Ruhango: Ab’i Muyunzwe babangamiwe n’umuhanda utacyoroshya ubuhahirane

  • AKIMANA JEAN DE DIEU
  • Ugushyingo 24, 2023
  • Hashize amezi 6
Image

Abaturage batuye mu Gasanteri ka Muyunzwe barasaba ko bakorerwa umuhanda uva muri Gafunzo ukagera muri aka gasanteri kuko wangiritse ukaba utoroshya ubuhahirane ku baturage bava cyangwa bajya i Muyunzwe.

Bavuga ko bibagora kugera mu Byimana kuri kaburimbo kubera uyu muhanda, bagasaba ko wakorwa kuko bavuga ko bakoresha nibura 8,000 by’amafaranga y’u Rwanda kugenda no kugaruka mu gihe bitabaje ipikipiki, naho urugendo n’amaguru rukabasaba amasaha 4 kugira ngo babashe kugera mu Byimana.

Yankurije Speciose atuye mu Murenge wa Kinihira ho mu Kagari ka Muyunzwe avuga ko bigoye abajya i Muhanga cyangwa bakajya mu Byimana kubera umuhanda wangiritse udashobora kunyuramo imodoka iyo ariyo yose.

Yagize ati: “Rwose nibadufashe kuko tugowe n’uru rugendo rujaya mu Gasanteri ka Gafunzo ugakomeza werekeza mu Byimana kuko uyu muhanda ntabwo utworohereza kugerayo kuko warangiritse. Ntabwo ushobora kwigabizwa n’imodoka zisanzwe ku buryo zimwe zizenguruka urugendo rw’iminota 30 kugira ngo bafate umuhanda uva ku Buhanda ujya i Muhanga uciye muri Gafunzo”.

Uwimana Jean Pierre avuga ko hari ikigo Nderabuzima n’Ishuri Ryisumbuye rya APECAS Muyunzwe, bigorana kugeraho ku buryo n’ingobyi y’abarwayi biyisaba kuzenguruka kugira ngo ijyane umurwayi bananiwe kuvura kubera umuhanda wangiritse cyane.

Yagize ati: “Nkuko ubibona hano hari Ishuri Ryisumbuye rya APECAS Muyunzwe ndetse n’Ikigo Nderabuzima cya Muyunzwe, hakaba na Paruwasi Gatolika ya Muyunzwe ariko umuhanda uduhuza n’umuhanda ujya mu Byimana uratugoye kuko warangiriyse ntabwo ucamo imodoka ku buryo n’ingobyi y’abarwayi na yo izenguruka ijyanye umurwayi ku Bitaro bya Kabgayi mu gihe bamunaniwe bakamwohereza ku bindi bitaro.

Kalisa Theophile atuye mu Kagari ka Rukina, yemeza ko bigoye kubona ikigutwara mu gihe ugize gahunda yihuta kuko nta modoka yakwishora muri uyu muhanda wangiritse kandi wari nyabagendwa.

Yagize ati: “Usibye uyu muhanda wangiritse biratugora kuko uramutse ugize gahunda yihutirwa bigusaba kuba ufite amafaranga yo kwishyura ipikipiki nibura ibihumbi 8 kugenda no kugaruka kuko benshi bafite ibinyabiziga batinya ko byahangirikira. Turasaba Akarere ko kadufasha kuko twebwe intege zacu n’iz’Umuganda kandi ntacyo wahindura.”

Umuyobozi w’Akarere ka Ruhango Habarurema Valens, avuga ko iyo umuhanda wangiritse bagerageza kuwukora, gusa hari imihanda y’imigenderano ikorwa hakoreshejwe VUP kigira ngo ubuhahirane bubashe kugenda neza.

Yijeje ko Akarere kagiye kugenzura imihanda yose ifite ibibazo kugira ngo gafashe abaturage koroherwa n’ubuhahirane.

Yagize ati “Ubusanzwe iyo umuhanda wangiritse tugerageza kongera kuwusana kandi tugakoresha abaturage bacu bagahembwa amafaranga muri Gahunda ya VUP (Vision Umurenge Program) bityo rero n’uyu tugiye kureba icyakorwa kugira ngo udahagarika ubuhahirane, ibyo beza bibashe kugera ku isoko kandi na bo boroherezwe ingendo bajya gusaba serivisi ahantu hatandukanye.”

Uyu muhanda aba baturage basaba ko bakorerwa ushamikiye ku wundi muhanda uva mu Byimana i Kirengeli ugana mu Birambo ho mu Karere ka Karongi, ndetse n’i Kaduha gusa na wo bavuga ko ugenda wangirika ukaba wahagarika ubuhahirane bw’Uturere turimo Nyamagabe ndetse na Karongi mu Ntara y’Uburengerazuba.

  • AKIMANA JEAN DE DIEU
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE