Rusizi: Akagari ka Gakomeye ntikanoza serivisi kubera kutagira amashanyarazi

  • BAHUWIYONGERA SYLVESTRE
  • Ukuboza 6, 2023
  • Hashize amezi 3
Image

Abaturage ndetse n’Umunyamabanga Nshingwabikorwa w’Akagari ka Gakomeye, Umurenge wa Giheke, Akarere ka Rusizi, bavuga ko bibangamira imitangire ya serivisi kuko nta mashanyarazi.

Abaturage b’Akagari ka Gakomeye, Umurenge wa Giheke, Akarere ka Rusizi, bavuga ko kitaruye utundi muri uyu Murenge, abagatuye bavuga ko kutagira amashanyarazi byabahejeje mu bwigunge bikanazitira iterambere ryabo.

By’umwihariko bituma urubyiruko rwigira aho rwita ko hari ubuzima, bakababazwa cyane n’uko hari serivisi nyinshi batabona n’izo babona impitagihe, bikabagiraho ingaruka zikomeye kandi ko nta muyobozi n’umwe utarayabijeje, bagategereza amaso agahera mu kirere.

Umwe ati: “Kuva ubuyobozi bwatwegerezwa, hakagira serivisi zitangirwa ku Kagari, hari serivisi tubura, n’izo tubonye tukazibona nabi, kubera kutagira amashanyarazi mu biro by’Akagari. Nta cyangombwa na kimwe gisaba ikoranabuhanga tubona bitworoheye,kandi twumva ahandi ngo bakoresha ikoranabuhanga mu biro by’abayobozi,aha ntibishoboka. Ni ikibazo kiremereye cyane dufite”.

Na mugenzi we ati: “Ikitubabaza cyane ni uko guhera muri 2006 nta Meya n’umwe utarageze hano atwizeza aya mashanyarazi buri wese akagenda adusize uko yadusanze. N’uyu uriho aherutse kuza atubwira ko uyu mwaka urangira tuyabonye none uri ku mpera, urumva ko na we yatubeshye nk’abamubanjirije bose. Twibaza niba Perezida wacu, Nyakubahwa Paul Kagame azi ko tudahabwa serivisi za ngombwa zibonerwa ku Kagari, ariko twizeye ko nabimenya bizakemuka”.

Gitifu w’agateganyo w’Akagari ka Gakomeye Mukandanga Josépha, na we yemeza ko serivisi muri aka Kagari zidatangwa neza, hakaba n’abasiragira bakazibona zararengeje igihe, cyangwa bigoranye kuko nk’ibisaba mudasobwa ajya kubikorera mu tundi twa kure, yakenerwa ku Kagari bakamubura.

Ati: “Sinabeshya ngo serivisi hano zitangwa neza rwose kuko nta mashanyarazi kandi ibintu byose bisigaye ari ikoranabuhanga. Kuvuga ngo umuyobozi yatanga serivisi nziza sinzi uwo uko yaba ameze.’’

Yongeyeho ati: “Ibimbaho byanabaye ku bambanjirije bose, abaturage ntibatubona, duhora mu nzira. Hari igihe umubyeyi aba keneye agafishi ngo ajye kuvuza umwana, iyo asanze nta two mfite abwirwa kujya ku Kagari gafite amashanyarazi. Ngaho nawe reba inyubako itangirwamo serivisi za Leta zikenerwa n’abaturage, kugeza mu mpera za 2023 nta mashanyarazi kandi tugomba gukorera ku mihigo. Ubona twayesa dute?’’

Yongeraho ko nta raporo n’imwe ikoreshwa mudasobwa bashobora gukora, akanavuga ko no mu baturage nta rugo na rumwe ruyagira, iterambere rikagorana, nta santere n’imwe y’ubucuruzi ihashoboka, nta mirimo mu rubyiruko.

Umuyobozi w’Akarere ka Rusizi, Dr Kibiriga Anicet avuga ko yahageze mu mezi make ashize agasanga koko bibabaje, akabizeza ko ingengo y’imari y’uyu mwaka izarangira bayabonye, ko atababwiye impera z’uyu mwaka usanzwe.

Ati’’ Uyu mwaka w’ingengo y’imari urarangira biriya biro bicanirwa n’abaturage, isoko ryaratanzwe, kariya Kagari n’aka Rwega begeranye, hari umushinga dufatanyamo na REG na banki y’isi uzagikemura,na santere z’ubucuruzi zegereye hariya zifite ikibazo cy’amashanyarazi ya ntayo zizayabona rwose,batwizere.’’

  • BAHUWIYONGERA SYLVESTRE
  • Ukuboza 6, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE