Ruhango: Begerejwe amavuriro y’ingoboka baruhuka ingendo ndende

  • Imvaho Nshya
  • Ukwakira 23, 2023
  • Hashize amezi 4
Image

Bamwe mu baturage batuye mu bice bitandukanye by’Akarere ka Ruhango bavuga ko nyuma yo kubakirwa amavuriro y’ingoboka (Poste de santé) yabaruhuye ingendo bakoraga bajya gushaka serivisi z’ubuvuzi zari kure yabo.

Mu kiganiro bagiranye n’Imvaho Nshya, batangaza ko hari bimwe mu bice by’aka Karere byasabaga umuturage gukora urugendo rw’amasaha abiri agiye kwivuza ndetse bigatuma ashobora no gutaha atabonye serivisi yagiye gusaba.

Kankindi Marie Jeanne avuga ko mu bihe byashize umuntu yarwaraga agafata urugendo rwo kujya kwivuriza ku Kigo Nderabuzima cya Gitwe ndetse bamwe bakerekeza mu bigo nderabuzima byo mu Mirenge ya Byimana na Mwendo bagakora urugendo rurerure rungana n’amasaha 4 kugenda no kugaruka.

Yagize Ati: “Jyewe ntuye hano i Muyunzwe ariko tutaregerezwa iri vuriro rito twakoraga ingendo ndende tujya kwivuriza mu Kigo Nderabuzima cya Gitwe cyangwa mu bigo nderabuzima byo mu Murenge ya Mwendo na Byimana kandi naho ni kure kuko byadusabaga nibura amasaha 4 kugenda no kugaruka, rwose baradufashije nta muntu ukirembera mu rugo ngo dutegereze ko bucya.”

Rutazigwa Cyprien w’imyaka 58 avuga ko bajyaga bagorwa n’ingendo kuko umuntu yarwaraga bigasaba ko agomba gutegereza umumotari uza kumutwara na bwo akaguca mafaranga menshi.

Yagize ati: “Twamaze igihe twifuza ko baduha ivuriro hafi yacu none barariduhaye rinaduha serivisi neza cyane ariko mbere yuko riza byadusabaga guhamagara umumotari ngo aze kudutwara akaduca amafaranga y’u Rwanda arenga”.

Yakomeje avuga ko banishimira ko ubwishingizi bwose waba ufite uhabwa serivisi nta nkomyi.

Rutayisire Laurien, umuganga ukorera ku Ivuriro ry’Ingoboka rya Rwinyana, we avuga ko bakira abarwayi baturuka mu Tugari twa Gitisi, Rubona, Rwinyana two mu Murenge wa Bweramana ndetse n’Utugari two mu Mirenge ya Byimana, Mwendo na Ruhango.

Avuga ko nta gishimisha nko kuba umurwayi aza kwivuza kandi agataha serivisi yashakaga ayibonye, aho nta muti barakenera guha umurwayi ngo bawubure.

Umuyobozi w’Akarere ka Ruhango, Habarurema Valens, avuga ko ibi byakozwe kugira ngo begereza abaturage serivisi z’ubuvuzi.

Yagize ati: “Ni muri urwo rwego Akarere kashyize imbaraga mu kugira Ivuriro ry’Ingoboka nibura rimwe muri buri Kagari kandi dufite Utugari 59 ariko 32 ni two tumaze kugezamo ivuriro riciriritse kandi rikora, ibigo nderabuzima 15 n’ibitaro 2 kandi byose bitanga serivisi ku baturage”.

Akomeza avuga amavuriro y’ibanze asigaje kubakwa ari 12 kandi nayo azihutishwa ku buryo nta muturage uzongera kugorwa no kubona serivisi z’ubuvuzi. Gusa hari amavuriro 5 ni arimo gufashwa gushakirwa ibyangombwa kugira ngo atangire gukorana na Mituweli.

Mu myaka 5 ishize imibare y’abantu bivuriza ku mavuriro mato bikubye inshuro hafi 62%. Mu Karere ka Ruhango habarurwa amavuriro y’ingoboka 32 mu Tugari 59, 18 muri yo akora acungwa n’ibigo nderabuzima mu gihe 14 acungwa na ba rwiyemezamirimo bigenga.

AKIMANA JEAN DE DIEU

  • Imvaho Nshya
  • Ukwakira 23, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE