Rusizi: Amakamyo aparika mu mihanda ya Bugarama ateje inkeke

  • Imvaho Nshya
  • Ukwakira 30, 2023
  • Hashize amezi 7
Image

Abakoresha umuhanda Kamembe-Bugarama babangamirwa n’amakamyo  menshi aparika mu mpande zombi z’umuhanda ku buryo abanda bagenzi bagorwa no kugenda bayanyuramo, bakaba bafite impungenge z’impanuka za hato na hato zishobora kuvuka.

Ucyinjira mu Bugarama, mu Karere ka Rusizi uhita ukubitana n’umurongo munini w’amakamyo ku mpande zombi hafi y’urusengero rw’itorero ADEPR, ishuri ribanza rya Mihabura  na gare ya Bugarama.

Iyo umanutse hepfo gato werekeza ku mupaka w’u Rwanda na Repubulika Iharanira Demokarasi ya Congo (RDC) na bwo uhabona andi makamyo menshi bikekwa ko aba ategereje kwambuka ngo ajye muri icyo gihugu cy’abaturanyi.

Abaturage bo mu Bugarama bavuga ko icyo kibazo kimaze igihe kinini, ariko ngo cyagize ubukana cyane ubwo iki gice kigana ku mupaka wa RDC hari hamaze kubakwa ububiko bw’ibicuruzwa bihamara igihe gito mbere yo kwerekeza muri RDC.

Bivugwa ko amakamyo azana ibyo bicuruzwa n’abihakura ari yo ateza akajagari mu muhanda kuko uko agenda aba menshi, yuzura inkengero z’umuhanda maze ibibazo biravuka.

Ntirenganya Olivier, ni umwe mu bahaturiye bahorana impungenge z’impanuka kuko ugenda muri uwo muhanda aba atabona ibinyabiziga bituruka imbere.

Hagati y’izo modoka ziba ziparitse mu mpande z’izisate byombi by’umuhanda, bivugwa ko haba harimo urujya n’uruza bindi binyabiziga biba binafite umuvuduko wo hejuru rimwe na rimwe, ku buryo bigora abagenzi kwambuka.

Ntirenganya yagize ati: “Duhorana ubwoba bw’impanuka  zacu n’iz’abana bacu bashobora kugongwa n’amagare aturuka ruguru mu Mirenge ya Nzahaha yahoreye, cyangwa imodoka z’Abanyekongo ziza ziri ku muvuduko wo hejuru cyane. Kubera ko bahakata bazamuka imbere hatagaragara, umuhanda w’abanyamaguru ari wo ayo makamyo aparitsemo ntibabone imbere, kugongwa bikaba bishoboka cyane.”

Nyiramana Zuwena, uvuga ko ahanyura buri gihe ajya mu mirimo ye ya buri munsi, ati: “Impanuka zo ntizabura kuko no muri iyi minsi igare riherutse kuza ryahoreye cyane, umwana aryinjiramo ataribonye riramukubita ku bw’amahirwe ntiyapfa, iwabo baramuvuza. Sinzi niba yarakize neza ariko byo ni ikibazo gikomeye cyane dufite muri uyu muhanda.”

Abo baturage barasaba Akarere n’izindi nzego zibifite mu nshingano gushaka ubutaka bwakubakwaho parikingi igezweho yahurizwaho aya makamyo yose kugira ngo ubuzima bw’abaturage burusheho kubungabungwa.

Umunyambanga Nshingwabikorwa w’Umurenge wa Bugarama Nsengiyumva Vincent de Paul, avuga ko ari ikibazo gikomeye cyane nk’uko abaturage babivuga, kandi kihamaze igihe nk’Umurenge ukora ku mipaka y’ibihugu bitatu.

Imodoka ziba ziganjemo izitegereje kwambuka umupaka w’u Rwanda na RDC cyangwa n’u Burundi

Yavuze ko umupaka uhuza u Rwanda, u Burundi na Tanzania hadashobora kubura urujya n’uruza rw’abantu ndetse mo n’ibinyabiziga bibisikana bitabura.  Avuga ko kuba urwo rujya n’uruza ruhari ari amahirwe akomeye cyane bafite, kubera inyungu bahungukira ariko kutagira ahagutse ibi binyabiziga biparika ari ikibazo.

Ati: “Biragaragara rero ko dukeneye ahagutse, imodoka zirimo n’izi nini ziparika. Ntiharaboneka ziraparika ahashobora kuboneka ariko hadakwiye. Bigaragara ko ari umushinga ukeneye guhyirwamo imbaraga nyinshi hakaboneka vuba kuko byakemura byinshi.”

Avuga ko mu gihe iyo parikingi itaraboneka, ayo makamyo yabaye aparitse mu nkengero z’umuhanda munini byo kwirwanaho, ariko akajagari kazacika parikingi imaze kuboneka cyane ko iri mu mishanga y’ibanze Akarere gafite.

Ati: “Bizaba ari byiza cyane kuko kiriya cyugazi zihatera kizavaho, kuko zikihatera ukabona umuhanda wafunganye nubwo zitaba zirimo hagati, n’izo mpungenge z’abaturage bahatuye n’abahagenda zizaba zishize.”

Umuyobozi wungirije w’Akarere ka Rusizi ushinzwe iterambere ry’ubukungu Ndagijimana Munyemanzi Louis, avuga ko icyo kibazo  kidahangayikishije abaturage gusa kuko n’ubuyobozi bw’Akarere, inzego z’umutekano n’izindi zirebwa n’iki kibazo zihangayitse.

Avuga ko bagize ikibazo cy’uko babishyize mu igenamigambi ry’Akarere amafaranga yo kuyubaka akabura. Ati: “Turakizi ko ari ikibazo kiremereye cyane. Twagishyize mu igenamigambi ni uko amafaranga yabuze.

Hagombaga gutangira inyigo, tugafatanya n’abacuruzi bo mu gice cya Bugarama babyifuza kugira ngo turebe ko ubutaka bwo kubikoreraho bwaboneka. Kiracyari ikibazo ariko ni icyifuzo tumaranye igihe nk’Akarere twafashe mu biganza, dutegereje ko amafaranga aboneka.”

Avuga ko ku kibazo abaturage bibaza cyo kuba baravanye ayo makamyo aho yaparikaga mbere bakayazana mu gice gihuriramo abaturage benshi byakozwe n’Inama y’umutekano itaguye y’Akarere, kubera impamvu bagomba kwihanganira igihe igisubizo kirambye gitegerejwe.

BAHUWIYONGERA SYLVESTRE

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE