Rusizi: Abahinzi batarabona ifumbire n’imbuto baheze mu gihirahiro

  • NTAWITONDA JEAN CLAUDE
  • Nzeri 22, 2023
  • Hashize amezi 8
Image

Bamwe mu baturage b’Umurenge wa Gikundamvura mu Karere ka Rusizi baravuga ko baheze mu gihirahiro kuko batabona ifumbire n’imbuto y’ibigori bagombaga gutera, kugeza ubu bakaba batazi uburyo bazabibona kandi hashize hafi ibyumweru 2 itera ritangiye aho abateye bwa mbere byaratangiye kumera.

Munyemana Faustin, Umukuru w’Umudugudu wa Kirume, Akagari ka Mpinga, Umurenge wa Gikundamvura, yabwiye Imvaho Nshya ko ari ikibazo kibahangayikishije cyane, kuko gukomeza gukerererwa gutera, bitazabura kugira ingaruka zikomeye cyane ku musaruro.

Ati: “Ibyumweru bigiye kuba 2 twiruka ku mbuto n’ifumbire twarahebye. Dutangiye igihembwe cy’ihinga twugarijwe cyane n’iki kibazo. Byagombye kuva muri Tubura cyangwa mu bashinzwe gucuruza inyongeramusaruro bandi.

Nubwo tunafite ikibazo cy’ihenda ryabyo rikabije, kuko ikilo cy’ibigori ni amafaranga 1000, n’ifumbire yigonderwa n’umugabo igasiba undi, ariko kuba babiduhaga tukabitera, tukagenda tubyishyura buhoro buhoro, byera tudakererewe byadutabaraga.”

Yakomeje avuga ko batazi aho ikibazo kiri, ahubwo inzego zibishinzwe zabasobanurira impamvu babuze imbuto kandi e igihembwe cy’ihinga cyatangiye.

Ati: “Natwe ni rwo rujijo turimo. Dukeneye ko inzego zibishinzwe zibidusobanurira.  Batubuza kubika imbuto ngo kuko itakwera neza kuko itaba yujuje ubuziranenge nk’iyo baduha buri gihe uko tugiye gutera. Agafumbire ko natabawe n’ako nasaguye mu ihinga rishize ariko ni gacye cyane, ntacyo kamariye”.

Munyemana kandi yagize ati: “Ikibabaje ni uko hari ababonye bibayobeye, bapfa gutera imbuto   babitse ngo nibura bazeze ibyo babonye aho gutera nyuma.  Iyo bateye imwe yari yaramunzwe kubera kubikwa nabi, abandi bararambirwa batangira gutera ibishyimbo aho bagateye ibigori, kandi baterera aho nta fumbire. Ubwo se wambwira ko nk’abo biteze umusaruro”?

Mukasine Jacqueline wo mu Mudugudu wa Mugerero, Akagari ka Mpinga, na we wagombaga guhinga ibigori mu giterane cya Kirume, avuga ko yifashe mapfubyi kuko kugeza ubu aho yagombye kubona ibigori n’ifumbire, icyo bakora ari ukumusiragiza gusa,aho kubimuha.

Ati: “Abadafte amafaranga tugera ku Murenge bakaducunaguza gusa tugataha, bugacya tugasubirayo bityo bityo. N’ubu ntituratera, hashize ibyumweru 2. Turi kudindira cyane, abakabiduhaye babibitse, byagombye kuba biri mu butaka tukishyura buhoro buhoro?”

Mu gutangiza igihembwe cy’ihinga ku rwego rw’Akarere cyatangirijwe mu Murenge wa Gikundamvura ku wa 20 Nzeri, hagarukwa ku kibazo cy’ifumbire n’imbuto.

Umuyobozi w’Akarere ka Rusizi Dr Kibiriga Anicet, yatangarije Imvaho Nshya ko  ari ikibazo koko kiri n’ahandi mu Karere,atari aha gusa, ariko  batangiye kugikemura.

Ati: “Ifumbire n’imbuto birahari ku Mirenge. Ikibazo cyari cyabonetse twakiganiriyeho ni ikijyanye n’uko bakoreshaga Smart nkunganire, ariko twabitanzeho umurongo ko bagomba gukoresha amalisiti, bikihutishwa nta gutinza abaturage kandi dukeneye umusaruro”.

Umuyobozi Mukuru wa RAB, Dr Ndabamenye Télésphore na we yatangarije Imvaho Nshya ko iki kibazo cyagaragaye henshi mu gihugu ariko cyakemutse, imbuto n’ifumbire bihari.

Ati: “Twasabye ko byihutishwa kuko hirya no hino ababicuruza barabfite. Bareke kunaniza abaturage,babitange vuba ,ntibirenge ibyumweru 2 icyo kibazo kicyumvikana”.

Ku byerekeranye n’abadahita babona amafaranga yo kwishyura ku babibaha ngo ari uko babanje kubyishyura, n’abatishoboye Dr Ndabamenye yavuze ko ubwo busabe bagiye kubusuzuma kuko ubusanzwe imbuto  igurishwa, ariko ko iyo bigaragaye ko hari abatishoboye, cyangwa abatahita babona amafaranga bayihabwa.

Ati: “Turabisuzuma nidusanga ari ikibazo cyagira ingaruka ku musaruro, ibyo koko babikwiye bitewe n’impamvu bagaragaza, tubikemure”.

Mu itangizwa ry’iki gihembwe cy’ihinga, abaturage bongeye gusabwa guhinga ubutaka bwose bushobora guhingwa nta gisigara na kimwe kigaragaye.

BAHUWIYONGERA SYLVESTRE

  • NTAWITONDA JEAN CLAUDE
  • Nzeri 22, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE