Ruhango: Ibikorwa remezo bizakomeza kongerwa no gusanwa

  • NTAWITONDA JEAN CLAUDE
  • Nyakanga 15, 2022
  • Hashize imyaka 2
Image

Mu mujyi wa Ruhango harimo gukorwa ibikorwa bishya birimo imihanda, kubaka gare ya Ruhango, gusana ibiraro, kubaka isoko ry’amatungo magufi, n’ibindi bikorwa remezo bitandukanye hagamijwe imibereho myiza y’abaturage.

Umuyobozi w’Akarere ka Ruhango Habarurema Valens yatangarije Imvaho Nshya ko ibikorwa remezo bitandukanye bikomeje kubakwa nk’imihanda ikomeje gutunganywa.

Ati: “Imihanda ya kaburimbo dufite gahunda yo gukora ibilometero 7 mu mujyi wa Ruhango, umwaka ushize twari tumaze gukora kilometero 2 zirenga ho gato. Uyu mwaka (2021/2022) tumaze gukora hafi kilometero 1,5 urumva ko hasigaye nka kilometero 3,5 buri mwaka tuzajya tugira icyo twongeraho”.

Yongeyeho ko kandi Akarere gateganya undi muhanda ugiye kwiyongeraho ngo bagire ubwagukiro bw’umujyi wa Ruhango wa kilometero 5 zirengaho gato, uhereye kwa Yezu Nyirimpuhwe ukazagenda ukagera aho Akagari ka Buhoro kari.

Muri ibyo bilometero 7 harimo n’uzajya ku isoko n’ibagiro ry’amatungo kuko ni umuhanda ugendwa cyane.

Kubaka imihanda bizakomeza, hakurikijwe ibiteganyijwe mu gishushanyombonera cy’umujyi.

Gare ya Ruhango, ibikorwa byaratangiye kandi birakomeje

Ku birebana n’iyubakwa rya Gare ya Ruhango Minisitiri w’Ubutegetsi bw’Igihugu ubwo ahaheruka hashyizweho ibuye ry’ifatizo ryo kuyubaka, Meya Habarurema yavuze ko ari umushinga ukomeje kuko atari umushinga muto wahita urangira.

Ati: “Kubaka gare ni umushinga munini, […] icya mbere umushinga urahari kandi umushinga  ni mugari cyane, hari ingero nyinshi z’imishinga uretse no mu Karere ka Ruhango no ku Isi, imishinga iratangira, igakomeza ariko hari umushinga utagomba guhita urangira ako kanya, si umushinga wafata nko kubaka ikiraro cy’itungo na cyo gishobora gutwara iminsi itatu kandi ari ugushinga ibiti gusa. Iyi gare ni umushinga wa 1,200,000 z’amafaranga y’u Rwanda”.

Yavuze kandi ko ibikorwa bigira uko bigenda bisimburana, ku buryo ubu imirimo yo kubaka gare yatangiye. Hatangiye gukorwa imisingi kuko si inyubako yarangira mu gihe gito gusa, icyizere ni uko mu 2024 izaba yaruzuye.

Yagize ati: “Gare irimo irubakwa cyakora mu minsi ishize hari ibyangombwa byari bitararangira gutungana. Mu mukoro Minisitiri Gatabazi yaduhaye harimo gutunganya ibijyanye n’ibyangombwa by’ubutaka byanditse kuri Ruhango Investment Company kuko ubundi byari byanditse kuri Leta. Ubu byaratunganye.

Nibura twagera muri 2024 gare yararangiye, tutazarinda gutegereza ko NST1 igera, icyizere kirahari kuko ibikorwa byo kubaka byasubukuwe kandi mu gihe gito mvuga si mu mezi 3 ariko gishobora kuba umwaka, umwaka n’amezi”.

Mu biraro n’amateme 70 byangiritse hamaze gusanwamo 20

Umuyobozi w’Akarere ka Ruhango Habarurema Valens yatangarije Imvaho Nshya kandi  ko  umwaka ushize wa 2021 ibiza byasenye amateme n’ibiraro 70 hirya no hino mu Mirenge itandukanye yo muri aka Karere, bashobora gusana 20  byoroshye.

Ati: “Akarere kacu kahuye n’ibiza aho ibiraro n’amateme bigera muri 70 byangiritse, muri byo twasannyemo ibiraro byoroshye bigera muri 20, ariko ibindi binini cyane turacyarwana nabyo twavuganye n’inzego zo hejuru, ariko nk’ibigera kuri 5 binini bizubakwa hatabariyemo icya Mukunguri, kuko cyatangiye gukorwa kubera ko gihuriweho n’Akarere ka Kamonyi na Ruhango”.

Yongeyeho ko ibiraro nibura bindi 5 bizakorwa kuko amafaranga arahari, ibindi bizakomeza bikorwe n’Akarere n’abafatanyabikorwa bako.

Amasoko agenda ahabwa umurongo w’imikorere inoze

Harimo kubakwa isoko ry’amatungo magufi mu Murenge wa Ruhango, Akagari ka Nyamagana, Umudugudu wa Kinama, bizakemura ikibazo cy’amatungo yabaga azerera ku kibuga bikaba bizatuma afite aho aremera hatekanye.

Mukeshimana Immaculee ukorera muri iryo isoko ry’amatungo magufi ririmo kubakwa, kuko ubusanzwe ryaremeraga ahantu hatubakiye. Yavuze ko ahari hasanzwe hari imbogamizi yo kuba ari rito, isoko riremera ku gasozi ku buryo amatungo yabaga avanze inka, ihene, inkoko ntibabashaga kuba bisanzuye.

Umuyobozi w’Ishami ry’Ubuhinzi n’Umutungo kamere mu Karere ka Ruhango, Byiringiro Emmanuel yavuze ko isoko ryaremeraga ku gasozi ku buryo ubu kuba ryubatswe neza mu buryo bwa kijyambere abaturage bazabona aho bagurishiriza amatungo yabo. Akarere kazinjiza imisoro kuko buri tungo rizaba ririmo rizishyura, umuturage azagurisha afite umutekano, bizaca akajagari k’abajyaga bagura amatungo ako kanya nanone bakayagurisha.

Yongeyeho ko iyubakwa ry’isoko riri mu mirimo isoza, igeze nko ku kigero cya  95%, rikaba ryaratangiye kubakwa muri Gicurasi 2022, rifite agaciro k’amafaranga y’u Rwanda miliyoni 78.

Isoko rya Kirengere hanogejwe imikorere yaryo, bituma abarirema baryibonamo

Meya yagize ati: “Abaturage twumvikanye ko basubira mu isoko, bavuga ko bari baragize impungenge z’isoko rya Ntenyo bajya inama ngo hajyemo isoko ry’amatungo magufi. Byakiriwe neza hahita hafatwa n’icyemezo cyo kuhubaka ibagiro ry’amatungo magufi n’aho riremera rirema kabiri mu cyumweru”.

Ibikorwa remezo biba bigamije imibereho myiza n’iterambere ry’abaturage ntibikorerwa icya rimwe, ahubwo ni ibikorwa bitangira, hakaba ibirangira n’ibindi biba bigikomeza.

Umuyobozi w’Ishami ry’Ubuhinzi n’Umutungo kamere mu Karere ka Ruhango, Byiringiro Emmanuel yasobanuye ibyiza byo kuba amatungo magufi yubakiwe isoko (Foto Nyiraneza J.)
Igishushanyo mbonera cy’inyubako y’ubucuruzi izashyirwa muri Gare ya Ruhango (Foto Kwizera Prudence)
  • NTAWITONDA JEAN CLAUDE
  • Nyakanga 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE