa Kamembe harengewe ibigori, imboga n’amateke kuri  Hegitari imwe, mu gice cy’uwa Gihundwe harengerwa ibigori n’imyumbati ku gice cy’ahangana na Hegitari 2, amazi akaba yarahabaye nk’ikiyaga,imyumbati imwe n’amateke birabora,n’ibigori biruma.

Mukahirwa Patricie utuye mu Murenge wa Gihundwe,avuga ko icyo gishanga ari cyo yacungiragaho imibereho y’abana be 5 umugabo amaze imyaka 8 yaramutanye.

Ati: “Nari niteze gusarura nibura imifuka 3 y’ibigori bihunguye twanabonye ibyo twotsa tukanateka. Urabona ko nTashobora no gukandagiramo kuko amazi yabirengeye byose, n’uwajyamo yamutwara.  Nubwo twajyaga tugira ibibazo nk’ibi ariko amazi ntiyageraga aha, yanahitaga akama ariko aya agiye kumara ibyumweru 3 atagabanyuka.”

Mukahirwa Patricie avuga ko ibigori byose yari yarahinze byarengewe n’amazi nta na kimwe azasarura

Yarakomeje agira ati’’ Ikibabaje ni uko tutagiraga ubwishingizi,ubu uretse ubuyobozi bwatugoboka, nta yindi mibereho kuko nkanjye kuva umugabo yantana abana 5 akigendera nari mbatungishije ibituruka hano. Twafashe ifumbire ya Tubura ,kuko njye nari nafashe iy’amafaranga 40.000 ngura n’imborera y’amafaranga 60.000, nshyiramo n’abakozi none ntahiye aho.’’

Abaturiye iki gishanga bivugwa ko cyari gifatiye runini abatuye uyu mujyi wa Rusizi kubera imyaka myinshi yakibonekagamo, bakaba batanizeye guhinga mu ihinga ritaha kuko aya mazi adakama, bavuga ko na bo bahombye kuko bahaguriraga byinshi bibatunga.

Kubwimana Emmanuel ati: “Natwe nk’abagituriye tutagihinga ariko twahahaga umusaruro waho turahahombeye cyane. Cyahingwagamo ibigori, ubutaha hakajya imboga n’ibindi kandi byinshi cyane ku buryo nta kibazo cyo kubihaha byeze twagiraga, ntitwirirwaga tujya ahandi.  Ubu guhaha bibaye ikibazo.”

Ikindi abagituriye bavuga ko kibahangayikishije kuruta n’uwo musaruro, ngo ni imibu yatangiye kororokeramo ishobora kubatera indwara ya malariya bari bamaze gusa n’abibagirwa, n’imisundwe ishobora kubatera izindi ndwara, cyane cyane ko hari agasoko k’amazi meza abatayafite bavomaga,kakaba na ko karabaye ibiziba bisa, abahavomaga bagiye kubura uko bagira.

Iyi myumbati yose abayihinze bavuga ko batazirirwa bajyamo

Nyirasafari Gaudance ati: “Iki gice gituwe n’abaturage benshi kandi imibu muri iki gishanga yatangiye kororoka turayibona. Ibindi bisimba nk’imisundwe birahuzuye kandi hafi yaho ni ho abana bacu bakinira, aya mazi araduhangayikishije rwose, nk’indwara ya malariya ishobora kutwibasira igihe byaba bikimeze bitya.

Umuyobozi w’Akarere ka Rusizi, Dr Kibiriga Anicet avuga ko ikibazo bakizi, n’igisubizo bari kugishaka.

Ati: “Ikibazo turakizi n’igisubizo kiri gushakwa, kikazaturuka cyane cyane nk’uko abaturage babivuga ku ikorwa ry’uriya muhanda ukinyuraho werekeza i Shagasha, iyo ‘Bize’ bavuga ikazagurwa ikanakorwa bigezweho, amazi akazabona aho akomereza, kugaruka kwangiriza abaturage bikazaba bitagishobotse, kandi bizakorwa muri uyu mwaka.”

Iki gishanga abagihinga n’abagoronome bagikurikirana buri munsi bavuga ko cyera imboga zirenga toni 40 n’ibigori toni hafi 25 kuri buri musaruro, bakemeza ko kiramutse gitunganyijwe neza  umusaruro ukibonekamo wakwiyongera, n’ibiza nk’ibi biwonona  bikaba amateka, bakanavuga ko bibasigiye isomo ryo gufatira ubwishingizi  ibyo bahahinga kuko batabikoraga.

Igishanga cya Gacamahembe ni igishanga kidatunganyije cya Hegitari 7, gihingwamo n’amakoperative 2, imwe yo mu Murenge wa Kamembe n’iyo mu wa Gihundwe.

  • BAHUWIYONGERA SYLVESTRE
  • Mutarama 21, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE