Rusizi: Giheke baratabaza REG kuko amapoto y’amashanyarazi yashaje agatangira kugwa

  • BAHUWIYONGERA SYLVESTRE
  • Werurwe 18, 2024
  • Hashize ukwezi 1
Image

Abatuye Umudugudu wa Kabeza, Akagari ka Cyendajuru, Umurenge wa Giheke mu Karere ka Rusizi basaba REG kubakemurira ikibazo cy’amapoto yashaje agatangira kugwa.

Batangarije Imvaho Nshya ko amashanyarazi bafite ari ayo bikururiye ubwabo, hashize imyaka 19, ibiti bakoresheje byaraboze  bitangira kugwa, hari n’amapoto agiye kugwira inzu zabo bagasaba ko yasimbuzwa.

Munyentwali Uzziel avuga ko ararana impungenge zikomeye kuko poto ye hasi yaboze, hejuru igacikamo, kandi yegereye cyane inzu ye.

Ati: “Iki giti nubwo umwana yagihirika gato cyangwa imvura ivanze n’umuyaga mwinshi ikaza cyahita kigwa kuko ntigifashe. Sinshobora kujya hejuru ngo nkureho insiga nshyireho ikindi giti ngira ubwoba ko amashanyarazi yamfata kandi nta n’ibiti bikwiranye n’aya mashanyarazi twabona. Turasaba REG kuyaduhindurira kuko biteye impungenge zihoraho.’’

Mugenzi we baturanye na we ati: “Twagiye tubona abantu bo muri REG baza bavuga ko bagiye kuyahindura ariko imyaka ishize ari 5 ntitwongeye kubabona bagaruka kubireba. Murabona ko bimwe mu biti byaguye, ibindi bamwe babonye bigiye kubagwira ku nzu babikuraho dore insinga zirananaba, abana bagenda bazikorakora ahubwo tunafite impungenge ko hari n’abo zahitana.’’

Munyentwali Uzziel avuga ko ahorana impungenge z’ipoto yamaze kubora, ko n’iyi nkingi yayiteye atayizeye

Umukuru w’Umudugudu wa Kabeza, Mukandahunga Annonciata avuga ko mu myaka 19 ishize, babanje gukurura umuriro ari 50, uko iminsi igenda ishira bariyongera,n’abo mu yindi midugudu bafatiraho,uko amapoto aba menshi, atanafite ingufu ashaje, yariwe n’umuswa akabora ntasimbuzwe, ikibazo kikaba kigeze aho buri wese uhatuye abona ko ari ingorabahizi.

Ati: “Nk’ubuyobozi twabitanzemo raporo imyaka 5 irashize, banaza kubireba ababishinzwe muri REG, batwizeza kubikemura, bakaduha amapoto afite ingufu, bakanaturebera izi nsinga twagiye dushyiraho byo kwirwanaho niba zujuje ubuziranenge cyangwa na zo zitarateza ibibazo, n’ubu turacyategereje abatwijeje kubikemura,ariko impungenge zo ni zose.’’

Umuyobozi wa REG ishami rya Rusizi Nzamurambaho Tuyizere Jacques, avuga ko agiye kwikurikiranira iki kibazo kikabona igisubizo vuba.

Ati’’ Tugiye kuhasura turebe icyahakorerwa cyihuse niba bibangamiye abaturage kuri urwo rwego. Muri rusange hari gahunda yo kuvugurura imiyoboro nk’iyo yose ishaje. Biragenda bikorwa uko ubushobozi buboneka, ariko nk’aho i Giheke ho urumva ko hihutirwa kandi kubisimbuza ni inshingano zacu.”

  • BAHUWIYONGERA SYLVESTRE
  • Werurwe 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE