Rusizi:  Habonetse umurambo w’umugore ku nkengero z’ikiyaga cya Kivu

  • BAHUWIYONGERA SYLVESTRE
  • Mutarama 29, 2024
  • Hashize amezi 4
Image

Kuri iki Cyumweru mu Kiyaga cya Kivu habonetse umurambo w’umugore witwa Nyiransabimana Béatrice w’imyaka 53, wari umaze iminsi 2 yarabuze, hagakekwa ko yaba yiyahuye.

Nyakwigendera yari atuye mu Mudugudu wa Rugaragara, Akagari ka Kinyaga, Umurenge wa Nkanka, Akarere ka Rusizi, wari umaze iminsi 2 yarabuze, nyuma yo kuzinduka mu ma saa kumi n’imwe n’igice ku wa Gatanu tariki ya 26 Mutarama, agasiga umugabo mu buriri atamubwiye aho agiye, bagategereza ko agaruka bagaheba.

Amakuru musaza wa nyakwigendera Habiyaremye Théophile yahaye Imvaho Nshya, ni ay’uko uyu mugore waranguraga imigati i Mwito, mu Kagari ka  Karusimbi, mu Karere ka Nyamasheke, akayinyurana mu Kivu akayigeza ku mukobwa we wayicuruzaga mu isoko rya Hepfo aho ku Nkanka  kandi nta kibazo bazi yari asanzwe afite.

Ati: “Nta kibazo kindi tuzi yari afite. N’imigati yacuruzanyaga n’umukobwa we ni nk’iy’amarenzamunsi kuko yakoreshaga igishoro cy’amafaranga 15 000, acungana n’ayo kurya, utwambaro no kwishyurira abana ayo kurya ku ishuri. Icyakora mbere yo kugenda, mu ma saa munani z’ijoro ryo ku wa 3 rishyira ku wa 4 yabwiye umugabo we ko arimo ideni yumva rishobora kumufungisha, amusaba kurimwishyurira.”

Yongeyeho ati: “Umugabo yatubwiye ko mu kubimubwira atigeze amubwira ari iry’amafaranga angahe, igihe yarifatiye, icyo ryakoze n’uwarimuhaye, cyane cyane ko nta n’uwari wigeze atera hejuru ko yaba arimufitiye.”

Habiyaremye yakomeje abwira Imvaho Nshya ko bwakeye ku wa 4 Nyiransabimana ahamagara musaza we uba mu Karere ka Huye, amubwira nk’uko yaraye abwiye umugabo we, na we ntiyagira ikindi amubwiraho, bombi abashyira mu rujijo babifata nk’ibisanzwe.

Mugitondo cyo ku wa Gatanu tariki 26 Mutarama, mu ma saa kumi n’imwe n’igice z’igitondo, umugore arabyuka, asiga umugabo mu buriri, yambara ibitenge n’umupira utukura, anitwikira mu maso hose asigaza imboni gusa, aragenda, umugabo agira ngo agiye kurangura imigati, kuko n’isoko baricuruzaho ryari bureme uwo munsi.

Habiyaremye ati: “Twese yaraye atubwiye, mugitondo ku wa Gatandatu dutangira gushakisha turaheba, n’abo mu muryango bose turababaza batubwira ko batigeze bamubona. Mugitondo cya kare cyo kuri iki Cyumweru ni ho abarobyi baduhamagaye batubwira ko babonye umurambo ku nkengero z’ikivu, yambaye uko yagiye yambaye.”

Avuga ko ntawe bavuga ko yaba yamwishe, bakeka ko yiyahuye kubera iryo deni, mu muryango bakaba babyakiriye batyo, akavuga icyakora ko igihe hagaragara uvuga ko arimurimo, agaragaza ibimenyetso batabura kumwishyura nubwo babikora gahoro gahoro kubera ubushobozi, ingano n’imiterere byaryo.

Umukuru w’Umudugudu wa Rugaragara Mashuri Elie, avuga ko nta kindi kibazo bari bazi uwo mugore yari afite, nta n’amakimbirane yabaga mu rugo rwabo, batunguwe n’urwo rupfu, n’iryo deni atigeze agira ikindi arivugaho, akabasiga mu rujijo. Asaba abaturage kutajya bihererana ibibazo igihe babifite, kuko nk’Abanyarwanda bafite umuco wo gufashanya, n’iyo aza mu nteko y’abaturage akabivuga, hatari kubura igikorwa ariko ntiyivutse ubuzima.

Nyakwigendera asize umugabo n’abana 6.

Abaturage ku Kivu bategereje ko RIB ihagera umurambo wa nyakwigendera ukabonwa gukurwa mu Kivu
  • BAHUWIYONGERA SYLVESTRE
  • Mutarama 29, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE