Rusizi: Barashimira Perezida Kagame gahunda yo kugaburira abana ku ishuri

  • BAHUWIYONGERA SYLVESTRE
  • Mutarama 27, 2024
  • Hashize ukwezi 1
Image

Ishuri ribanza rya Ryankana, riri mu Murenge wa Bugarama, mu Karere ka Rusizi, ryigeze kuvugwamo abana 159 baritaye mu mwaka umwe, n’indi myaka ryatangiranaga benshi rigasozanya mbarwa kuko baritaga, ariko kubera gahunda yo kugaburira abana ku ishuri, barigarutsemo bakaba babishimira Perezida Paul Kagame.

Aho gahunda ya Leta yo kurira ku ishuri ku bana bose iziye, abaritaye birirwaga bashakishwa bakanga kuza barigaruye bo ubwabo, ubuyobozi bw’iri shuri bukavuga ko umwaka ushize abo ryatangiranye bose barangije nta n’umwe urivuyemo, n’uyu mwaka abatangiye bose baracyaririmo.

 Bamwe mu bana bari bararitaye bagarutse, batangarije Imvaho Nshya ko nta kindi cyabakuragamo kubera ubushobozi buke bw’ababyeyi babo, none kuri ubu bashimira cyane Perezida Kagame washyizeho iyi gahunda ituma biga neza nta kibazo.

Niyoyabivuze Sarah w’imyaka 11 wiga mu wa 3, avuga ko bigaga ari abana 6 iwabo, buri mwana asabwa amafaranga 9000 mu mwaka yo kurira ku ishuri.

Nubwo yabaga uwa mbere mu ishuri, ababyeyi be barayabuze kuko bombi nta kazi gafatika bagira, ahitamo kurivamo.

Ati: “Nariviriyemo mu wa 3 mara umwaka mu rugo. Nagarutse mu wa 3 abo naberaga uwa mbere bageze mu wa 4 n’ubu igihembwe cya mbere cy’uyu mwaka ni jye wabaye uwa mbere mu wa 3.

Kuko nashakaga kwiga cyane ariko amikoro n’imibereho y’umuryango byatumye ndivamo. Numvise ko byoroshye,dutanga amafaranga 975 gusa mu gihembwe ndagaruka, ubu ndiga neza nta kibazo, ndashimira Umukuru w’Igihugu watugaruye mu ishuri.’’

Nayituriki Geovanis w’imyaka 17 wiga mu wa 5, avuga ko mu bana 8 b’iwabo, 4 bose bigaga kuri iri shuri, kubona amafaranga 36.000 yo kurya ntibyari gushoboka. Avuga ko yahanyanyaje, ageze mu wa 4 biranga kuko abana bayatanze baryaga babarebera, bikabababaza, abona atakomeza kubyihanganira, arivamo.

Ati: “Ubu mba ndi mu wa 1 w’ayisumbuye kuko abo twiganaga ni ho bari. Mbabazwa n’uko nari umuhanga icyo gihe kuko ntarengaga uwa 9. [….] Aho kurira ku ishuri biziye naragarutse, ndiga neza, ndashimira Perezida Kagame wabonye ikibazo nyacyo aho cyari kiri. Ntibacyirirwa bagira uwo birukaho ngo agaruke mu ishuri, turizana.”

Niyonkuru Samuel w’imyaka 13 ari mu wa 5 yagombye kuba ari mu wa 6 avuga ko kurivamo byatewe n’ubushobozi buke bw’ababyeyi be, gusa mushiki we mukuru kuko yigaga mu wa 6 nyina yashakishaga ayo kurya, we asubirayo none ari mu yisumbuye.

Ati: “Twataye igihe ariko ntacyo twaragarutse turashima Leta yatugaruye, turiga neza. Turarya neza tugahaga. Byanafashije ababyeyi bacu cyane kuko niba bari guhahisha ku manywa nk’amafaranga 3000 duhari, barahahisha 1000 asigaye tukayarya nimugoroba.’’

Umuyobozi w’ishuri ribanza rya Ryankana   Rév.past. Habaguhirwa Anastase, avuga ko amaze imyaka 3 ariyobora, iki kibazo yagisanze, abana barenga 150 mu kigo kimwe bagata ishuri, babirukankaho mu masoko n’uwo bafashe yaza ejo ntagaruke, aho iyi gahunda igiriyeho nta n’umwe ukirita.

Ati: “Byaradufashije cyane. Nk’umubyeyi wagiraga abana 6 bose biga hano, kumubwira kuzana amafaranga 54.000 ngo barye, byaragoranaga, bakariviramo rimwe bakigendera.  Aho itangiriye, tukanakodesha imirima tugahinga,tukabagaburira neza bagahaga,iyi myaka 2 ikurikirana nta mwana n’umwe watayishuri. Abana 2090 twatangiranye bose barahari n’ab’umwaka ushize ntawagiye.”

Yongeyeho ati’’ Turabikesha gahunda nziza ya Nyakubahwa Perezida wa Repubulika, kuko Leta yunganiye mu buryo bufatika, ababyeyi baroroherwa nubwo hari bamwe batarayumva neza, ariko nta mwana ugita ishuri.’’

Umuyobozi w’Akarere ka Rusizi, Dr Kibiriga Anicet,avuga ko kurira ku ishuri byagabanyije umubare w’abarivagamo, kuko ibigaragara kuri iri shuri biragaragara no mu yandi.

Ati: “Ntibabeshye, ni byo. Ni gahunda yatugiriye akamaro cyane muri aka karere, urebye umubare w’abaritaga cyane cyane mu kibaya cya Bugarama bakajya mu turimo tw’uduhendabana, wanabirukaho ntibaze bose, n’abaje bugacya bagenda,bu bakaba bizana,ntibagende, turabishimira Leta yacu cyane.”

Meya asaba ababyeyi batarayumva kuyumva neza, abayobozi b’ibigo by’amashuri bakayitaho, abadafite imirima bakayatisha,bagahingira abana ibyo barya, ibindi Leta ikabikora.

Kubona abana bangana gutya mu cyumba cy’ishuri iyi gahunda itaraza ngo byari ingorabahizi
  • BAHUWIYONGERA SYLVESTRE
  • Mutarama 27, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE