Ruhango: Matabaro yasobanuye uko igiti cy’umwumbati cyavaho ibilo bisaga 50

  • Imvaho Nshya
  • Nyakanga 25, 2023
  • Hashize amezi 10
Image

Matabaro Davide, ni umuhinzi w’igihingwa cy’imyumbati wabigize umwuga mu Karere ka Ruhango mu Murenge wa Ruhango mu Ntara y’Amajyepfo. Yatangaje ko ubuhinzi bw’imyumbati bwateza imbere ubukora kandi akagera ku cyo ashaka.

Ni umwe mu bahinzi bitabiriye imurikabikorwa ry’Ubuhinzi n’Ubworozi ririmo kubera ku Mulindi mu Mujyi wa Kigali.

Asobanura ko hari amahirwe menshi yatumye ahinga imyumbati. Amahirwe ya mbere ni uko mu Karere atuyemo keramo imyumbati.

Kuri we imyumbati ni igihingwa gifitiye Abanyarwanda akamaro, ni igihingwa kitagoye guhingwa kuko urahinga, ukabagara, ugategereza.

Cyerera igihe kirekire ariko ngo gihunikwa no mu butaka, ntabwo gikangwa n’ibihe cyane cyane izuba.

Ati: “Ni yo mpamvu rero guhinga imyumbati mu Karere k’iwacu cyangwa n’ahandi yera ari amahirwe ku bahinzi”.

Hari imbuto zo mu bushakashatsi RAB ikora, ariko ikabafasha no gutubura imbuto y’imyumbati.

Igiti kimwe cy’imyumbati gifite ibilo 75 kiba cyahinzwe mu buryo avuga ko ari bushya.

Ati: “Ducukura ikinogo tugashyiramo ibyatsi, tugashyiramo ubutaka, tugashyiramo imbuto nziza.

Iyo ushaka umusaruro mwiza cyangwa mwinshi, uhera ku mbuto nziza kuko iyo ufite imbuto mbi ushyiramo ikarwara, yarwara ntugere kuri ya ntego y’umusaruro wifuzaga”.

Ushobora guhera ku musaruro w’ibilo 50 ukagenda ukagera ku giti cy’ibilo 100 kuko na cyo hari igihe bagikura.

Yagize ati: “Ntabwo ari ibintu byo gupapira, ni ibintu tugeraho dufatanyije na RAB, na Sendika Ingabo, dufatanyije n’ihuriro ry’abatubuzi b’imbuto”.

Matabaro Davide, umuhinzi w’imyumbati mu Karere ka Ruhango arayivuga imyato (Foto Kayitare J.Paul)

Bakomeje ibikorwa byo gukangurira abaturage kugira ngo na bo bakoreshe ubutaka buto, babubyaze umusaruro mwinshi.

Muri Metero ebyiri kuri ebyiri avuga ko bashobora kubyazamo ibilo 70. Ufite hegitari aba afite umusaruro ushimishije.

Ati: “Muri Are 2 nshobora gukuramo toni wahinze muri buriya buryo, ubwo mvuze ku kigero cyo hasi mbariye ku kinogo kimwe mu binogo 50 ariko ujya no hejuru ya toni muri Are 2.

Mu myumbati arimo kumurika ku Mulindi, harimo igiti gifite ibilo 52 n’ikindi gifite ibilo 59.

Ubu uruganda rwa Kinazi rurimo ruratanga amafaranga 300 ku kilo, iyo tugemuye ku bigo by’amashuri baduhera ikiro kuri 270 hari n’aho batangira ikiro ku mafaranga 350 cyane cyane mu myumbati y’imiribwa.

Imyumbati kugeza uyu munsi ifite isoko ryiza kandi rishimishije”.

Ahamya ko ahinga hegitari 6 z’imyumbati kandi ntahingira igihembwe (Season) kimwe, ahubwo agenda asimburanya.

Hari iyo aba abagara, asarura, amenera bwa mbere kugira ngo atazava ku isoko kuko isoko ngo ahora ariteganyiriza kugira ngo arebe ko umusaruro wazamuka kuko hari igihe akubitana n’isoko ryiza.

Nubwo atabivuga mu buryo bweruye, ariko imyumbati ngo ishobora guha umuhinzi ikinyabiziga bityo bikamworohera kugera kuri ya mirima ye, akubaka inzu, akishyurira abana amafaranga y’ishuri, agakora ubucuruzi, ibyo byose ubuhinzi bw’imyumbati bwabimugezaho.

Ati: “Abahinzi b’imyumbati ntabwo ari twe turi inyuma mu bandi bahinzi”.

Ku rundi ruhande, avuga abatubuzi biteguye gukorana na RAB, RICA na MINAGRI gushyira mu bikorwa iyongera ry’umusaruro kugira ngo na biriya biciro birimo kuzamuka cyane, bagerageze gufatanya na Leta kubimanura.

Yanditswe na KAYITARE JEAN PAUL

  • Imvaho Nshya
  • Nyakanga 25, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE