Rusizi:  Ibicuruzwa mu isoko rya Nyakabuye ahadasakaye byibasiwe n’umwanda

  • BAHUWIYONGERA SYLVESTRE
  • Ugushyingo 22, 2023
  • Hashize amezi 6
Image

Abakorera mu gice kidasakaye cy’isoko rya Nyakabuye mu Karere ka Rusizi baravuga ko bagiye kwicirwamo n’imvura n’umwanda ku biribwa baha ababagurira, kuko iyo imvura iguye, uretse no kubura aho bugama n’ibyo bacuruza byuzuramo amazi n’icyondo bakabura ababagurira, bagasaba ko ryasakarwa.

Igice gicururizwamo imboga n’imbuto, abagikoreramo bavuga ko ubwo mu myaka ishize iri soko ryavugwagamo ibibazo byinshi birimo kuba ryaravaga cyane igice gisakaye, ubuyobozi bw’akarere bwazanye abarikora, bavuga ko baje kurisana, barangije barimurikira Akarere, ariko aba baturage ntibatinya kuvuga ko byakozwe bya nyirarureshwa, bakibaza Umuyobozi ku Karere wemeye kuryakira niba we atarabonaga iki kibazo.

Umwe mu bahacururiza ati: “Ryiswe ko rivuguruwe ariko mu by’ukuri byari ibya mwikize kuko n’ubundi iyo imvura iguye amashahi yose aryinjiramo abantu bakarinyagirirwamo, amazi arivamo, kuko nta nzira yakorewe, ahubwo yerekejwe mu baturage  akajya kubasenyera, ariko akaga gakomeye cyane kaba kuri twe dukorera mu gice kidasakaye”.

Aka kaga avuga ngo ni uko iyo bari gucuruza, batangiye kubona amafaranga ngo barebe ko n’imisoro bakwa bayibona, imvura ikagwa, ibyo bacuruzaga babita bigasigara binyagirirwa hasi baba babishyize, cyangwa ku dutara tw’uduti buri wese yizanira akaza kudushingura atashye akadutahana akazatugarura ku rindi soko, uko babitayemo n’aho birukankiye ahasakaye, abarimo barwana n’amashahi ngo atabanyagirira ibicuruzwa, bakabura aho bugama.

Ucururiza inyanya muri icyo gice kidasakaye ati: “Turabita tukirukira ahasakaye tugasanga n’abahari  barira, bamwe bakanga kutwugamisha ngo turabatera icyugazi tugatuma badahahirwa, kandi koko biba byumvikana, bimwe twataye binyagirwa bikuzuramo amazi n’icyondo kuko biba bicururizwa hasi, bamwe ibyangiritse bagahomba, bagataha. Baritwubakiye twarushaho gukora neza n’iyo misoro ikaboneka”.

Ikibazo ngo ntikiri mu bihe by’imvura nyinshi gusa, kuko no ku by’izuba  ryirirwa ribica, ivumbi ryose ryuzura mu mboga bacuruza, umwanda ari wose, bakabyereka ubuyobozi ariko bagategereza igikorwa bagaheba kandi ari rimwe mu masoko akomeye mu karere.

Umunyamabanga Nshingwabikorwa w’Umurenge wa Nyakabuye Kimonyo Kamali Innocent, avuga ko iki kibazo bakizi kandi koko gihangayikishije abahakorera, abaguzi n’ubuyobozi bw’Umurenge kuko utaba uri umuyobozi ngo ubone abaturage banyagirirwa mu isoko ryagombye kuba ryubakiye ngo wumve byoroshye.

Ati: ’’Icyo nakivugaho ni uko isoko ryubatswe, ryanakiriwe, abaryubatse bararimuritse ariko nk’icyo kibazo cy’amashahi kiza kugaragara nyuma ryaramaze gutangwa, biza no kugaragara ko ritasakawe mu buryo bufatika ni cyo gice abaturage bakomeje kwinubira ko kidasakaye na mba, batekerezaga ko na cyo cyagombye kuba cyarasakawe ngo batanyagirwa, bibaza impamvu bitakozwe kandi kiri mu byari bibabaje cyane”.

Avuga ko atekereza ko byaba byaratewe n’inyigo yakozwe itarakirebye kandi cyari mu byangombwa byagombaga gukorwa, kuko kuvuga ngo uje gusana, ahadasakaye hatari n’ibitara.

Ati: “Ntitwaba tugana mu iterambere ngo abaturage basorera ibyo bakora bakorere ahadashobotse natwe dukomeze tubirebere. Iri soko riri mu mutungo w’Akarere ni ko gakwiye gukemura ibyo bibazo byombi, aho hadasakaye hagasakarwa, n’aho abaturage bavuga ko hasondetswe hagakosorwa, ayo mashahi ntiyongere kubabuza umutekano wo kugura no kugurisha”.

Umuyobozi w’Akarere ka Rusizi wungirije ushinzwe iterambere ry’ubukungu, Ndagijimana Louis Munyemanzi,  avuga ko icyo kibazo atari akizi, ko yari azi ko abarisannye bakemuye ibibazo byose ryari rifite, ko bagiye kurikorera isesengura bakareba icyakorwa kuri ibyo bibura.

Ati: “Ntituzi neza uko bimeze, tuzabikorera isesengura tubirebe, tubone gukemura ibibazo tuzaba twabonyemo. ‘’

Avuga ko ataha abaturage igihe bizaba byakozwe ataramenya uko bimeze n’icyo bisaba, ko baba bihanganye bagategereza ikizava muri iryo sesengura.  

  • BAHUWIYONGERA SYLVESTRE
  • Ugushyingo 22, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE