Rulindo:  Barataka igihombo baterwa n’umuriro w’amashanyarazi udahagije

  • Imvaho Nshya
  • Ugushyingo 14, 2023
  • Hashize amezi 4
Image

Abakorera imirimo inyuranye y’ubukorikori mu Gakiriro ka Rulindo mu Karere ka Rulindo, barataka ibihombo bikomeye baterwa no kuba nta muriro w’amashanyarazi uhagije bafite kandi na wo ukaba ubura bya hato na hato.

Barimo abakora ubucuzi, ububaji, gusudira n’ibindi, ibihombo bahura na byo bikaba bituma bifuza kuba basubira gukora ubukorikori mu buryo bwa gakondo.

Kalimunda Jean Marie Vianney ni umwe mu bakora umwuga w’ububaji, asaba ubuyobozi kubafasha kongerera ingufu z’amashanyarazi kariya gakiriro ka Rulindo, kuko iyo umuriro uje agendeye ku mubare w’abawukoresha uhita uba iyanga.

Yagize ati: “Ubundi agakiriro umuriro w’aho uba ukenewe navuga ko ukwiye kuba nk’uwo mu cyanya cy’inganda, kuko hano hari imashini za rutura zisatura imbaho, hari izikata ibyuma, hari abasuderi ndetse n’ibindi byinshi bisaba umuriro mwinshi. Ariko hano ho wagira ngo ni nk’urugo rw’umuturage kuko umuriro uza ari muke cyane, kandi iki kibazo kirazwi mu buyobozi bwose bw’Akarere, nibadufashe batwongerere umuriro hano dukore kuko ibyo dusabwa turabikora nk’amafaranga y’imisoro n’ibindi”.

Zimurinda Aimable akora umurimo wo gusudira, avuga ko bibatera igihombo kuba bafite umuriro muke ndetse bikabatera amakimbirane n’abakiliya babo.

Yagize ati: “Kuba nta muriro uhagije kuko ikoranabuhanga rya hano twese dukenera umuriro ntangira gusudira ubaza akaba yakije imashini ubwo umuriro ugatangira kuza ari nk’agatonyanga ubwo uwo ari we wese akabura ingufu z’amashanyarazi. Ubwo rero umukiliya waguhaye nk’urugi rwe iyo abonye hashize igihe ashaka gukinga inzu ye muhita mushwana we ntiwamubwira iby’umuriro ngo wabuze.

Twifuza ko badufasha tukabona umuriro w’amashanyarazi bitari ibyo turisubirira mu cyaro dukomeze dukore mu buryo bwa gakondo”.

Izi mashini zikenera umuriro w’amashanyarazi uhagije ku buryo kuwubura byica akazi kabo

Ikindi kibazo aba baturage bafite ni uko hari benshi bahurira kuri mubazi imwe (compteur) ibintu ngo basanga na byo ari ikibazo gikomeye nk’uko Zimulinda akomeza abivuga.

Yagize ati: “Ikibazo nanone ni uko n’abashyize umuriro w’amashanyarazi muri aka gakiriro batitaye no kuri za mubazi aho usanga usatura imbaho ahuje n’umusuderi nabwo tugahora mu makimbirane twitana ba mwana ngo ntuza akoresha umuriro mwinshi. Aka kantu na ko bazakigeho, mbese hari byinshi bikwiye gukosoka muri aka gakiriro, uzi ko mubazi imwe ihuriweho n’abantu 10? Hari ubwo tuza ku kazi tukamara nk’isaha tukijya impaka ngo harebwe ugura umuriro! Dukeneye ko buri wese agira mubazi ye”.

Umuyobozi wa REG   mu Karere ka Rulindo Muhayimana Celestin, avuga ko iki kibazo atari akizi ariko kuri ubu ngo ubwo bakimenye bagiye kugikurikirana.

Yagize ati: “Iki kibazo ni bwo ncyumvise muri kariya gakiriro kandi bafite ababakuriye mu matsinda bagiye bahuriyeho, baba barabatumye bakabitubwira. Mperutseyo n’Akarere ntabwo batubwiye iki kibazo gusa ubwo mbimenye ngiye kuzabasura ndebe ikibura, kuba rero hari abafite ikibazo cya za mubazi batwegera tukabafasha kuko ushaka mubazi ahamagara kuri REG tukamufasha”.

Uyu Muyobozi akomeza asaba abanyabukorikori gukomeza gukorera mu gakiriro aho kwibwira ko kongera gushinga amaseta byagira icyo bibamarira.

Agakiriro ka Rulindo katwaye amafaranga y’u Rwanda akabakaba miliyari imwe.

NGABOYABAHIZI PROTAIS

  • Imvaho Nshya
  • Ugushyingo 14, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE