Ruhango: Barishimira kubakirwa isoko rya Kamujisho rikabaruhura ingendo

  • AKIMANA JEAN DE DIEU
  • Werurwe 21, 2024
  • Hashize ibyumweru 4
Image

Bamwe mu batuye mu Murenge wa Mwendo barishimira ko begerejwe isoko ryo gucururizamo umusaruro ukomoka ku buhinzi bakemeza ko bagorwaga n’urugendo rurerure bakoraga bajya kurema andi masoko ari mu bilometero biri hagati ya 5 na 20.

Mu kiganiro bahaye Imvaho Nshya bemeje ko bajyaga bakora ibilometero birenga 5 bajya ku isoko rya Buhanda naho isoko rya Ruhango, Ntenyo ho harimo ibilometero birenga 15 mu gihe abandi bajyaga kurema isoko rya Muhanga riri mu biLometero birenga 20.

Esperance Uzamurera ni umwe mu bacuruzi bari basanzwe bahacururiza, akavuga ko bajyaga banyagirwa bakugama munsi y’ibiti none barashimira ababubakiye iryo soko.

Ati: “Aha bubatse iri soko hari hasanzwe hari agasoko gato twakoreragamo ariko tukanyagirwa ndetse n’ibicuruzwa byacu bikangirika ndetse imvura yagwaga tukugama munsi y’ibiti byatuma inkuba zihadukubitira, ariko turashimira ubuyobozi bwacu kuko bwarebye akababaro kacu n’igihombo twagiraga.”

Rwamucyo Prothogene avuga ko iryo soko rigiye kubafasha cyane kuko bajyaga bakora ingendo ndende bajya kurema andi masoko ari kure.

 ndetse bikabasaba ikiguzi kibabera umutwaro mu kujyana umusaruro wabo ku isoko bakemeza ko imiyoborere myiza ari imbarutso yo kubegereza iri soko rizabafasha kuhagurishiriza batagiye kure mu yandi.

Yagize ati: “Turashimira Akarere kacu kuko twakoraga ingendo ndende tujya kurema andi masoko harimo irya Buhanda riri mu bilometero birenga 5 ndetse abandi bajyaga mu Ruhango, Ntenyo na Muhanga usanga hari urugendo rusaga ibilometero bisaga 20 kugira ngo ugereyo, ibi turabikesha imiyoborere myiza kuko ni yo yatumye hubakwa iri soko rizafasha abaza kuturangurira baza ku bwinshi kandi nta musaruro wacu uzongera gupfa ubusa”.

Azella Iribagiza ni umuhinzi mworozi w’icyitegerezo wo mu Murenge wa Mwendo avuga ko mu mwaka wa 2007 yahawe inka muri Gira Inka agashimira Perezida Paul Kagame kuko byatumye yumva ko agomba guhinga urutoki akemeza ko Iri soko bubakiwe ari igisubizo ku ngendo bakoraga bajyanye umusaruro wabo ku isoko.

Yagize ati: “Ndashimira Paul Kagame wampaye inka muri 2007 muri Gahunda ya Girinka Munyarwanda, nari umukene cyane nari narazahaye mu gihe cya Jenoside yakorewe Abatutsi mu 1994 ariko inka yambereye imbarutso yo guhinga urutoki kugira ngo mbashe gukoresha ifumbire nyifumbiza urutoki , ikindi bikaba byangoraga kugeza umusaruro wanjye ku isoko ariko duhawe igisubizo cy’uko ingendo zigiye kugabanyuka cyane abatugurira bakajya badusanga hano tutagiye mu yandi masoko.”

Umuyobozi w’Akarere ka Ruhango, Valens Habarurema avuga ko abaturage batuye Kamujisho n’ahandi hahegereye bari bamaze iminsi bifuza isoko ryiza, mu rwego rwo gukorera heza ariko no kubagabanyiriza urugendo rurerure bakoraga bajya mu yandi masoko.

Ati: “Turashimira umufatanyabikorwa twafatanyije FH mu kubaka iri soko kuko ryari rikenewe cyane n’aba baturage banyagirwaga ibyo bazanye bigapfa, […] hari abakoraga ingendo ndende bajya gushaka ayandi masoko, iri rizabafasha kubungabunga umusaruro wabo ariko kandi barasabwa kuzarikoresha neza rigahindura imibereho yabo kuko babonye aho bazajya bagurishiriza”.

Akomeza avuga ko iri soko ribongerera imbaraga zo gukora kandi bakarikoresha neza icyo bariherewe bakiteza imbere, kuko ni bo baryisabiye ubwabo natwe tubashakira umufatanyabikorwa.

Abo baturage kandi bibukijwe ko bakwiye kugira uruhare rufatika mu bikorwa bahabwa kugira ngo babashe kwiteza imbere bahereye ku bikorwa byabo bya buri munsi.

Isoko rya Kamujisho ryuzuye ritwaye amafaranga y’u Rwanda 41 343 050 hatarimo ikibanza akaba yaratanzwe na FH naho Akarere katanze ubutaka bwo  kubakaho isoko kanakora imirimo yose ibanziriza kubaka (Drawings and Bills of Quantity Preparations) ndetse kanakurikirana imirimo y’ubwubatsi.

  • AKIMANA JEAN DE DIEU
  • Werurwe 21, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE