Rusizi: Abaturage bamutangiye amakuru, asanganwa udupfunyika 500 tw’urumogi

  • NTAWITONDA JEAN CLAUDE
  • Ukuboza 17, 2023
  • Hashize amezi 5
Image

Polisi y’u Rwanda yashimiye abaturage bakomeje kugira uruhare mmu guhashya icuruzwa n’ikwirakwizwa ry’ibiyobyabwenge, nyuma y’aho mu Karere ka Rusizi bayifashije gufatira mu cyuho umugabo w’imyaka 41 wari ufite udupfunyika 500 mu mufuka.

Nk’uko byamejwe n’ Umuvugizi wa Polisi mu Ntara y’Iburengerazuba, Superintendent of Police (SP) Bonaventure Twizere Karekezi, uwo mugabo yafashwe n’Ishami rya Polosi rishinzwe kurwanya ibiyobyabwenge (ANU) agiye gukwirakwiza urwo rumogi mu baturage.

Yafatiwe mu Mudugudu wa Cyete, Akagari ka Kagarama, Umurenge wa Mururu mu Karere ka Rusizi, ahagana saa kumi n’imwe n’igice z’umugoroba wo ku wa Gatanu tariki 15 Ukuboza 2023.

SP Bonaventure Twizere Karekezi, yavuze ko uyu mugabo yari azanzwe akekwaho gucuruza ibiyobyabwenge, ari na yo mpamvu abaturage bamubonye atwaye umufuka ntibamushire amakenga bagahita babimenyesha Polisi.

Yagize ati: “Nyuma y’uko abaturage bahamagaye Polisi bavuga ko hari umugabo usanzwe uzwiho gucuruza ibiyobyabwenge, utwaye mu mufuka ibintu bikekwa ko ari urumogi, hahise hatangira ibikorwa byo kumushakisha afatirwa mu Kagari ka Kigarama. Abapolisi barebye muri uwo mufuka yari afite basanga urimo urumogi ahita afatwa.”

SP Karekezi yashimiye abaturage uruhare bagira mu kubungabunga umutekano muri rusange by’umwihariko kurwanya ibiyobyabwenge batanga amakuru y’ababicuruza, inzira banyuramo n’uburyo bakoresha mu kubikwirakwiza mu baturage.

Yakomeje asaba abarutage kurushaho kurwanya ibiyobyabwenge kuko bigira ingaruka nyinshi ku buzima bw’ubinyweye, Umuryango Nyarwanda ndetse no ku iterambere ry’Igihugu.

Yaburiye abakomeje kwishora mu bucuruzi bw’ibiyobyabwenge n’ibindi bikorwa binyuranyije n’amategeko ko Polisi itazabihanganira bazakomeza gufatwa bagashyikirizwa ubutabera ku bufatanye n’izindi nzego n’abaturage.

Mu Rwanda, urumogi rushyirwa mu cyiciro cy’ibiyobyabwenge bihambaye, aho uhamijwe n’urukiko ibikorwa byo gukora, guhinga, guhindura, gutunda, kubika, guha undi, kugurisha mu gihugu ibiyobyabwenge byo muri icyo cyiciro ahanishwa igifungo cya burundu n’ihazabu y’amafaranga y’u Rwanda arenze miliyoni 20 ariko atarenze miliyoni 30.

  • NTAWITONDA JEAN CLAUDE
  • Ukuboza 17, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE