Rusizi: Basabwe guhangana n’ibiza badategereje ingengo y’imari ihanitse

  • Imvaho Nshya
  • Ugushyingo 9, 2023
  • Hashize amezi 4
Image

Mu gihe ubuyobozi bw’Akarere ka Rusizi buvuga ko bwagiye buhura n’ikibazo cy’ingengo y’imari idahagishe ijyanye no guhangana n’ibiza bitandukanye, Minisiteri ishinzwe ibikorwa by’Ubutabazi yasabye abayobozi kudategereza ingengo y’imari ihanitse ahubwo bukimakaza ingamba zijyanye no gukumira ibiza aho gutegereza guhangana na byo byaje.

Byagarutsweho na Minisitiri ushinzwe Ibikorwa by’Ubutabazi Maj. Gen. (Rtd) Murasira Albert ku wa Gatatu tariki ya 8 Ugushyingo, mu ruzinduko yagiriye mu Karere ka Rusizi, ubwo yagezwagaho raporo y’uko baganganye n’ibiza mu myaka itanu ishize.

Abagize Komite y’imicungire y’ibiza muri aka Karere, bagaragaje ko mu myaka itanu ishize bahanganye n’ibiza bikomeye birimo imyuzure yatewe n’imigezi yisuka mu kibaya cy’umuceri cya Bugarama, umuyaga mwinshi wagiye usenyera abaturage mu buryo bunyuranye, imvura nyinshi ivanze n’urubura yagiye yangiza bikomeye imyaka mu mirima, inkangu n’inkongi z’umuriro mu ishyamba rya Nyungwe n’andi mashyamba arimo n’ay’abaturage, imitingito cyane cyane ku nkengero z’ikiyaga cya Kivu n’ibindi.

Umuyobozi w’Ishami ry’imicungire y’ibiza mu Karere ka Rusizi  Habiyaremye Janvier, yavuze ko nubwo uburyo bwo gukumira Ibiza babugerageza bagira imbogamizi y’ingengo y’imari, hakaba ubwo hari nk’aho babona hashobora kuzateza Ibiza kubikumira bikagorana.

Yanakomoje no ku kibazo cy’uko n’abafatanyabikorwa babo akenshi baza ibiza byabaye, batagaragara cyane mu bikorwa byo gukumira.

Ati: “Nyakubahwa Minisitiri, turasaba ubuvugizi ngo tubone ingengo y’imari muri urwo rwego kuko kutayigira hari byinshi byagombye gukorwa mu rwego rwo gukumira bidakorwa, ugasanga  tugiye kurwana n’ibyamaze kuba, kandi kubikumira ari byo byajyaga kuba byiza.”

Yagaragaje ariko ko hari ibikorwa mu rwego rwo gukumira, nko gusaba abaturage n’abayobozi mu Nzego z’ibanze kubahiriza ibiteganywa n’imiturire mu mijyi no mu byaro, kubaka inzu zikomeye haherewe hasi n’ibisenge bikazirikwa, abafite inyubako zihurirwamo n’abantu benshi bakazishyiramo imirindankuba na kizimyamoto zihagije mu kurwanya inkongi z’imiriro, n’ibindi.

Minisitiri Albert Murasira, yashimiye Akarere ka Rusizi ko kagerageza  gukumira no gutabara vuba aho ibiza bigaragaye, yibutsa ko ako Karere atari ko gafite ikibazo cy’ingengo y’imari gusa kuko kagisangiye n’utundi Turere tw’Igihugu.  

Yaboneyeho gusaba abayobozi kudategereza ingengo y’imari ihanitse ngo babone kubikumira, cyane cyane ko gukumira ari byo by’ingenzi kandi bihendutse kuruta kurwana na byo byaje.

Ati: “Inzira iracyari ndende mu kurwanya ibiza ariko tugomba  kubirwanya uko byagenda kose. Mugomba cyane cyane gushyira imbaraga nyinshi mu gukumira kuruta kurwana na byo byaje, bigakorwa hadategerejwe ingengo y’imari ihanitse. Niba mugiye kubaka umuhanda mukabanza kureba niba aho uzanyura utazateza ibiza, n’ibindi nk’ibyo. Dukore ibikomeye bidateza ibiza, aho kwaka ingengo y’imari y’ibiza byatewe n’igikorwa runaka cyari kwirindwa.”

Yavuze ko bibabaje kuba hari abagipfa kubera imyuzure kandi hari ibyagombye kuba byarakozwe mbere ngo ikumirwe, hakaba na byinshi abaturage bakwikorera bitanasabye ingengo y’imari.

Yanavuze ko ibiza bizakomeza, abaturage bakaba bakwiye kurindwa gutura munsi y’imisozi ihanamye cyangwa ahandi hashyira ubuzima bwabo mu kaga.

Ndagijimana Louis Munyemanzi, Umuyobozi wungirije w’Akarere ka Rusizi ushinzwe iterambere ry’ubukungu, yabwiye Imvaho Nshya ko  impanuro za Minisitiri Albert Murasira zababereye ingirakamaro cyane.

Yavuze ko mu bibazo bamugaragarije harimo icy’imiryango  67 ituye ahashobora gushyira ubuzima bwayo mu kaga kandi itishoboye ngo ihavanwe, n’akarere kadafite ubushobozi bwo guhita kabikora.

Yagaragaje ko Akarere gafite impungenge z’imvura iri imbere, asaba abaturage kwitegura.

Ati: “Impungenge turazifite kuko nk’uko ababishinzwe baduteguje ko muri uku kwezi umuyaga n’imvura bizaba byinshi. Nk’ubuyobozi bw’Inzego z’ibanze ntibyabura kuzidutera ko hari abashobora kuhahurira n’ibibazo byanabambura ubuzima cyangwa bikabasiga iheruheru, tugasaba abaturage muri ino minsi kwirinda mu buryo bwose bakurikije n’inama bagirwa.”

Nyuma yo kuganira na Komite ishinzwe imicungire y’ibiza mu Karere ka Rusizi, Minisitiri Maj. Gen (Rtd) Murasira yakomereje  mu Nkambi y’impunzi ya Nyarushishi iherereye mu Murenge wa Nkungu, ahacumbitse impunzi 380 ziherutse gutahuka.

BAHUWIYONGERA SYLVESTRE

  • Imvaho Nshya
  • Ugushyingo 9, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE