Rulindo: U Budage bwashimye intambwe yatewe mu mishinga butera inkunga

  • NYIRANEZA JUDITH
  • Ukuboza 7, 2023
  • Hashize amezi 3
Image

Umuyobozi w’Akarere ka Rulindo Judith Mukanyirigira kuri uyu wa Kane tariki 7 Ukuboza 2023, yakiriye Ambasaderi w’u Budage mu Rwanda Heike Uta Dettmann, wasuye ibikorwa biterwa inkunga n’icyo gihugu ashima ibikorwa bitandukanye.

Ibikorwa bitandukanye biterwa inkunga n’igihugu cy’u Budage binyuze muri German Sparkassenstiftung for International Cooperation na Rhenanie Palatinatbyafashije abaturage kwiteza imbere.

Ambasaderi Heike yagize ati: ” Ndashima uko mukoresha neza inkunga, iyi mishinga igihugu cy’u Budage gitera inkunga yashoboye kugirira akamaro abaturage biteza imbere”.

Yongeyeho ko igihugu ahagarariye kizakomeza gutsura umubano n’u Rwanda kinaharanirabko abaturage bakomeza kurushaho kwiteza imbere.

Bimwe mu bikorwa byasuwe mu Murenge wa Kinihira ni Koperative y’abahinzi b’icyayi CSTCR: Cooperative de Solidalité de Théiculteurs Cyohoha -Rukeri; nk’imwe mu bigo 5 by’imari iciriritse birimo gufashwa na DSIK_EA mu kwihuriza hamwe kw’ibigo by’imari biciriritse bikaba ikigo kimwe.

Banasuye Koperative y’abahinzi b’icyayi ASSOPTHE n’uruganda rutunganya icyayi SORWATHE, nk’umuguzi w’icyayi gihingwa n’abanyamuryango ba ASSOPTHE. Abashyitsi basobanurirwa imikorere n’imikoranire ya CSTCR, ASSOPTHE & SORWATHE n’uburyo bifasha abaturage mu iterambere ryabo n’igihugu.

Uretse ibikorwa by’ubuhinzi bw’icyayihanasuwe ishuri rya GS Rukingu, muri Rusiga, ryatewe inkunga, mu kubaka ibyumba by’amashuri 6, kubaka aho abana bafite ubumuga barara n’aho barira, ubwiherero 10 bworohereza abafite ubumuga; imashini 3 zidoda n’icyuma gifotora (photocopieuse).

Ikindi gikorwa gishyigikirwa n’u Budage ni amahugurwa y’abarimu mu gukoresha ururimi rw’amarenga.Meya wa Rulindo yashimiye inkunga igihugu cy’u Budage gitanga igafasha abaturage kwiteza imbere kandi ko nk’ubuyobozi buzajya buba hafi y’abafatanyabikorwa, ari bo baturage bakaba n’abagenerwabikorwa kugira ngo bakomeze gukataza mu iterambere.

Umwe mu bahinzi b’icyayi yavuze ko icyayi cyatumye bakirigita ifaranga, ashimira Leta idahwema kubitaho.

Yagize ati: ” Turashimira Leta uburyo itwitaho, kuko uburyo dufashwa mu buhinzi bw’icyayi n’ibindi bidufasha kubona amafaranga, tukiteza imbere, tukishyura Mituweli, tukarihirira abana amashuri n’ibindi”.

NYIRANEZA JUDITH

  • NYIRANEZA JUDITH
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE